ភ្នំពេញៈ អាជីវករ និងធុរជនលើផលិតផលម្ហូប អាហារ និងភេសជ្ជៈ នឹងមានឱកាសក្នុងការចាប់យកទីផ្សារកូរ៉េខាងត្បូងនាអំឡុងពេលការតាំងពិព័រណ៍ផលិតផលកាហ្វេអន្តរជាតិនៅទីក្រុងសេអ៊ូលដែលនឹងប្រព្រឹត្តទៅចាប់ពីថ្ងៃទី ១០-១៣ ខែវិច្ឆិកា ឆ្នាំ ២០២១។
ក្រសួងពាណិជ្ជកម្មបានអំពាវនាវដល់វិស័យឯនជនឱ្យចូលរួមតាំងពិព័រណ៍ផលិតផលកាហ្វេអន្តរជាតិនៅទីក្រុងសេអ៊ូលដែលនឹងប្រព្រឹត្តទៅចាប់ពីថ្ងៃទី ១០-១៣ ខែវិច្ឆិកា ឆ្នាំ ២០២១ នៅសាធារណរដ្ឋកូរ៉េ។ នេះបើតាមសេចក្តីជូនដំណឹងរបស់ក្រសួងពាណិជ្ជកម្ម។
កម្មវិធីពិព័រណ៍គឺជាព្រឹត្តិការណ៍កម្រិតអន្តរជាតិដ៏ធំនៅអាស៊ី ដែលមជ្ឈមណ្ឌលអាស៊ាន-កូរ៉េសហការជាមួយស្ថានទូតនៃបណ្តាប្រទេសជាសមាជិកអាស៊ានប្រចាំនៅប្រទេសកូរ៉េខាងត្បូងនឹងរៀបចំពិព័រណ៍ពាណិជ្ជកម្មអាស៊ានឆ្នាំ ២០២១ (ASEAN Trade Fair 2021)។
សេចក្តីជូនដំណឹងបញ្ជាក់ថា៖ «ក្នុងឱកាសនេះ មជ្ឈមណ្ឌលអាស៊ាន-កូរ៉េ បានអញ្ជើញក្រុមហ៊ុនកម្ពុជា ដែលកំពុងធ្វើធុរកិច្ចលើផលិតផលម្ហូបអាហារ និងភេសជ្ជៈ រួមទាំងផលិតផលកាហ្វេ តែ និងបង្អែមចំនួន ៦ ក្រុមហ៊ុន/សហគ្រាស ដើម្បីចូលរួមក្នុងព្រឹត្តិការណ៍ពិព័រណ៍ខាងលើនេះពីចម្ងាយ តាមរយៈការផ្ញើផលិតផលទៅចូលរួមដាក់តាំងបង្ហាញក្នុងព្រឹត្តិការណ៍ពាណិជ្ជកម្មនេះ»។
ក្រសួងពាណិជ្ជកម្មបានបញ្ជាក់ទៀតថា៖ «ក្នុងនាមអ្នកសម្របសម្រួលជាមួយមជ្ឈមណ្ឌលអាស៊ាន-កូរ៉េ សូមអំពាវនាវដល់ពាណិជ្ជករ ផលិតករ និងសាធារណជនទូទៅដែលមានចំណាប់អារម្មណ៍ចង់ចូលរួមក្នុងព្រឹត្តិការណ៍ពិព័រណ៍ខាងលើ សូមបំពេញបែបបទចុះឈ្មោះចូលរួមដោយអត់គិតថ្លៃចាប់ពីកាលបរិច្ឆេទផ្សាយដំណឹងនេះរហូតដល់ថ្ងៃទី ៣ ខែកញ្ញា ឆ្នាំ ២០២១ ជាកំណត់»។
កាលពីថ្ងៃទី ៣ ខែកុម្ភៈឆ្នាំនេះ កម្ពុជា និងកូរ៉េខាងត្បូងបានបញ្ចប់ការចរចាកិច្ចព្រមព្រៀងពាណិជ្ជកម្មសេរី (FTA) ទ្វេភាគី ដែលលោក ប៉ាន សូរស័កិ្ត រដ្ឋមន្ដ្រីក្រសួងពាណិជ្ជកម្ម និងលោកស្រី Yoo Myung-hee ជាសមភាគីរបស់លោកគ្រោងនឹងចុះហត្ថលេខានៅចុងឆ្នាំនេះ ដែលកំណត់តម្លៃពន្ធនាំចូលសូន្យលើទំនិញជាច្រើនមុខ។
ទន្ទឹមនឹងនេះពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូងកាលពីឆមាសទី ១ ឆ្នាំ ២០២១ មានតម្លៃ ៤៥១,៩៨ លានដុល្លារ កើនឡើង ៦,៧ ភាគរយធៀបនឹង ៤២៣,៥១ លានដុល្លារ ក្នុងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យបានពីសមាគមពាណិជ្ជកម្មអន្តរជាតិកូរ៉េ ( Kita)។
ក្នុងអំឡុងពេលខែមករាដល់ខែមិថុនា កម្ពុជាបាននាំចេញទំនិញមានតម្លៃ ១៥៩,៤០ លានដុល្លារ ធ្លាក់ចុះ ១,៦ ភាគរយធៀបនឹង ១៦២,០៦ លានដុល្លារ ក្នុងរយៈពេលដូចគ្នាកាលពីឆ្នាំមុន និងនាំចូលមានតម្លៃ ២៩២,៥៩ លានដុល្លារ កើនឡើង ១១,៩ ភាគរយធៀបនឹង ២៦១,៤៥ លានដុល្លារធៀបនឹងរយៈពេលដូចគ្នាកាលពីឆ្នាំ ២០១៩។ ឱនភាពពាណិជ្ជកម្មកើនឡើង ៣៤,០ ភាគរយពី ៩៩,៣៩ លានដុល្លារ ដល់ ១៣៣,១៩ លានដុល្លារ។
Kita បានរាយការណ៍ថា កម្ពុជាភាគច្រើននាំចេញផលិតផលស្បែកជើង សម្លៀកបំពាក់ និងផលិតផលធ្វើដំណើរ ភេសជ្ជៈ គ្រឿងបង្គុំអគ្គិសនី និងអេឡិចត្រូនិក កៅស៊ូ ឱសថ និងផលិតផលកសិកម្ម ទៅប្រទេសកូរ៉េខាងត្បូង និងបាននាំចូលរថយន្ត គ្រឿងអេឡិចត្រូនិក ឧបករណ៍ផ្ទះបាយ ភេសជ្ជៈ ឱសថ បា្លស្ទិក និងផលិតផលសម្រេចជាច្រើនផ្សេងទៀត»៕LA