ភ្នំពេញៈ រដ្ឋាភិបាលកម្ពុជាតាមរយៈក្រសួងពាណិជ្ជកម្ម បានប្តេជ្ញានឹងជំរុញការលក់ផលិតផលខ្មែរដែលមានសក្តានុពលនៅក្នុង និងក្រៅប្រទេសឱ្យបានច្រើន ពិសេសក្នុងបរិបទនៃការរីករាលដាលជំងឺកូវីដ ១៩។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ដែលបានដឹកនាំកិច្ចប្រជុំលើកទី១ នៃក្រុមការងារដោះស្រាយបញ្ហាប្រឈម និងជំរុញការលក់ផលិតផលខ្មែរនៅក្នុងប្រទេស និងនាំចេញក្រៅប្រទេស កាលពីថ្ងៃទី ៣០ ខែសីហា បានលើកឡើងពីការខិតខំរបស់ក្រសួងពាណិជ្ជកម្មក្នុងកិច្ចការជំរុញចរាចរណ៍ផលិតសក្តានុពលរបស់កម្ពុជាទាំងលើទីផ្សារក្នុងស្រុក និងទីផ្សារក្រៅប្រទេស នាពេលកន្លងមក តាមរយៈការដាក់ចេញ និងចូលរួមអនុវត្តនូវគោលនយោបាយ និងយុទ្ធសាស្ត្រជាច្រើន។
លោកបានឱ្យដឹងទៀតថា ក្រសួងបាននិងកំពុងបន្តលើកកម្ពស់ភាពប្រកួតប្រជែងតាមរយៈការកសាងច្បាប់ និងបទដ្ឋានគតិយុត្ត ដែលក្នុងនោះមានច្បាប់ស្តីពីពាណិជ្ជកម្មតាមប្រព័ន្ធអេទ្បិចត្រូនិក ច្បាប់ស្តីពីកិច្ចការពារអ្នកប្រើប្រាស់ និងច្បាប់ស្តីពីការប្រកួតប្រជែងជាដើម ហើយក៏បានធ្វើកំណែទម្រង់ស្ថាប័ននៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ និងការបង្កើតក្រុមការងារជាសសរស្តម្ភស្ថិតក្រោមក្រសួងពាណិជ្ជកម្ម។
លោកបន្ថែមថា ជាមួយគ្នានេះក្រសួងក៏បានដាក់ដំណើរការគម្រោងឌីជីថល Go4Cam និង CambodiaTrade.com ដើម្បីតភ្ជាប់ទៅសហគ្រាសមីក្រូ តូច និងមធ្យម។ ពិសេសការចរចាបង្កើតទីផ្សារបន្ថែមតាមរយៈការបង្កើតកិច្ចព្រមព្រៀងពាណិជ្ជកម្មសេរីទ្វេភាគី និងតំបន់ដូចជា កិច្ចព្រមព្រៀងពាណិជ្ជកម្មភាពជាដៃគូគ្រប់ជ្រុងជ្រោយតំបន់ (RCEP) កិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) កម្ពុជា-កូរ៉េ (CKFTA) និងអាចឈានដល់កិច្ចព្រមព្រៀងពាណិជ្ជកម្មសេរីទ្វេភាគីមួយចំនួនទៀត។ លើសពីនេះ ក្រសួងក៏បានបន្តអនុវត្តយុទ្ធនាការលើកស្ទួយផលិតផលជាតិតាមរយៈការតាំងពិព័រណ៍ពាណិជ្ជកម្ម (តាមអនឡាញ) ដើម្បីជំរុញផលិតផលជាតិក្នុងអំទ្បុងពេលបិទខ្ទប់។
លោកថ្លែងថា៖ «តាមរយៈការបន្តអនុវត្តយន្តការខាងលើ ក្រសួងពាណិជ្ជកម្មបានបង្កើតក្រុមការងារនេះឡើង ដើម្បីចូលរួមដោះស្រាយបញ្ហាប្រឈមនានាឱ្យកាន់តែរលូន និងមានប្រសិទ្ធភាពខ្ពស់ សំដៅជំរុញការលក់ផលិតផលខ្មែរទាំងលើទីផ្សារក្នុងស្រុក និងការនាំចេញទៅក្រៅប្រទេសឱ្យបានកាន់តែទូលំទូលាយ»។
ក្រុមការងារដោះស្រាយបញ្ហាប្រឈម និងជំរុញការលក់ផលិតផលខ្មែរនៅក្នុងប្រទេស និងនាំចេញ បង្កើតឡើងក្នុងគោលបំណងចម្បងជួយប្រជាកសិករក្នុងការដាក់លក់ផលិតផលនៅលើទីផ្សារក្នុងស្រុក និងការនាំចេញទៅក្រៅប្រទេស និងជួយដល់អ្នកប្រើប្រាស់សំដៅធ្វើយ៉ាងណាឱ្យទទួលបានទំនិញប្រកបដោយគុណភាព និងក្នុងតម្លៃកាន់តែប្រសើរ ព្រមទាំងជួយដល់ក្រុមហ៊ុនធុរកិច្ច និងអាជីវកម្មនានា ដើម្បីអាចធ្វើពាណិជ្ជកម្មបានយ៉ាងរលូន និងមានភាពប្រកួតប្រជែង អនុលោមតាមច្បាប់ និងបទដ្ឋានគតិយុត្តជាធរមាន។
លោក លឹម ហេង អនុប្រធានសភាពាណិជ្ជកម្មកម្ពុជាបានកត់សម្គាល់ថា រដ្ឋាភិបាលកម្ពុជាតាមរយៈក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ បាននិងកំពុងអនុវត្តការគាំទ្រ និងជំរុញការនាំចេញផលិតផលក្នុងស្រុកទៅទីផ្សារអន្តរជាតិ ពិសេសផលិតផលកសិកម្ម។
លោកប្រាប់ភ្នំពេញ ប៉ុស្តិ៍ថា៖ «ដើម្បីជំរុញការនាំចេញផលិតផលខ្មែរនេះ វិស័យឯកជនត្រូវការចាំបាច់ក្នុងការសហការជាមួយក្រសួង ស្ថាប័នពាក់ព័ន្ធ ដើម្បីជួយសម្រួលបែបបទ បច្ចេកទេសវេចខ្ចប់ធ្វើយ៉ាងណាឱ្យកាន់តែល្អប្រសើរអាចប្រកួតប្រជែងបាន និងកុំឱ្យមានការរាំងស្ទះដល់វិស័យឯកជន ដែលនេះជាកិច្ចការមួយចំនួនដែលរដ្ឋាភិបាលតែងជួយកន្លងមក»។
លោកបន្ថែមថា សភាពាណិជ្ជកម្មដែលតំណាងឱ្យវិស័យឯកជនក៏បានរួមចំណែកជាមួយរដ្ឋាភិបាលក្នុងការជួយលើកស្ទួយការនាំចេញផលិតផលកម្ពុជាទៅក្រៅប្រទេសផងដែរ។
លោកប្រាប់ថា៖ «យើងបានចូលរួមផ្តល់ធាតុចូលដើម្បីកាត់បន្ថយថ្លៃដើមក្នុងវេទិការវាងវិស័យឯកជន-រដ្ឋដែលបានសម្រួលដល់ការធ្វើបែបបទ និងលិខិតសាធារណៈផ្សេងៗពាក់ព័ន្ធនឹងការនាំចេញ-នាំចូលទំនិញ ពិសេសផ្នែកពន្ធដារ និងផ្នែកពន្ធគយ ហើយយើងនៅតែបន្តជំរុញការទាក់ទាញវិនិយោគិនបន្ថែមទៀតមកវិនិយោគនៅកម្ពុជា»។
លោករដ្ឋមន្ត្រី ប៉ាន សូរស័ក្តិ បានអះអាងថា ដើម្បីពង្រឹងប្រសិទ្ធភាពលើកិច្ចការនេះ លោកបានណែនាំឱ្យក្រុមការងាររៀបចំកំណត់ទិសដៅសម្រាប់ការអនុវត្ត ដែលរួមមាន ក្រុមការងារតាមវិស័យនីមួយៗត្រូវបន្តសហការ និងគាំទ្រគ្នាដើម្បីអាចឱ្យការងារកាន់តែមានភាពប្រទាក់ក្រឡា និងបំពេញបន្ថែមគ្នាទៅវិញទៅមក៕ LA