.jpg)
ក្រុមកម្មការិនីកំពុងដេរសម្លៀកបំពាក់ក្នុងរោងចក្រមួយ។ ហុង មិនា
ភ្នំពេញៈ ក្រុមការងាររបស់ Switch Garment រួមជាមួយវិទ្យាស្ថានថាមពល និងធនធាន (TERI) ព្រមទាំងវិទ្យាស្ថានបច្ចេកវិទ្យាកម្ពុជា បានចាប់ផ្តើមសវនកម្មថាមពលរយៈពេលវែង តាមបណ្តារោងចក្រកាត់ដេរនៅប្រទេសកម្ពុជា ចាប់ពីថ្ងៃទី ២៤ ខែសីហា តទៅ។
សវនកម្មថាមពលគម្រោង Switch Garment នឹងវិភាគអំពីការប្រើប្រាស់ថាមពលនៅក្នុងរោងចក្រកាត់ដេរ ព្រមទាំងស្វែងយល់អំពីឱកាសក្នុងការសន្សំសំចៃ និងការបង្កើនប្រសិទ្ធភាពផលិតកម្ម។
តាមរយៈ Switch Garment សវនកម្មថាមពលនឹងជួយបំភ្លឺវិថីឆ្ពោះទៅកាន់ការវិនិយោគផ្នែកថាមពលស្អាតតាមបណ្តារោងចក្រនានា។ ក្នុងនោះដែរ សវនកម្មថាមពលក៏នឹងជួយកំណត់ វគ្គបណ្តុះបណ្តាលដែលចាំបាច់នានាសម្រាប់ជួយពង្រីកសមត្ថភាពរោងចក្រក្នុងការប្រើថាមពលប្រកបដោយចីរភាព។
បច្ចុប្បន្នដោយមើលឃើញពីតម្រូវការរបស់អ្នកប្រើប្រាស់សម្លៀកបំពាក់ដែលចង់កាត់បន្ថយផលប៉ះពាល់បរិស្ថានពីការប្រើប្រាស់សម្លៀកបំពាក់ រោងចក្រចំនួន ៣០ បានចូលរួមជាដៃគូជាមួយនឹងគម្រោង Switch Garment ហើយគម្រោងនេះនឹងជ្រើសរើស ២០ រោងចក្រទៀតនៅចុងឆ្នាំនេះ។
លោក លី តេកហេង អគ្គនាយកសមាគមរោងចក្រកាត់ដេរនៅកម្ពុជា ដែលកំពុងដឹកនាំការចូលរួមរបស់រោងចក្រនៅក្នុងសវនកម្មនេះបាននិយាយថា៖ «ឥឡូវនេះ ម៉ាកអន្តរជាតិជាច្រើនដែលទទួលទិញសម្លៀកបំពាក់ពីរោងចក្រនៅកម្ពុជាបានផ្តោតជាពិសេសទៅលើចីរភាពនៃទំនិញ ដោយសារតែកំណើននៃការយល់ដឹងពីបរិស្ថានរបស់ពួកគេ។ ដូច្នេះដើម្បីរក្សាភាពប្រកួតប្រជែងវិស័យកាត់ដេរត្រូវតែដើរឱ្យទាន់និន្នាការរបស់អ្នកប្រើប្រាស់»។
ជារោងចក្រដំបូងមួយដែលចូលរួមក្នុងគម្រោង Switch Garment នាយកគ្រប់គ្រងនៃ PPSEC លោក Robert Hwang ប្រាប់ថា៖ «ថ្លៃអគ្គិសនីខ្ពស់ និងការកើនឡើងនៃតម្រូវការផ្នែកចីរភាពរបស់អ្នកប្រើប្រាស់ គឺជាចំណុចប្រឈមរបស់រោងចក្រកាត់ដេរនៅកម្ពុជា»។
បើយោងតាមធនាគារពិភពលោកឧស្សាហកម្មកាត់ដេរសកលផលិតទៅដល់ ១០ ភាគរយនៃទំហំឧស្ម័នកាបូនសកលប្រចាំឆ្នាំ។ នៅប្រទេសកម្ពុជា GGGI បានធ្វើការប៉ាន់ប្រមាណថា ការធ្វើឱ្យប្រសើរឡើងនូវការអនុវត្តថាមពលក្នុងការផលិតសម្លៀកបំពាក់អាចចូលរួមកាត់បន្ថយការបញ្ចេញឧស្ម័នផ្ទះកញ្ចក់បានរហូតដល់ទៅ ១៧ ភាគរយ៕ LA
