.jpg)
ផលិតផលគុយទាវ ប្រើប្រាស់រូបអង្គរវត្តកម្ពុជាដោយគ្មានការអនុញ្ញាត។ រូបថត សហការី
ភ្នំពេញៈ មន្ត្រីជាន់ខ្ពស់ក្រសួងពាណិជ្ជកម្មអះអាងថា អាជ្ញាធរកម្ពុជាកំពុងធ្វើការស៊ើបអង្កតទៅលើការប្រើប្រាស់អក្សរ ឬរូបសញ្ញាតំណាងកម្ពុជាលើផលិតផលដែលមិនមានការអនុញ្ញាតពីអាជ្ញាធរកម្ពុជា ដែលទង្វើនេះធ្វើឱ្យប៉ះពាល់កិត្តិនាម និងគុណភាពស្តង់ដាផលិតផលដែលមានការទទួលស្គាល់ត្រឹមត្រូវ។
ស្ថានទូតកម្ពុជាប្រចាំសហរដ្ឋអាមេរិកកាលពីទី ២៦ ខែសីហានេះបានសរសេរលិខិតមួយថា ថ្មីៗនេះស្ថានទូតបានរកឃើញការចែកចាយនៅលើទីផ្សារសហរដ្ឋអាមេរិកនូវផលិតផលគុយទាវក្រៀមកញ្ចប់ដែលមិនមែនជាផលិតផលរបស់កម្ពុជា ប៉ុន្តែនៅលើសម្បកវេចខ្ចប់មានការប្រើប្រាស់ស្លាកសញ្ញា «ផលិតផលគុយទាវភ្នំពេញ» និង «រូបសញ្ញាប្រាសាទអង្គរវត្ត» ដែលកំពុងត្រូវបានដាក់លក់នៅតាមបណ្តាផ្សារអាស៊ីក្នុងតំបន់ឆ្នេរភាគខាងកើតសហរដ្ឋអាមេរិក (East Coast)។
ការប្រើប្រាស់ពាក្យ និងម៉ាក «ផលិតផលគុយទាវភ្នំពេញ និងរូបសញ្ញាប្រាសាទអង្គរវត្ត» ដោយមិនមានការអនុញ្ញាតពីអាជ្ញាធរមានសមត្ថកិច្ចកម្ពុជា គឺបានរំលោភបំពានលើបទប្បញ្ញត្តិច្បាប់របស់កម្ពុជា កិច្ចព្រមព្រៀង និងសន្ធិសញ្ញាអន្តរជាតិ ពិសេសការប្រើប្រាស់ម៉ាកគុយទាវភ្នំពេញបានធ្វើឱ្យអ្នកប្រើប្រាស់ទូទៅមានការភាន់ច្រឡំអំពីប្រភពដើមនៃផលិតផលគុយទាវកញ្ចប់។
លិខិតបន្តថា ស្ថានទូតបានស្រាវជ្រាវកំណត់មុខសញ្ញាណ និងចាត់អនុព័ន្ធពាណិជ្ជកម្មអមស្ថានទូតចុះជួបណែនាំដល់ក្រុមហ៊ុននាំចូលផលិតផលទាំងនោះដល់ទីតាំងក្រុមហ៊ុន ព្រមទាំងបានចេញលិខិតជូនដំណឹងជាផ្លូវការ ទៅក្រុមហ៊ុនទាំងនោះឱ្យបញ្ឈប់ធ្វើការនាំចូល ឬដាក់លក់នូវផលិតផលបែបនេះបន្តទៀត។ ស្ថានទូតក៏នឹងដាក់ចេញនូវវិធានការបន្តក្នុងករណីក្រុមហ៊ុនមិនព្រមអនុវត្តតាមសេចក្តីជូនដំណឹង។
«គុយទាវភ្នំពេញ» ត្រូវក្រសួងពាណិជ្ជកម្មកម្ពុជាផ្តល់នូវ «ម៉ាកសមូហភាព» កាលពីឆ្នាំ ២០១៩។ «គុយទាវភ្នំពេញ» គឺជាយីហោដែលគ្រប់គ្រងដោយក្រុមហ៊ុន អាល់មិនគ្រុប។
ភ្នំពេញប៉ុស្តិ៍មិនអាចទាក់ទងលោក ស៊ាង ថៃ អ្នកនាំពាក្យក្រសួងពាណិជ្ជកម្ម បានទេកាលពីថ្ងៃអាទិត្យ ប៉ុន្តែកាលពីថ្ងៃទី ២៧ លោកប្រាប់គេហទំព័រ Freshnewsasia ថា ក្រសួងកំពុងធ្វើការស្រាវជ្រាវរកប្រភពដើមរបស់ផលិតផលគុយទាវក្រៀមនេះ ដើម្បីមានចំណាត់ការ ខណៈតាមការសន្និដ្ឋាន វាអាចមានប្រភពផលិតនៅប្រទេសវៀតណាម។ នៅពេលដឹងប្រភពច្បាស់លាស់ ក្រសួងនឹងចាត់វិធានការឱ្យក្រុមហ៊ុននេះបញ្ឈប់ជាបន្ទាន់។
លោកលើកឡើងថា៖ «ដោយសារនៅប្រទេសវៀតណាមគេបិទខ្ទប់ (ទប់ស្កាត់ការឆ្លងរាលដាលជំងឺកូវីដ-១៩) តំណាងពាណិជ្ជកម្មនៅមិនទាន់អាចចុះទៅស្រាវជ្រាវបានទេ។ បើច្បាស់ពីប្រភព យើងនឹងមានសំណើជាផ្លូវការឱ្យបញ្ឈប់ជាបន្ទាន់ ដូចដែលបានធ្វើកន្លងទៅ»។
យោងតាមលោក ស៊ាង ថៃ បញ្ហាបែបនេះបានកើតមានជាហូរហែមកហើយ ដោយកន្លងមកក្រសួងធ្លាប់សហការជាមួយក្រសួងការបរទេស និងសហប្រតិបត្តិការអន្តរជាតិ និងក្រសួងវប្បធម៌ និងវិចិត្រសិល្បៈ ចាត់វិធានការតាមរយៈការផ្ញើលិខិតទៅស្ថានទូតបរទេសសុំឱ្យគេណែនាំក្រុមហ៊ុនទាំងនោះបញ្ឈប់ជាបន្ទាន់នូវការប្រើប្រាស់រូបប្រាសាទអង្គរវត្ត ឬទង់ជាតិកម្ពុជា លើផលិតផលដែលមិនមានការអនុញ្ញាតពីអាជ្ញាធរកម្ពុជា។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ ភ្នំពេញ ប៉ុស្តិ៍ កាលពីថ្ងៃទី ២៩ ខែសីហាថា នេះជាការធ្វើឱ្យការប្រកួតប្រជែងមិនមានតម្លាភាព ព្រោះផលិតផលនោះមិនត្រូវបានការទទួលស្គាល់ជាផ្លូវការពីអាជ្ញាធរកម្ពុជា។ ទង្វើបែបនេះកំពុងបំផ្លាញកេរ្តិ៍ឈ្មោះផលិតផលពិត ដែលមានការចុះបញ្ជី និងមានគុណភាពស្តង់ដាអនាម័យច្បាស់លាស់។
លោកបញ្ជាក់ថា៖ «ទង្វើបែបនេះ (ការយកឈ្មោះ ឬនិមិត្តសញ្ញារបស់កម្ពុជាទៅដាក់លើផលិតផលគ្មានការអនុញ្ញាត) កម្ពុជាមិនអាចទទួលយកបានទេ។ បើគេចង់ប្រើឈ្មោះ ឬនិមិត្តសញ្ញាកម្ពុជា គេអាចមកវិនិយោគផ្ទាល់នៅកម្ពុជា ឬសុំច្បាប់អនុញ្ញាតប្រើប្រាស់បារ៍កូដពីអាជ្ញាធរកម្ពុជាតាមផ្លូវច្បាប់ជាការស្រេច»។
លោកបន្ថែមថា ក្នុងនាមសភាពាណិជ្ជកម្មលោកពិតជាជំរុញក៏ដូចជាចង់ឃើញផលិតផលដែលដាក់លក់លើទីផ្សារអន្តរជាតិទាំងអស់ ត្រូវតែមានបារ៍កូដត្រឹមត្រូវ ដើម្បីអាចឱ្យគេអាចស្កេនដឹងពីទីតាំងផលិត ឬកន្លែងវេចខ្ចប់ច្បាស់លាស់។
លោកលើកឡើងថា ក្រុមហ៊ុន ឬផលិតផលល្អ គឺត្រូវតែគោរពច្បាប់។ ជាក់ស្តែងថ្មីៗនេះក្រុមហ៊ុនលក់ទំនិញដ៏ធំរបស់អាមេរិក Amazon បានជួបពិភាក្សាជាមួយថ្នាក់ដឹកនាំសភាពាណិជ្ជកម្មកម្ពុជាដើម្បីនាំយកផលិតផលកម្ពុជាដែលមានលក្ខណៈស្តង់ដា និងការចុះបញ្ជីត្រឹមត្រូវយកទៅដាក់លក់នៅលើគេហទំព័ររបស់គេ។
កាលពីខែឧសភា ក្រសួងការបរទេស និងសហប្រតិបត្តិការអន្តរជាតិកម្ពុជា ក៏ធ្លាប់បានផ្ញើលិខិតទៅឯកអគ្គរាជទូតកម្ពុជាប្រចាំនៅប្រទេសឥណ្ឌា ដើម្បីឱ្យធ្វើការស្រាវជ្រាវ និងណែនាំក្រុមហ៊ុន Voyage India លើការប្រើប្រាស់ឈ្មោះអង្ករបរទេសដាក់លក់នៅតាមប្រព័ន្ធអនឡាញ ដោយមានរូបប្រាសាទអង្គរវត្ត និងប្រើឈ្មោះថា «Angkor Wat Thai Hom Mali Jasmine Rice»។ ទោះបីយ៉ាងណា បន្ទាប់ពីការតវ៉ាមួយរយៈខ្លី ក្រុមហ៊ុនមួយនេះក៏បានបញ្ឈប់សកម្មភាពរបស់ខ្លួនទៅវិញ៕ LA
