ភ្នំពេញៈ កម្ពុជានឹងរៀបចំកិច្ចប្រជុំក្រុមការងាររួមកម្ពុជាគណៈកម្មការសេដ្ឋកិច្ចអឺរ៉ុប-អាស៊ី (គ.ស.អ.អ) លើកទី ៣ នៅថ្ងៃទី ៧-៨ ខែកញ្ញា ឆ្នាំ ២០២១ ដោយផ្តោតលើកិច្ចសហប្រតិបត្តិការពាណិជ្ជកម្ម និងវិនិយោគ។
លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្មក្នុងសប្តាហ៍មុន បានដឹកនាំកិច្ចប្រជុំអន្តរក្រសួង ដើម្បីត្រៀមរៀបចំកិច្ចប្រជុំក្រុមការងាររួមកម្ពុជា គ.ស.អ.អ លើកទី ៣ នៅខែក្រោយ។ កិច្ចប្រជុំនេះធ្វើឡើងដើម្បីប្រមូលធាតុចូលលើសេចក្តីព្រាងនៃសេចក្តីថ្លែងការណ៍រួមនៃកិច្ចប្រជុំ លើកទី ៣ ស្តីពីកិច្ចសហប្រតិបត្តិការរវាងកម្ពុជា និង គ.ស.អ.អ។
លោកស្រីបានថ្លែងថា៖ «កិច្ចប្រជុំនេះនឹងគ្របដណ្តប់លើវិស័យសំខាន់ៗមួយចំនួនដូចជា កិច្ចសហប្រតិបត្តិការពាណិជ្ជកម្ម និងវិនិយោគ, កិច្ចសហប្រតិបត្តិការសេដ្ឋកិច្ចឌីជីថល និងគយ ឧស្សាហកម្មថាមពល និងហេដ្ឋារចនាសម្ព័ន្ធ វិទ្យាសាស្ត្រ បច្ចេកវិទ្យា នវានុវត្តន៍ និងបច្ចេកវិទ្យាទំនាក់ទំនងព័ត៌មាន ព្រមទាំងបទប្បញ្ញត្តិបច្ចេកទេស និងអនាម័យ និងភូតគាមអនាម័យ និងកម្មសិទ្ធិបញ្ញា កិច្ចការពារអ្នកប្រើប្រាស់ និងការប្រកួតប្រជែង»។
គ.ស.អ.អ ជាតំណាងឱ្យសហព័ន្ធសេដ្ឋកិច្ចដែលតំណាងឱ្យប្លុកប្រទេសចំនួន ៥ រួមមាន រុស្ស៊ី កាហ្សាក់ស្ថានអាមេនី បេឡារុស និងកៀហ្ស៊ីស៊ីស្ថាន ដែលមានប្រជាជនសរុបជាង ១៨៤ លាននាក់ក្នុងឆ្នាំ ២០២០ និងមានផលិតផលក្នុងស្រុក GDP សរុបរួមគ្នា ៤,៧៧ ពាន់ពាន់លានដុល្លារ។
កិច្ចប្រជុំនៃក្រុមការងាររួមស្តីពីកិច្ចសហប្រតិបត្តិការកម្ពុជា គ.ស.អ.អ បានរៀបចំ ២ លើករួចមកហើយ។ លើកទី ១ នៅព្រះរាជាណាចក្រកម្ពុជាក្នុងឆ្នាំ ២០១៧ និងលើកទី ២ នៅសហព័ន្ធរុស្ស៊ី ក្នុងឆ្នាំ ២០១៨។
ទំហំពាណិជ្ជកម្មកម្ពុជា និងគណៈកម្មការសេដ្ឋកិច្ចអឺរ៉ុប-អាស៊ី ក្នុងឆ្នាំ ២០២០ មានតម្លៃសរុប ៦៧,៣៧ លានដុល្លារ កើន ១៨,២២ ភាគរយធៀបឆ្នាំ ២០១៩ ដែលមាន ៥៦,៩៨ លានដុល្លារ។ ក្នុងនោះការនាំចេញពីកម្ពុជាតម្លៃ ៥២,១៩ លានដុល្លារ កើន ០,៧៣ ភាគរយ និងការនាំទំនិញចូលមានតម្លៃ ១៥,១៨ លានដុល្លារកើនឡើង ១៩៣,៥៧ ភាគរយ។
ទំនិញសក្តានុពលរបស់កម្ពុជាដែលនាំចេញទៅកាន់សហភាពសេដ្ឋកិច្ចអឺរ៉ុប-អាស៊ី រួមមានសម្លៀកបំពាក់ ស្បែកជើង អង្ករ កាហ្វេ តែ ផ្លែឈើ បន្លែ គ្រឿងទេស ថ្នាំជក់ សូត្រ កៅស៊ូ និងគ្រឿងសង្ហារិម ជាដើម៕ LA