ភ្នំពេញៈ DBD Engineering ជាក្រុមហ៊ុនសហគ្រាសធុនតូច និងមធ្យមលើកដំបូងរបស់កម្ពុជាដែលចុះបញ្ជីលើទីផ្សារកំណើននៃក្រុមហ៊ុនផ្សារមូលបត្រកម្ពុជា (CSX) ទទួលបានការជាវភាគហ៊ុនទាំងអស់នៃដំណើរការបរិវិសកម្មរបស់ខ្លួន ចាប់ពីថ្ងៃទី ២៦ ខែកក្កដា ដល់ថ្ងៃទី ១៨ ខែសីហា ឆ្នាំ ២០២១ ដោយលក់ភាគហ៊ុនទាំងក្នុងតម្លៃ ២ ៣៨០ រៀលក្នុង ១ ភាគហ៊ុន ប្រមូលមូលនិធិបានជាង ៣,៨៤ លានដុល្លារ ខណៈក្រុមហ៊ុនរំពឹងថា នឹងចុះបញ្ជីជាផ្លូវការនៅខែក្រោយ។
យោងតាម SBI Royal Securities ជាភ្នាក់ងារធានាទិញមូលបត្ររបស់ DBD បានលក់ភាគហ៊ុនទាំងអស់ចំនួន ៦ ៤៦១ ៥៣៨ ក្នុងនោះភាគហ៊ុនប្រហែល ៣,៤ លាន ត្រូវបានលក់ឱ្យក្រុមវិនិយោគិនយុទ្ធសាស្ដ្រ និងភាគហ៊ុននៅសល់បានលក់ឱ្យក្រុមវិនិយោគិនបុគ្គល។
ក្រុមហ៊ុន DBD Engineering PlC និងក្រុមហ៊ុន SBI Royal Securities (SBIR) បានឱ្យដឹងក្នុងឯកសារផ្ញើទៅក្រុមហ៊ុនផ្សារមូលបត្រកម្ពុជាកាលពីថ្ងៃទី ២៧ ខែសីហាថា ខ្លួនបានជូនដំណឹងដល់ក្រុមវិនិយោគិន ដែលបានចូលរួមក្នុងដំណើរការបរិវិសកម្មរបស់ក្រុមហ៊ុន DBD IPO ចាប់ពីថ្ងៃទី ២៦ ខែ កក្កដា ដល់ថ្ងៃទី ១៨ សីហា ឆ្នាំ ២០២១ ថា ការធ្វើបរិវិសកម្មទទួលបានជោគជ័យយ៉ាងខ្លាំងដោយភាគហ៊ុនទាំង ៦ ៤៦១ ៥៣៨ ត្រូវបានជាវទាំងអស់។
ក្រុមហ៊ុននេះបានឱ្យដឹងថា ការសងប្រាក់ដល់វិនិយោគិនទាំងអស់នឹងត្រូវធ្វើឡើងចាប់ពីថ្ងៃទី ២៧ ខែ សីហា ឆ្នាំ ២០២១។ លទ្ធផលការធ្វើបរិវិសកម្ម និងបញ្ជីសងប្រាក់ត្រូវបានអនុម័តរួចហើយដោយនិយតករមូលបត្រកម្ពុជា (SERC) កាលពីថ្ងៃទី ២៥ ខែ សីហា ឆ្នាំ ២០២១។
លោក សេង ចាន់ធឿន នាយកគ្រប់គ្រងក្រុមហ៊ុន SBI Royal Securities បានប្រាប់ ភ្នំពេញ ប៉ុស្ដិ៍ កាលពីថ្ងៃទី ២៩ ខែសីហាថា ក្រុមហ៊ុន DBD មិនមានការស្ទាបស្ទង់តម្លៃមូលបត្រជាសាធារណៈសម្រាប់ IPO នេះទេ ហើយតម្លៃត្រូវបានកំណត់ដោយពឹងផ្អែកលើរបាយការណ៍វាយតម្លៃភាគហ៊ុនដោយ SBIR ក្រុមហ៊ុន និងក្រុមវិនិយោគិនសំខាន់ៗ។
លោកលើកឡើងថា៖ «ខណៈដែលដំណើរការទីផ្សារជាធម្មតា និងមុនពេលយើងបើកដំណើរការបរិវិសកម្ម យើងចាំបាច់ត្រូវស្វែងរកក្រុមវិនិយោគិនយុទ្ធសាស្ដ្រ។ ទោះយ៉ាងណាផ្អែកលើស្ថានភាពតម្រូវការបច្ចុប្បន្ន ខ្ញុំជឿថា មានតែក្រុមវិនិយោគិនលក់រាយប៉ុណ្ណោះអាចទទួលយក IPO ទាំងមូលដោយមិនត្រូវការការគាំទ្រជាមុនពីក្រុមវិនិយោគិនយុទ្ធសាស្ដ្រ»។
ប៉ុន្តែលោកបានឱ្យដឹងថា តម្រូវការពីក្រុមវិនិយោគិនលក់រាយនៅពេលនេះរឹងមាំខ្លាំងណាស់។ លោកបន្តថា៖ «នោះគឺជាមូលហេតុដែលខ្ញុំនិយាយថា មានតែក្រុមវិនិយោគិនលក់រាយតែប៉ុណ្ណោះ គឺគ្រប់គ្រាន់ក្នុងការគាំទ្រដល់ការធ្វើ IPO ទាំងមូល»។
យោងតាមលោក ចាន់ធឿន ការចុះបញ្ជីនេះត្រូវបានរំពឹងថា នឹងធ្វើឡើងនៅសប្ដាហ៍ក្រោយ ឬដើមសប្ដាហ៍បន្ទាប់។ អ្វីៗទាំងអស់វាអាស្រ័យលើការសម្រេចចិត្តរបស់ CSX។
ថ្លែងក្នុងពេលធ្វើទីផ្សារ IPO តាមអនឡាញកាលពីថ្ងៃទី ១៩ ខែកក្កដា លោក នាង វិធី នាយកគ្រប់គ្រងក្រុមហ៊ុន DBD បានឱ្យដឹងថា ក្រុមហ៊ុននេះត្រូវបង្កើតឡើងកាលពីឆ្នាំ ១៩៩៥ ដើម្បីផ្ដល់សេវាផ្គត់ផ្គង់ទឹកមានគុណភាព អគ្គិសនី និងម៉ាស៊ីនត្រជាក់ដល់មន្ទីរពេទ្យ និងលំនៅឋាន។
លោកឱ្យដឹងថា DBD បានទទួលការអនុម័តស្ថាពរសម្រាប់ IPO ពី SERC កាលពីថ្ងៃទី ២៤ ខែមិថុនា។ លោកបន្តថា ក្រុមហ៊ុននេះទទួលបានការបញ្ជាក់លើកដំបូងនៃ «កម្មវិធីឧត្តមភាព» ដែលរៀបចំឡើងដោយ SERC កាលពីឆ្នាំ ២០១៨។
លោកបញ្ជាក់ថា៖ «ខ្ញុំសង្ឃឹមថា ក្រុមហ៊ុន DBD នឹងទទួលបានការគាំទ្រពីក្រុមវិនិយោគិន ដែលនឹងអាចឱ្យក្រុមហ៊ុន DBD ទទួលបានជំហានប្រកបដោយជោគជ័យនៅលើផ្សារមូលបត្រកម្ពុជា និងពង្រីកសក្ដានុពលអាជីវកម្មរបស់ខ្លួន»៕ LA