.jpg)
ទឹកធ្លាក់ចង្ក្រានរយ គឺជាតំបន់ទេសចរណ៍មួយនៃសហគមន៍ទេសចរណ៍ធម្មជាតិចង្ក្រានរយ ដែលមានមូលដ្ឋានស្ថិតនៅក្នុងភូមិបាយដុត ឃុំស្វាយស ស្រុកវ៉ារិន ខេត្តសៀមរាប។ ហេង ជីវ័ន
ភ្នំពេញៈ ក្រសួងទេសចរណ៍បានចុះអនុស្សរណៈនៃការយោគយល់គ្នា (MoU) ជាមួយសហគ្រិនខ្មែរ លើគម្រោង «ជំរុញចលនាទេសចរណ៍ផ្ទៃក្នុង និងលើកកម្ពស់សកម្មភាពទេសចរណ៍ក្នុងសហគមន៍ទេសចរណ៍ក្នុងបរិបទវិបត្តិកូវីដ១៩» ដើម្បីជួយឱ្យប្រជាសហគមន៍នៅតាមសហគមន៍ទេសចរណ៍នីមួយៗចេះបង្កើតអាជីវកម្មថ្មីៗដោយខ្លួនឯង និងពង្រីកអាជីវកម្មរបស់ខ្លួន ក្រៅពីការងារបម្រើសេវាកម្មទេសចរណ៍។
កម្មវិធីនេះ លោក ថោង រដ្ឋសក្តិ អគ្គនាយកនៃអគ្គនាយកដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ ក្រសួងទេសចរណ៍ បានចុះហត្ថលេខាលើ MoU នេះ ជាមួយលោក ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ ក្រោមអធិបតីភាព លោក ថោង ខុន រដ្ឋមន្ត្រីក្រសួងទេសចរណ៍ កាលពីថ្ងៃទី២៧ ខែសីហា ឆ្នាំ ២០២១ នៅទីស្តីការក្រសួងទេសចរណ៍។
លោក ថោង រដ្ឋសក្តិ បានថ្លែងថា នៅជំហានដំបូង ក្រសួងទេសចរណ៍ និងសហគ្រិនខ្មែរបានឯកភាពគ្នាជ្រើសរើសសហគមន៍ទេសចរណ៍ចំនួន ៥ សហគមន៍ ដើម្បីជួយអភិវឌ្ឍនិងបណ្ដុះបណ្ដាលទៅតាមស្ដង់ដា និងធនធានហិរញ្ញវត្ថុ។ សហគមន៍ទាំង ៥ នោះនៅខេត្តចំនួន ៤ គឺ សហគមន៍អេកូទេសចរណ៍ទឹកជប់ខ្នារពោធិ៍ ក្នុងស្រុកសូទ្រនិគម និងសហគមន៍ទេសចរណ៍ចង្រ្កានរយ ក្នុងស្រុកវ៉ារិន (ខេត្តសៀមរាប ) សហគមន៍ទេសចរណ៍ទឹកធ្លាក់អូរជាំ ក្នុងស្រុកសំឡូត (ខេត្តបាត់ដំបង) សហគមន៍ទេសចរណ៍រាំងខ្វាវ ក្នុងស្រុកក្រវាញ (ខេត្តពោធិ៍សាត់) និងសហគមន៍ទេសចរណ៍ស្រែអំពិល ក្នុងស្រុកទឹកផុស (ខេត្តកំពង់ឆ្នាំង)។
លោកថា៖ «មូលហេតុដែលក្រសួងទេសចរណ៍ និងសហគ្រិនខ្មែរសម្រេចជ្រើសរើសសហគមន៍៍ទេសចរណ៍ទាំង ៥ ដើម្បីជួយអភិវឌ្ឍ ពីព្រោះ សហគមន៍ទាំងនោះមានសក្ដានុពលលើវិស័យទេសចរណ៍ពិសេសៗ ប្លែកៗពីគ្នា ហើយប្រជាសហគមន៍មានការខិតខំយ៉ាងខ្លាំងក្នុងការរៀបចំសហគមន៍របស់ខ្លួនគ្រាន់តែកន្លងមកសហគមន៍ទាំងនោះមិនទាន់មានការជួយជ្រោមជ្រែងឱ្យបានខ្លាំងក្លាពីក្រសួង-ស្ថាប័នផ្សេងនៅឡើយ។ ម្យ៉ាងវិញទៀត សហគមន៍ទេសចរណ៍ទាំងប្រាំនេះ ក៏ស័ក្តិសមបំផុតសម្រាប់ការទទួលភ្ញៀវទេសចរក្នុងបរិបទវិបត្តិកូវីដ១៩ ផងដែរ»។
លោក រដ្ឋសក្តិ បានលើកឡើងថា MoU គឺជាកិច្ចការដ៏មានសារៈសំខាន់ណាស់ ក្នុងការសហការគ្នាជំរុញឱ្យមានចលនាទេសចរណ៍ផ្ទៃក្នុង មុនការបើកទទួលភ្ញៀវទេសចរអន្តរជាតិពីក្រៅប្រទេស នាពេលខាងមុខ ស្របពេលយុទ្ធនាការនៃការចាក់វ៉ាក់សាំងជូនប្រជាពលរដ្ឋទូទាំងប្រទេស ក៏បាននិងកំពុងប្រព្រឹត្តទៅយ៉ាងរលូន ពិសេសការចាក់វ៉ាក់សាំងដូសទី៣។
លោកបន្ថែមថា៖ «សម្រាប់ក្រសួងទេសចរណ៍នឹងចូលរួមជួយអភិវឌ្ឍសហគមន៍ទាំងនោះ ដោយផ្ដោតទៅលើការបណ្ដុះបណ្ដាលអំពីការអនុវត្តវិធានសុវត្ថិភាពទេសចរណ៍ វិធានសុខាភិបាលក្នុងបរិបទវិបត្តិកូវីដ១៩ និងក្រោយវិបត្តិ។ ក្រៅពីនោះ នៅមានការបណ្ដុះបណ្ដាលអំពីស្ដង់ដាម្ហូបអាហារ ស្ដង់ដាទស្សនកិច្ចទេសចរណ៍ (Farm Trip) សម្រាប់ភ្ញៀវក្នុងស្រុក និងភ្ញៀវអន្តរជាតិ និងការបណ្ដុះបណ្ដាលដោយផ្ទាល់ផ្សេងទៀត»។
តាមរយៈ MoUនេះ សហគ្រិនខ្មែរនឹងគាំទ្រលើធនធានហិរញ្ញវត្ថុសម្រាប់ជួយដោយផ្ទាល់ទៅដល់សហគមន៍ និងមានជាការបណ្ដុះបណ្ដាលបច្ចេកទេសបង្កើតអាជីវកម្ម ពង្រីកអាជីវកម្ម និងមុខរបរនានាដល់ប្រជាសហគមន៍ទៀតផង ពិសេសសហគ្រិនខ្មែរមានដៃគូអភិវឌ្ឍន៍ផ្សេងទៀតជាច្រើនសម្រាប់ជួយសហការលើកិច្ចការនេះ។ ធនធានហិរញ្ញវត្ថុដែលសហគ្រិនខ្មែរមានសម្រាប់ប្រើប្រាស់នោះគឺជាកម្ចីឥណទាន ១០០ភាគរយពីក្រសួងសេដ្ឋកិច្ច និងហិរញ្ញវត្ថុ។
លោក ឈៀង វណ្ណមុនិណ្ឌ កត់សម្គាល់ថា ក្រសួងទេសចរណ៍មានស្ដង់ដាច្បាស់លាស់ក្នុងការអភិវឌ្ឍសហគមន៍ ស្ដង់ដាបណ្ដុះបណ្ដលនៃការទទួលភ្ញៀវទេសចរ ដូចនេះហើយទើបសហគ្រិនខ្មែរចង់ចូលរួមអភិវឌ្ឍនៅតាមសហគមន៍ជាមួយក្រសួងទេសចរណ៍ ដើម្បីបង្កើនភាពទាក់ទាញភ្ញៀវទេសចរពីគ្រប់មជ្ឈដ្ឋាន ឱ្យចូលទៅទស្សនានៅក្នុងសហគមន៍ទេសចរណ៍ទាំងនោះ សំដៅជួយឱ្យប្រជាសហគមន៍ទទួលបានប្រាក់ចំណូលកាន់តែល្អប្រសើរ។
លោកថា៖ «ក្រៅពីការចូលរួមបម្រើសេវាកម្មទេសចរណ៍ប្រចាំថ្ងៃ សហគ្រិនខ្មែរចង់ឱ្យប្រជាសហគមន៍ទាំងនោះចេះបង្កើតមុខរបរអាជីវកម្មថ្មីៗសម្រាប់គ្រួសាររបស់ពួកគាត់ និងពង្រីកអាជីវកម្មដែលពួកគេមានស្រាប់ឱ្យរីកចម្រើនជាងមុខ ដោយហេតុថានៅតាមសហគមន៍ទេសចរណ៍ទាំងនោះ នឹងមានភ្ញៀវទេសចរទៅលេងកម្សាន្តច្រើន ហើយប្រជាសហគមន៍នឹងមានឱកាសអាចលក់ដូររបស់របរ ទំនិញ ឬសេវាកម្មនានារបស់ខ្លួនទៅឱ្យភ្ញៀវទេសចរដើម្បីទទួលបានប្រាក់ចំណូលបន្ថែមសម្រាប់ទ្រទ្រង់ជីវភាពប្រចាំថ្ងៃ»។
លោកថា សហគ្រិនខ្មែរពិតជាចង់ជួយឱ្យសហគមន៍ទាំង ៥ នោះ ក្លាយជាសហគមន៍គំរូប្រចាំប្រទេសកម្ពុជា ដើម្បីឱ្យសហគមន៍ទេសចរណ៍ដទៃទៀតយកគំរូតាមដើម្បីជួយសហគមន៍ឱ្យរីកចម្រើនតទៅមុខទៀត។
លោកនិយាយថា៖ «សហគមន៍មិនមែនត្រឹមតែទទួលភ្ញៀវទេ ប៉ុន្តែប្រជាសហគមន៍អាចពង្រីកអាជីវកម្ម ហើយមានសមត្ថភាពអាចទទួលភ្ញៀវទេសចរកម្រិតខ្ពស់បាន និងអាចឈានទៅដល់ការទាក់ទាញការវិនិយោគថែមទៀតផង។ ប្រសិនបើមានប្រព័ន្ធគ្រប់គ្រងបញ្ជីចំណូលចំណាយ មានគណនេយ្យភាពច្បាស់លាស់ មានគំរូអាជីវកម្មបានល្អ សហគ្រិនខ្មែរនឹងមានកម្លាំងចិត្តក្នុងការបន្តជួយរៀបចំគំរូអាជីវកម្មពួកគាត់បន្ថែមទៀត»៕
