ភ្នំពេញៈ សមាគមពាណិជ្ជករដឹកជញ្ជូនទំនិញ (LOBA) និងសមាគមខ្សែចង្វាក់ផ្គត់ផ្គង់អាស៊ី (SCA) ដែលមានមូលដ្ឋាននៅក្នុងប្រទេសសិង្ហបុរីបានចុះអនុស្សរណៈយោគយល់គ្នា (MoU) ដើម្បីពង្រឹងកិច្ចសហប្រតិបត្តិការក្នុងឧស្សាហកម្មខ្សែចង្វាក់ផ្គត់ផ្គង់ និងការដឹកជញ្ជូនទំនិញ ដែលវិស័យនេះត្រូវរំពឹងថានឹងមានសម្ទុះឡើងវិញ បន្ទាប់ពីពិភពលោកអាចគ្រប់គ្រងការឆ្លងជំងឺកូវីដ ១៩ ប្រកបដោយជោគជ័យ។
ពិធីចុះហត្ថលេខាលើ MoU នេះបានធ្វើឡើងកាលពីថ្ងៃទី ២៦ ខែសីហា តាមប្រព័ន្ធអនឡាញរវាងលោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញជាមួយនឹងលោក Paul Lim ប្រធានសមាគមផ្គត់ផ្គង់ខ្សែចង្វាក់អាស៊ី។
យោងតាមខ្លឹមសារនៃ MoU ភាគីទាំង ២ សន្យានឹងបង្កើនកិច្ចសហប្រតិបត្តិការជាមួយគ្នាឱ្យកាន់តែជិតស្និទ្ធទាក់ទងនឹងការផ្គត់ផ្គង់ទំនិញ និងដឹកជញ្ជូន និងការជួយសម្របសម្រួលគ្នាលើបណ្តាញអាជីវកម្មដោយផ្ទាល់ ឬប្រព័ន្ធអនឡាញ ព្រមទាំងរៀបចំដំណើរទស្សនកិច្ចសិក្សារួមគ្នាទាក់ទងខ្សែចង្វាក់ផ្គត់ផ្គង់ និងការដឹកជញ្ជូនទំនិញអន្តរជាតិ។
ប្រធានសមាគមពាណិជ្ជករដឹកជញ្ជូនទំនិញ លោក ជា ចាន់ដារ៉ា បានប្រាប់ភ្នំពេញប៉ុស្តិ៍ថា លោកពិតជារីករាយចំពោះការបង្កើតកិច្ចសហប្រតិបត្តិការជាមួយ SCA ដែលជាសមាគមធំនៅសិង្ហបុរី និងមានបណ្តាញទំនាក់ទំនងផ្នែកផ្គត់ផ្គង់ និងដឹកជញ្ជូនទំនិញ ជាច្រើនលើពិភពលោក។
លោកថ្លែងថា៖ «MoU នេះនឹងជួយដល់សមាជិក LOBA និង SCA ក្នុងការអភិវឌ្ឍអាជីវកម្ម ការកសាងសមត្ថភាព កម្មវិធីផ្លាស់ប្តូរ និង/ឬបណ្តាញអាជីវកម្មលើវិស័យឡូជីស្ទិកកាន់តែប្រសើរ»។
លោក ចាន់ដារ៉ា លើកឡើងទៀតថា ទោះបីស្ថានភាពជំងឺកូវីត ១៩ នៅតែបន្តជះឥទ្ធិពលអវិជ្ជមានដល់សេដ្ឋកិច្ចពិភពលោកក៏កម្ពុជាដែលជាប្រទេសកំពុងអភិវឌ្ឍន៍នៅតែមានតម្រូវការច្រើនទាំងការនាំចេញ និងនាំចូលទំនិញ មានដូចជា ការនាំចូលវត្ថុធាតុដើមប្រើប្រាស់ក្នុងវិស័យវាយនភណ្ឌ គ្រឿងសំណង់ និងគ្រឿងឧបភោគបរិភោគ ចំណែកការនាំចេញរួមមានផលិតផលវាយនភណ្ឌ ផលិតផលកសិកម្ម និងគ្រឿងបង្គុំជាច្រើនទៀត។
លោកអះអាងថា៖ « MoU ជាមួយ SCA ពិតជាមានភាពចាំបាច់ ព្រោះសិង្ហបុរី ជាប្រទេសមានវិស័យបច្ចេកវិទ្យាជឿនលឿន និងជាប្រទេសមានកំពង់ផែសក្តានុពលក្នុងតំបន់អាស៊ី»។
លោក Paul Lim អគ្គនាយក SCA បាននិយាយក្នុងពិធីចុះ MoU ថា SCA សន្យាជួយចែករំលែកចំណេះដឹងផ្នែកបច្ចេកវិទ្យា និងបទពិសោធពីការធ្វើពាណិជ្ជកម្មជាអន្តរជាតិរបស់ខ្លួនដល់ LOBA ហើយនៅពេលការរីករាលដាលជំងឺកូវីដ ១៩ មានភាពធូរស្រាល លោកនឹងមកប្រទេសកម្ពុជា ដើម្បីទទួលបានបទពិសោធថ្មីៗ ក៏ដូចជាសិក្សាពីឱកាសវិនិយោគនៅកម្ពុជាផងដែរ។
លោកប្រាប់ថា៖ «នៅពេលកូវីដ ១៩ ធូរស្រាល ខ្ញុំ រួមទាំងសមាជិក SCA នឹងធ្វើដំណើរទៅកម្ពុជា ដើម្បីលើកកម្ពស់កិច្ចសហប្រតិបត្តិការ ក៏ដូចជាពិនិត្យមើលសក្តានុពលវិនិយោគនៅទីនោះផងដែរ»៕ LA