ភ្នំពេញ៖ ក្រសួងទេសចរណ៍អំពាវនាវដល់ក្រុមហ៊ុនសេវាប្រឹក្សាយោបល់ដាក់ពាក្យដេញថ្លៃ ដើម្បីផ្តល់សេវាកម្មក្នុងការរៀបចំ និងរចនានូវមគ្គុទេ្ទសក៍ឌីជីថលពហុវេទិកាលើឧបករណ៍ Android and IOS ទេសចរណ៍វៃឆ្លាតគំរូសម្រាប់តំបន់បេតិកភណ្ឌ និងតំបន់ទេសចរណ៍ដែលមានសក្តានុពល។
ក្រសួងបន្តថាក្រុមហ៊ុនអាចចូលរួមរៀបចំដាក់សំណើដេញថ្លៃលើសកម្មភាព «បង្កើតគំរូមគ្គុទ្ទេសក៍ទេសចរណ៍វៃឆ្លាតសម្រាប់ខណ្ឌដូនពេញ រាជធានីភ្នំពេញ»។
គម្រោងនេះស្ថិតក្រោមក្របខ័ណ្ឌកម្មវិធីពង្រឹងសមត្ថភាពពាណិជ្ជកម្មក្នុងវិស័យទេសចរណ៍ (TCBP) ដែលទទួលបានជំនួយហិរញ្ញប្បទានពីទីភ្នាក់ងារបារាំងសម្រាប់ការអភិវឌ្ឍន៍ (AFD) នូវទឹកប្រាក់ ១,៥ លានអឺរ៉ូ (១,៧ លានដុល្លារ) ដើម្បីជួយស្តារវិស័យទេសចរណ៍ក្រោយកូវីដ ១៩ ដែលជំនួយនេះស្ថិតក្រោមគម្រោងកសាងសមត្ថភាពទេសចរណ៍ឆ្នាំ ២០២០-២០២៣។ នេះបើតាមក្រសួងទេសចរណ៍។
គម្រោង TCBP ត្រូវបែងចែកជា ១៨ វគ្គបណ្តុះបណ្តាលលើជំនាញចំនួន ៧ ដែលរួមមាន ជំនាញទំនាក់ទំនង និងកន្លែងការងារ, ទីផ្សារ និងទេសចរណ៍, ការគ្រប់គ្រងគម្រោង, ស្ថិតិ និងការស្រាវជ្រាវ, សុវត្ថិភាពចំណីអាហារ ការគ្រប់គ្រងហិរញ្ញវត្ថុ និង ICT៕