.jpg)
(ពីឆ្វេងទៅស្តាំ) លោក គិត ម៉េង លោកស្រី ហ៊ុន ម៉ាណា និង លោក អ៊ឹង ឆៃងួន។ ហេង ជីវ័ន
ភ្នំពេញៈ បណ្ដាញទូរទស្សន៍ធំៗ ៣ ដែលគ្រប់គ្រងដោយវិនិយោគិនក្នុងស្រុកនៅក្នុងប្រទេសកម្ពុជាបានចុះកិច្ចព្រមព្រៀងវិនិយោគរួមមួយ ដើម្បីបង្កើតថ្នាលទូរទស្សន៍ឌីជីថល តែ ១ គត់ជ្រកក្រោមក្រុមហ៊ុនរួមមួយដែលមានឈ្មោះថា «ក្រុមហ៊ុនសម្ព័ន្ធទូរទស្សន៍កម្ពុជា (Cambodia TV Alliance Co., Ltd)»។
ពិធីចុះហត្ថលេខាដែលបានចុះហត្ថលេខាកាលពីថ្ងៃទី ២៦ ខែសីហា ដោយក្រុមហ៊ុនទូរទស្សន៍បាយ័នគ្រុប របស់លោកស្រី ហ៊ុន ម៉ាណា និងក្រុមហ៊ុនរ៉ូយ៉ាល់គ្រុបមានទូរទស្សន៍ CBS និង Digital Sky របស់លោក គិត ម៉េង និងក្រុមហ៊ុនទូរទស្សន៍ហង្សមាសគ្រុបរបស់លោក អ៊ឹង ឆៃងួន ដែលកិច្ចព្រមព្រៀងនេះគឺជាការបន្ថែមទៅលើកិច្ចព្រមព្រៀងកាលពីថ្ងៃទី ១៨ ខែកុម្ភៈកន្លងមកនេះ។
យោងតាមព័ត៌មានដែលផ្សព្វផ្សាយ «ក្រុមហ៊ុនសម្ព័ន្ធទូរទស្សន៍កម្ពុជា» បង្កើតឡើងក្នុងគោលបំណងបង្កើតក្រុមហ៊ុនចម្រុះរវាងរដ្ឋ និងឯកជនសម្រាប់គ្រប់គ្រង «ថ្នាលទូរទស្សន៍ឌីជីថលជាតិ» ដើម្បីធ្វើឱ្យព្រះរាជាណាចក្រកម្ពុជា ឈានទៅសម្រេចឱ្យបានតាមផែនការរបស់អាស៊ាន និយាយជារួម និងនិយាយដោយឡែកស្របតាមយុទ្ធសាស្ដ្ររបស់រាជរដ្ឋាភិបាលកម្ពុជា ដែលបានកំណត់យកឆ្នាំ ២០២៣ ជាកាលបរិច្ឆេទនៃការដាក់ឱ្យដំណើរការថ្នាលទូរទស្សន៍ឌីជីថលជាតិ ដោយតម្រូវឱ្យក្រុមហ៊ុនទូរទស្សន៍អាណាឡូកឯកជនទាំងអស់មកប្រើប្រាស់សេវាថ្នាលទូរទស្សន៍ឌីជីថលជាតិ និងបន្តការផ្សាយព្រមគ្នាជាប្រព័ន្ធអាណាឡូក និងប្រព័ន្ធឌីជីថលស្របគ្នាមុននឹងដល់ដំណាច់ឆ្នាំ ២០២៥ ដែលជាកាលបរិច្ឆេទសម្រាប់បិទការផ្សាយទូរទស្សន៍តាមប្រព័ន្ធអាណាឡូកជាស្ថាពរ។
«ថ្នាលទូរទស្សន៍ឌីជីថលជាតិ» ដែលជាក្រុមហ៊ុនចម្រុះរវាងរដ្ឋ និងឯកជនថ្មីនេះនឹងផ្ដល់ជូនសេវាថ្នាលទូរទស្សន៍ឌីជីថលផ្សាយតាមប្រព័ន្ធ DVB-T2 ដែលមានប៉ុស្ដិ៍ច្រើនប្រភេទសម្បូរបែប សំដៅលើកស្ទួយវិស័យព័ត៌មាន អប់រំ ចំណេះដឹង សិល្បៈកម្សាន្ត កីឡា និងទស្សនីយភាពល្អៗត្រជាក់ភ្នែក ដែលនាំមកនូវភាពសុខដុមរមនាដល់ក្រុមគ្រួសារកម្ពុជា។
លោកស្រី ហ៊ុន ម៉ាណា ប្រធានក្រុមហ៊ុនទូរទស្សន៍បាយ័នគ្រុប បានឱ្យដឹងថា ការបង្កើតនេះនឹងរួមចំណែកក្នុងការលើកកម្ពស់បទប្បញ្ញតិ្ត និងគោលនយោបាយរបស់រដ្ឋាភិបាលដល់ទស្សនិកជនកាន់តែទូលំទូលាយ។
លោកស្រីនិយាយ៖ «ខ្ញុំពិតជាមានក្ដីសោមនស្សរីករាយក្នុងការសហការគ្នាបង្កើតថ្នាលទូរទស្សន៍ឌីជីថលនេះ ហើយក៏ជាផ្នែកមួយផងដែរ ក្នុងការគាំទ្រការផ្សព្វផ្សាយគោលនយោបាយរបស់រដ្ឋាភិបាលកម្ពុជា ដែលបច្ចុប្បន្នកម្ពុជាកំពុងមានការអភិវឌ្ឍលើគ្រប់វិស័យទាំងអស់ ក្រោមម្លប់សន្ដិភាព និងស្ថិរភាពនយោបាយ»។
លោក គិត ម៉េង ប្រធានក្រុមហ៊ុនរ៉ូយ៉ាល់គ្រុបក៏បានអះអាងថា សម្ព័ន្ធទូរទស្សន៍កម្ពុជានឹងមិនគ្រាន់តែឆ្លើយតបចំពោះផែនការជាយុទ្ធសាស្ដ្ររបស់រដ្ឋាភិបាល ដែលបានកំណត់យកឆ្នាំ ២០២៣ ជាកាលបរិច្ឆេទចាប់ផ្ដើមថ្នាលទូរទស្សន៍ឌីជីថលជាតិកម្ពុជាប៉ុណ្ណោះទេ ប៉ុន្តែថែមទាំងបង្ហាញការរីកចម្រើននៃការអភិវឌ្ឍបចេ្ចកវិទ្យាឌីជីថលនៅប្រទេសកម្ពុជា។
លោកថ្លែងថា៖ «យើងខ្ញុំមានសេចក្ដីសោមនស្សរីករាយ ដែលបានចាប់ដៃគូសហការគ្នា បង្កើតក្រុមហ៊ុនសម្ព័ន្ធទូរទស្សន៍កម្ពុជា និងមានមោទនភាពដែលបានចូលរួមចំណែកជួយអភិវឌ្ឍប្រទេសកម្ពុជាក្នុងវិស័យសោតទស្សន៍ និងផ្សព្វផ្សាយឱ្យទៅជាប្រព័ន្ធឌីជីថលពេញលេញ»។
ដោយឡែក លោក អ៊ឹង ឆៃងួន ប្រធានក្រុមហ៊ុនទូរទស្សន៍ហង្សមាសគ្រុប បានបញ្ជាក់ថា ថ្នាលទូរទស្សន៍ឌីជីថលនេះនឹងនាំមកនូវទស្សនីយភាព និងស្ដង់ដាថ្មីសន្លាងមួយទៀត ដែលមានកម្រិតផ្សាយ គុណភាពខ្ពស់ ច្បាស់ត្រជាក់ភ្នែក កម្រិត UHD 4K។ វានឹងជាថ្នាលប្រមូលផ្ដុំនៃកម្មវិធីសិល្បៈ កម្មវិធីកម្សាន្ត កម្មវិធីព័ត៌មាន ភាពយន្ត តន្ដ្រី និងទស្សនីយភាពដ៏សម្បូរបែបជាច្រើនទៀត ដែលធានានូវការផ្ដល់ជូនចំណីចក្ខុដ៏រីករាយជូនទស្សនិកជនទូទាំងប្រទេសក្នុងកន្លែងតែមួយ ដែលហៅថា «One-Stop-media services»៕LA
