ភ្នំពេញៈ គម្រោង «ជំរុញចលនាទេសចរណ៍ផ្ទៃក្នុង និងលើកកម្ពស់សកម្មភាពទេសចរណ៍ក្នុងសហគមន៍ទេសចរណ៍ក្នុងបរិបទវិបត្តិកូវីដ ១៩» នឹងត្រូវបានដាក់ឱ្យអនុវត្តសាកល្បងនៅសហគមន៍ទេសចរណ៍ចំនួន ៥ និងជាផ្នែកជំរុញឱ្យអាជីវកម្មក្នុងវិស័យទេសចរណ៍រស់ឡើងវិញ បន្ទាប់ពីទទួលរងគ្រោះពីវិបត្តិសុខភាព។
ក្រសួងទេសចរណ៍ និងអង្គភាពសហគ្រិនខ្មែរដែលស្ថិតនៅក្រោមក្រសួងសេដ្ឋកិច្ច និងហិរញ្ញវត្ថុបានចុះហត្ថលេខាលើកិច្ចសហប្រតិបត្តិការជំរុញកិច្ចការនេះ។
លោក ថោង រដ្ឋសក្តិ អគ្គនាយកនៃអគ្គនាយកដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិនៃក្រសួងទេសចរណ៍បានចុះហត្ថលេខាលើ MoU ជាមួយលោក ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ ដើម្បីរួមគ្នាជំរុញសកម្មភាពទេសចរណ៍ផ្ទៃក្នុងប្រទេស។
លោក ថោង រដ្ឋសក្តិ បានថ្លែងថា នៅជំហានដំបូងសហគមន៍ទេសចរណ៍ចំនួន ៥ នឹងត្រូវបានជ្រើសរើស ដើម្បីជួយអភិវឌ្ឍ និងបណ្ដុះបណ្ដាលទៅតាមស្ដង់ដា និងធនធានហិរញ្ញវត្ថុ។
សហគមន៍ទាំង ៥ នោះនៅខេត្តចំនួន ៤ គឺសហគមន៍អេកូទេសចរណ៍ទឹកជប់ខ្នារពោធិ៍ ក្នុងស្រុកសូទ្រនិគម និងសហគមន៍ទេសចរណ៍ចង្ក្រានរយ ក្នុងស្រុកវ៉ារិន (ខេត្តសៀមរាប) សហគមន៍ទេសចរណ៍ទឹកធ្លាក់អូរជាំ ក្នុងស្រុកសំឡូត (ខេត្តបាត់ដំបង) សហគមន៍ទេសចរណ៍រាំងខ្វាវ ក្នុងស្រុកភ្នំក្រវាញ (ខេត្តពោធិ៍សាត់) និងសហគមន៍ទេសចរណ៍ស្រែអំពិលក្នុងស្រុកទឹកផុស (ខេត្តកំពង់ឆ្នាំង)។
លោកថ្លែងថា៖ «មូលហេតុដែលក្រសួងទេសចរណ៍ និងសហគ្រិនខ្មែរសម្រេចជ្រើសរើសសហគមន៍ទេសចរណ៍ទាំង ៥ ដើម្បីជួយអភិវឌ្ឍ ព្រោះសហគមន៍ទាំងនោះមានសក្ដានុពលលើវិស័យទេសចរណ៍ពិសេសៗ ប្លែកៗពីគ្នា ហើយប្រជាសហគមន៍មានការខិតខំយ៉ាងខ្លាំងក្នុងការរៀបចំសហគមន៍របស់ពួកគេគ្រាន់តែកន្លងមកសហគមន៍ទាំងនោះមិនទាន់មានការជួយជ្រោមជ្រែងឱ្យបានខ្លាំងក្លាពីក្រសួងស្ថាប័នផ្សេងនៅឡើយ។ ម្យ៉ាងវិញទៀត សហគមន៍ទេសចរណ៍ទាំង ៥ នេះ ក៏ស័ក្តិសមបំផុតសម្រាប់ការទទួលភ្ញៀវទេសចរក្នុងបរិបទវិបត្តិកូវីដ ១៩ ផងដែរ»។
លោក ឈៀង វណ្ណមុនិណ្ឌ បាន កត់សម្គាល់ថា ក្រសួងទេសចរណ៍មានស្ដង់ដាច្បាស់លាស់ក្នុងការអភិវឌ្ឍសហគមន៍ ស្ដង់ដាបណ្ដុះបណ្ដាលនៃការទទួលភ្ញៀវទេសចរ ដូចនេះហើយទើបសហគ្រិនខ្មែរចង់ចូលរួមអភិវឌ្ឍនៅតាមសហគមន៍ជាមួយក្រសួងទេសចរណ៍ ដើម្បីបង្កើនភាពទាក់ទាញភ្ញៀវទេសចរពីគ្រប់មជ្ឈដ្ឋានឱ្យចូលទៅទស្សនាក្នុងសហគមន៍ទេសចរណ៍ទាំងនោះ សំដៅជួយឱ្យប្រជាសហគមន៍ទទួលបានប្រាក់ចំណូលកាន់តែល្អប្រសើរ។
លោកអះអាងថា៖ «ក្រៅពីការចូលរួមបម្រើសេវាកម្មទេសចរណ៍ប្រចាំថ្ងៃ សហគ្រិនខ្មែរចង់ឱ្យប្រជាសហគមន៍ទាំងនោះចេះបង្កើតមុខរបរអាជីវកម្មថ្មីៗសម្រាប់គ្រួសាររបស់ពួកគាត់ និងពង្រីកអាជីវកម្មដែលពួកគេមានស្រាប់ឱ្យរីកចម្រើនជាងមុន»។
លោកបន្តថា សហគ្រិនខ្មែរពិតជាចង់ជួយឱ្យសហគមន៍ទាំង ៥ នោះក្លាយជាសហគមន៍គំរូប្រចាំប្រទេសកម្ពុជា ដើម្បីឱ្យសហគមន៍ទេសចរណ៍ដទៃទៀតយកគំរូតាមសម្រាប់អភិវឌ្ឍសហគមន៍ឱ្យរីកចម្រើន៕LA