ភ្នំពេញៈ រដ្ឋាភិបាលតាមរយៈអគ្គនាយកដ្ឋានគយ និងរដ្ឋាករកម្ពុជា (អគរ) នឹងដាក់ដំណើរការនូវមុខងារគ្រប់គ្រងទូរស័ព្ទចល័ត និងឧបករណ៍ប្រើប្រាស់ស៊ីមកាតផ្សេងទៀតក្នុងគោលបំណង ដើម្បីពង្រឹងការប្រមូលចំណូលពន្ធអាករលើមុខទំនិញប្រភេទទូរស័ព្ទចល័តនាំចូលគ្រប់ប្រភេទ ស្របពេលការប្រើប្រាស់ឧបករណ៍ទាំងនេះកំពុងមានការកើនឡើងជាគំហុក។
យោងតាមសេចក្តីជូនដំណឹងរបស់ អគរ ស្តីពីការដាក់ឱ្យអនុវត្តមុខងារគ្រប់គ្រងទូរស័ព្ទចល័ត និងឧបករណ៍ប្រើប្រាស់ស៊ីមកាតផ្សេងទៀត អគរ នឹងចាប់ផ្តើមអនុវត្តពីថ្ងៃទី ១ ខែកញ្ញា ឆ្នាំ ២០២១ នេះតទៅ។
សេចក្តីជូនដំណឹងឱ្យដឹងថា៖ «អគរ សូមជម្រាបជូនសាធារណជនឱ្យបានជ្រាបថា ដើម្បីពង្រឹងប្រសិទ្ធភាពការប្រមូលចំណូលពន្ធអាករ លើទំនិញប្រភេទទូរស័ព្ទចល័តនាំចូលគ្រប់ប្រភេទ អគរ បានរៀបចំរួចរាល់នូវមុខងារគ្រប់គ្រងទូរស័ព្ទចល័ត និងឧបករណ៍ប្រើប្រាស់ស៊ីមកាតផ្សេងទៀតនៃប្រព័ន្ធអេឡិចត្រូនិកគយ ដែលមានមុខងារសំខាន់ក្នុងការកត់ត្រា និងគ្រប់គ្រងលេខអត្តសញ្ញាណឧបករណ៍អន្តរជាតិ (IMEI) នៃទូរស័ព្ទចល័ត និងឧបករណ៍ប្រើប្រាស់ស៊ីមកាតផ្សេងទៀត ដែលបាននាំចូលដោយបំពេញកាតព្វកិច្ចពន្ធ និងអាករតាមបទប្បញ្ញត្តិជាធរមាន»។
បើតាម អគរ នីតិវិធីលម្អិតនៃការអនុវត្តមុខងារនេះមាននៅក្នុង «សៀវភៅមគ្គុទេ្ទសក៍មុខងារគ្រប់គ្រងទូរស័ព្ទចល័ត និងឧបករណ៍ប្រើប្រាស់ស៊ីមកាតផ្សេងៗទៀត» ដែលអាចរកបានលើគេហទំព័រផ្លូវការ អគរ។
លោក ជា វ៉ាន់ដេត រដ្ឋមន្ដ្រីក្រសួងទូរគមនាគមន៍ និងប្រៃសណីយ៍ កាលពីថ្ងៃទី ១៦ ខែមីនា បានឱ្យដឹងថា ចំនួនអ្នកប្រើប្រាស់អ៊ីនធឺណិតបានកើនឡើងដល់ ១៥,៥ លាននាក់ដែលរួមទាំងអ្នកប្រើប្រាស់អ៊ីនធឺណិតចល័តផងដែរ។
ស្ថិតិចុងក្រោយពីនិយតករទូរគមនាគមន៍កម្ពុជាបង្ហាញថា ចំនួនការជាវទូរស័ព្ទចល័តក្នុងប្រតិបត្តិករទាំង ៦ នៅកម្ពុជាមាន ២០ ៤៨១ ០៥១ គិតត្រឹមចុងខែឧសភា ឆ្នាំ ២០២០ ធ្លាក់ ០,០៨ ភាគរយធៀបរយៈពេលដូចគ្នាឆ្នាំ ២០១៩។
ជាមួយគ្នានេះដែរ ចំនួនអ្នកប្រើប្រាស់អ៊ីនធឺណិតខ្សែ និងលើតុមានចំនួន ៥២ ៤៨០ ប៉ុណ្ណោះ គិតត្រឹមចុងខែឧសភា ធ្លាក់ចុះ ២១,៦២ ភាគរយធៀបរយៈពេលដូចគ្នាកាលពីឆ្នាំមុន។
ចំនួនអ្នកប្រើអ៊ីនធឺណិតចល័តនៅក្នុងក្រុមហ៊ុនផ្គត់ផ្គង់ទាំង ៧ របស់កម្ពុជាបានកត់ត្រាការធ្លាក់ចុះ ២,៣៦ ភាគរយមកនៅត្រឹម ១៤ ៨៦៣ ៤៣៥។ ចំណែកអ្នកប្រើអ៊ីនធឺណិតលើតុនៅក្នុងក្រុមហ៊ុនផ្គត់ផ្គង់ទាំង ៣៧ មាន ៣៣,០៧ ភាគរយកើន ២៤៩ ១៣២៕ LA
វីដេអូ៖