ភ្នំពេញៈ មន្ត្រីជាន់ខ្ពស់នៃអគ្គនាយកដ្ឋានប្រេងកាតកម្ពុជាបានប្រាប់ ភ្នំពេញ ប៉ុស្តិ៍ នៅថ្ងៃព្រហស្បតិ៍ថា កម្ពុជាបានដាក់ពាក្យបណ្តឹងទៅកាន់អាជ្ញាធរឥណ្ឌូនេស៊ីរួចហើយ ដើម្បីស្នើសុំយកកប៉ាល់ដែលស្តុកប្រេង និងនាវិកទាំងអស់មកកាន់ប្រទេសកម្ពុជាវិញ ដើម្បីធ្វើការដោះស្រាយតាមផ្លូវច្បាប់។
ការដាក់ពាក្យបណ្តឹងរបស់អាជ្ញាធរកម្ពុជាធ្វើឡើង បន្ទាប់ពីកងកម្លាំងនាវិកជើងទឹករបស់ប្រទេសឥណ្ឌូនេស៊ី កាលពីថ្ងៃពុធបានឱ្យដឹងថា ខ្លួនបានរឹបអូសនាវាដឹកប្រេង ១ គ្រឿង និងនាវិកដែលត្រូវបានស្វែងរកដោយចោទប្រកាន់ពីបទលួចប្រេងឆៅជិត ៣០០ ០០០ បារ៉ែលពីអណ្ដូងប្រេងប្រទេសកម្ពុជា។
នាវាដឹកប្រេង MT Strovolos ដែលមានដោតទង់ជាតិប្រទេស Bahamian ត្រូវចាប់បានកាលពីថ្ងៃទី ២៧ ខែកក្កដា នៅឆ្ងាយពីឆ្នេរសមុទ្រនៃកោះស៊ូម៉ាត្រា រយៈពេលជាច្រើនថ្ងៃ បន្ទាប់ពីទីក្រុងភ្នំពេញបានចេញនិវេទន៍ក្រហមទៅនគរបាលអន្តរជាតិឱ្យរឹបអូសនាវាមួយនេះ ដោយអះអាងថា នាវានេះបានលួចប្រេងឆៅរបស់ប្រទេសកម្ពុជា។
លោក ជៀប សួរ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពលកម្ពុជាបានប្រាប់ ភ្នំពេញ ប៉ុស្តិ៍ថា ប្រេងប្រមាណ ៣០០ ០០០ បារ៉ែលដែលត្រូវបានក្រុមហ៊ុន Kris-Energy ជួលក្រុមហ៊ុនកប៉ាល់ MT Strovolos ស្តុកប្រេងដែលបូមបាននោះ បានលួចដឹកប្រេងចេញដោយគ្មានការអនុញ្ញាតណាមួយឡើយ។
លោកថ្លែងថា៖ «ប្រេងដែលដឹកចេញទៅដោយក្រុមហ៊ុនជាម្ចាស់កប៉ាល់ដែលក្រុមហ៊ុន KrisEnergy បានជួលឱ្យស្តុកប្រេងនេះ គឺផលិតបានពីប្លុក A របស់យើង។ កប៉ាល់នោះបានដឹកប្រេងដែលស្តុកនោះចេញទៅដោយគ្មានការអនុញ្ញាតពីក្រុមហ៊ុន KrisEnergy និងរដ្ឋាភិបាលយើងឡើយ»។
លោកបន្ថែមទៀតថា៖ «ឥឡូវដឹកដល់ប្រទេសឥណ្ឌូនេស៊ី ដែលគេចាប់បាននៅទីនោះ។ បច្ចុប្បន្នយើងបានដាក់បណ្តឹងទៅកាន់អាជ្ញាធរឥណ្ឌូនេស៊ីរួចរាល់អស់ហើយ និងស្នើឱ្យគេចាត់វិធានការបញ្ជូនប្រេង កប៉ាល់ រួមទាំងនាវិកនៅលើកប៉ាល់នោះត្រឡប់មកប្រទេសកម្ពុជាយើងវិញ។ ពេលនេះយើងកំពុងធ្វើការជាមួយអាជ្ញាធរឥណ្ឌូនេស៊ី»។
បើយោងតាមការចុះផ្សាយដោយសារព័ត៌មាន AFP កាលពីថ្ងៃពុធ កងទ័ពជើងទឹករបស់ប្រទេសឥណ្ឌូនេស៊ី កំពុងធ្វើការសួរចម្លើយក្រុមនាវិកជនជាតិឥណ្ឌា ចំនួន ១៣ នាក់ បង់ក្លាដែស ៣ នាក់ និងមីយ៉ាន់ម៉ា ៣ នាក់នៅមូលដ្ឋានរបស់ខ្លួនជិតប្រទេសសិង្ហបុរី។ ក្រុមអាជ្ញាធរបានឱ្យដឹងថា នាវាដឹកប្រេងដែលមានប្រវែង ១៨៣ ម៉ែត្រចេញដំណើរមកពីប្រទេសថៃទៅកោះ Batam របស់ប្រទេសឥណ្ឌូនេស៊ី និងបានបិទប្រព័ន្ធកំណត់អត្តសញ្ញាណរបស់ខ្លួន ហើយបានចតដោយខុសច្បាប់ក្នុងដែនទឹកនៃប្រជុំកោះនេះ។
លោក Arsyad Abdullah មេបញ្ជាការកងនាវាចរណ៍ First Fleet បានឱ្យដឹងក្នុងសេចក្ដីប្រកាសព័ត៌មានថា៖ «កងទ័ពជើងទឹកឥណ្ឌូនេស៊ីនឹងមិនស្ទាក់ស្ទើរក្នុងការចាត់វិធានការប្រឆាំងនឹងប្រភេទណាមួយនៃការប្រព្រឹត្តបទឧក្រិដ្ឋក្នុងដែនសមត្ថកិច្ចឥណ្ឌូនេស៊ីឡើយ»។
កម្ពុជាបានធ្វើការបូមប្រេងដំបូងពីប្លុក A របស់ខ្លួនដោយក្រុមហ៊ុន KrisEnergy កាលពីថ្ងៃទី ២៩ ខែ ធ្នូ ឆ្នាំ ២០២០។ អណ្ដូងប្រេងប្លុក A របស់កម្ពុជា គ្របដណ្ដប់លើផ្ទៃ ៤ ៧០៩ គីឡូម៉ែត្រក្នុងឈូងសមុទ្រថៃនៅខ្មែរបាសាំង និងមានចម្ងាយប្រហែល ១៥០ គីឡូម៉ែត្រពីច្រាំងសមុទ្រកម្ពុជា៕ LA
វីដេអូ៖