.jpg)
លោក Alan Joyce នាយកប្រតិបត្តិក្រុមហ៊ុនអាកាសចរណ៍ Qantas របស់ប្រទេសអូស្ត្រាលី។ AFP
ទីក្រុងស៊ីដនីៈ ក្រុមហ៊ុនអាកាសចរណ៍របស់ប្រទេសអូស្ត្រាលី Qantas នៅថ្ងៃព្រហស្បតិ៍បានបង្ហាញការខាតប្រចាំឆ្នាំលើសពី ១ ពាន់លានដុល្លារអាមេរិក និងបានអធិប្បាយថា «ជាឆ្នាំគួរឲ្យខ្លាច» បណ្តាលមកពីការរឹតត្បិតការធ្វើដំណើរ ដោយសារការរីករាលដាល។
ក្រុមហ៊ុនអាកាសចរណ៍ជាតិអូស្ត្រាលីនេះបានរាយការណ៍ខាតបង់មុនការបង់ពន្ធចំនួន ១,៨៣ ពាន់លានអូស្ត្រាលី (១,៣៣ ពាន់លានដុល្លារអាមេរិក) ក្នុងរយៈពេល ១២ ខែដល់ដំណាច់ខែមិថុនា កើនឡើងដល់ ២,៣៥ ពាន់លានដុល្លារអូស្ត្រាលី (១,៧ ពាន់លានដុល្លារអាមេរិក) ពេលដែលរួមបញ្ចូលការចំណាយផ្សេងទៀត មានដូចជា ការចំណាយលើការកាត់បុគ្គលិកជាដើម។
ក្រុមហ៊ុននេះខាតបង់ជិត ២ ពាន់លានដុល្លារអាមេរិកក្នុងការខាតបង់មុនពន្ធតាមច្បាប់ដែលបានរាយការណ៍នៅក្នុងឆ្នាំហិរញ្ញវត្ថុមុន នៅពេលដែលក្រុមហ៊ុនអាកាសចរណ៍នៅទូទាំងពិភពលោកត្រូវបានរងផលប៉ះពាល់ពីផលប៉ះពាល់ដំបូងនៃការរីករាលដាលនៃមេរោគឆ្លង។
លោក Alan Joyce នាយកប្រតិបត្តិក្រុមហ៊ុន Qantas បានព្យាករថា ប្រាក់ចំណូលរបស់ក្រុមហ៊ុននឹងធ្លាក់ចុះច្រើនជាង ២០ ពាន់លានដុល្លារអូស្ត្រាលី (១៤,៥ ពាន់លានដុល្លារអាមេរិក) គិតត្រឹមចុះឆ្នាំ ២០២១ ជាលទ្ធផលនៃកូវីដ ១៩។
លោកបានឲ្យដឹងតាមសេចក្តីប្រកាសព័ត៌មានថា៖ «ការខាតបង់នេះបង្ហាញពីផលប៉ះពាល់ពេញមួយឆ្នាំនៃការបិទព្រំដែនអន្តរជាតិ ហើយច្រើនជាង ៣៣០ ថ្ងៃនៃការរឹតត្បិតការធ្វើដំណើរក្នុងស្រុកមកលើក្រុមហ៊ុនអាកាសចរណ៍ជាតិនេះ»។
លោកបន្ថែមថា៖ «លក្ខខណ្ឌពាណិជ្ជកម្មច្បាស់ណាស់គឺគួរឲ្យខ្លាចណាស់»។
ក្រុមហ៊ុនអាកាសចរណ៍នេះបាននិយាយថារយៈពេលនៃការបើកព្រំដែននៅក្នុងប្រទេសអូស្ត្រាលីនៅដើមឆ្នាំ ២០២១ បានបង្កើនប្រាក់ចំណូលក្នុងរយៈពេលខ្លី ប៉ុន្តែការវិលត្រឡប់ទៅរកការរឹតត្បិតផ្ទៃក្នុងវិញ បន្ទាប់ពីការផ្ទុះឡើងនៃវីរុសបំប្លែងថ្មី Delta ដែលអូសបន្លាយពេលយូរនៅស៊ីដនីបានបង្ខំឱ្យមានការលុបចោលជើងហោះហើរជាច្រើន។
ប្រទេសអូស្ត្រាលីដែលបានកត់ត្រាករណីឆ្លងស្ទើរតែ ៤៧ ០០០ និង ស្លាប់ ៩៨៦ នាក់រហូតមកដល់ពេលនេះ កំពុងតតាំងនឹងការងើបឡើងនៃវីរុសកូរ៉ូណា ដែលធ្វើឲ្យប្រជាជនជាងកន្លះប្រទេសជាប់នៅក្នុងតំបន់បិទខ្ទប់៕ RR
