ទីក្រុងស៊ីដនីៈ ទិន្នន័យបង្ហាញនៅថ្ងៃពុធនេះថា សេដ្ឋកិច្ចរបស់ប្រទេសអូស្ត្រាលីរីកលូតលាស់ច្រើនជាងការព្យាករក្នុងត្រីមាសទី ២ ដែលបន្ធូរក្តីព្រួយបារម្ភថា ប្រទេសនេះអាចរងគ្រោះការធ្លាក់ចុះទ្វេដង ពេលដែលអូស្ត្រាលីប្រយុទ្ធនឹងរលកថ្មីនៃការឆ្លងកូវីដ ១៩ ដោយសារមានសន្ទុះឡើងវិញចំពោះតម្រូវការក្នុងស្រុក។
ទោះបីជាងយ៉ាងណា មានក្តីបារម្ភខ្លះៗដែរដែលថាប្រទេសនេះនឹងរងគ្រោះធ្លាក់ចុះក្នុងពេលថ្មីៗនេះ ដោយទីក្រុងសំខាន់ពីរជាប់គាំងក្នុងការបិទខ្ទប់ដោយអាចអាជ្ញាធរប្រឹងប្រែងទប់ស្កាត់ការផ្ទុះជំងឺចុងក្រោយ។
ការិយាល័យស្ថិតិអូស្ត្រាលី បានរាយការណ៍កំណើនសេដ្ឋកិច្ចចំនួន ០,៧ ភាគរយក្នុងត្រីមាសទី ២ (មេសា-មិថុនា) ពេលដែលការចំណាយតាមគ្រួសារ និងការចំណាយរបស់រដ្ឋាភិបាលហក់ឡើង។
ប្រៀបធៀបជាមួយពេលវេលាដូចគ្នាកាលពីឆ្នាំមុន សេដ្ឋកិច្ចរបស់ប្រទេសនេះកើនឡើង ៩,៦ ភាគរយដោយសារមូលដ្ឋានប្រៀបធៀបទាបខ្លាំង។
លោក Michael Smedes ប្រធានគណនេយ្យនៃការិយាល័យស្ថិតិ និយាយថា៖ «តម្រូវការក្នុងស្រុកបានជំរុញកំណើន ០,៧ ភាគរយនៅត្រីមាសនោះ ដែលមើលឃើញកំណើនបន្តជំរុញការចំណាយតាមគ្រួសារ ការវិនិយោគឯកជន និងការចំណាយពីផ្នែកសាធារណៈ»។
ប៉ុន្តែតួលេខនេះមិនបានរាប់បញ្ចូលផលប៉ះពាល់ពេញលេញនៃការបិទខ្ទប់ដែលអូសបន្លាយក្នុងទីក្រុងស៊ីដនី និងទីក្រុងមែលប៊ន ព្រមទាំងផ្នែកដទៃទៀតនៃប្រទេសដែលមានប្រជាជនច្រើនជាង ២៥ លាននាក់រស់នៅក្រោមការបទបញ្ជាឲ្យស្នាក់នៅក្នុងផ្ទះ។
ប្រទេសអូស្ត្រាលីបានទទួលរងគ្រោះពីការធ្លាក់ចុះលើកដំបូងរបស់ខ្លួនក្នុងរយៈពេលជិត ៣ ទសវត្សរ៍ ប៉ុន្តែបានងើបឡើងវិញខ្លាំងនៅចុងក្រោយ ពេលដែលការផ្ទុះឡើងស្ថិតនៅក្រោមការគ្រប់គ្រង ហើយបម្រាមទប់ស្កាត់ដោយសារវីរុសត្រូវបានលើកចេញ។
អាជ្ញាធរពេលនេះយល់ស្របលើផែនទីបង្ហាញផ្លូវឲ្យបើកប្រទេសឡើងវិញ ពេលដែលខ្លួនបានសម្រេចគោលដៅចាក់វ៉ាក់សាំងពី ៧០ ទៅ ៨០ ភាគរយ គឺនៅប្រហែលចុងឆ្នាំនេះ ដែលនឹងជំរុញសេដ្ឋកិច្ចជាថ្មីទៀត។
ប៉ុន្តែការមិនចុះសម្រុងគ្នារវាងអ្នកដឹកនាំនយោបាយចំពោះវិធីសាស្ត្រអាចរំខានដល់កិច្ចខិតខំប្រឹងប្រែងទាំងនោះ ជាមួយក្តីបារម្ភខ្លះអាចរាំងស្ទុះដល់ការដកចេញការរិតត្បិតនៅទូទាំងប្រទេស៕ RR