ភ្នំពេញៈ អ្នកនាំពាក្យក្រសួងពាណិជ្ជកម្មបានប្រាប់ ភ្នំពេញ ប៉ុស្តិ៍ថា ក្រុមហ៊ុនដែលបានដាក់លក់ផលិតផលប្រើស្លាក «គុយទាវភ្នំពេញ» និងមានរូបអង្គរវត្តរបស់កម្ពុជាផងនោះ បានប្រមូលយកផលិតផលរបស់ខ្លួនត្រឡប់ទៅវិញ និងលែងដាក់លក់លើទីផ្សារនានានៅសហរដ្ឋអាមេរិកទៀតហើយ។
ស្ថានទូតកម្ពុជាប្រចាំសហរដ្ឋអាមេរិកកាលពីទី ២៦ សីហា ឆ្នាំ ២០២១ បានសរសេរក្នុងលិខិតមួយថា ថ្មីៗនេះស្ថានទូតបានរកឃើញការចែកចាយនៅលើទីផ្សារអាមេរិកនូវផលិតផលគុយទាវក្រៀមកញ្ចប់ ដែលមិនមែនជាផលិតផលរបស់កម្ពុជា ប៉ុន្តែនៅលើសម្បកវេចខ្ចប់មានការប្រើស្លាកសញ្ញា «ផលិតផលគុយទាវភ្នំពេញ និងរូបសញ្ញាប្រាសាទអង្គរវត្ត» ដែលកំពុងត្រូវបានដាក់លក់នៅតាមបណ្តាផ្សារអាស៊ីក្នុងតំបន់ឆ្នេរខាងកើតសហរដ្ឋអាមេរិក។
ការប្រើប្រាស់ពាក្យ និងម៉ាក «ផលិតផលគុយទាវភ្នំពេញ និងរូបសញ្ញាប្រាសាទអង្គរវត្ត» ដោយមិនមានការអនុញ្ញាតពីអាជ្ញាធរមានសមត្ថកិច្ចកម្ពុជា បានរំលោភបំពានលើបទប្បញ្ញត្តិច្បាប់របស់កម្ពុជា កិច្ចព្រមព្រៀង និងសន្ធិសញ្ញាអន្តរជាតិ ជាពិសេសការប្រើប្រាស់ម៉ាក គុយទាវភ្នំពេញ បានធ្វើឱ្យអ្នកប្រើប្រាស់ភាន់ច្រឡំអំពីប្រភពដើមនៃផលិតផលគុយទាវកញ្ចប់។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍ថា ក្រសួងពាណិជ្ជកម្មបានសហការជាមួយក្រសួងការបរទេស តាមរយៈស្ថានឯកអគ្គរាជទូតកម្ពុជា ប្រចាំសហរដ្ឋអាមេរិកបានចាត់ឱ្យតំណាងពាណិជ្ជកម្មនៅក្រៅប្រទេស ស្វែងរកប្រភព។
ក្រោយពីដឹងថា គុយទាវនេះមានលក់នៅលើទីផ្សារសហរដ្ឋអាមេរិក ក្រសួងពាណិជ្ជកម្មបានណែនាំឱ្យទីប្រឹក្សាពាណិជ្ជកម្មអមស្ថានទូតកម្ពុជានៅអាមេរិក ចាត់វិធានការ។ ជាបែបបទការងារ ទីប្រឹក្សាពាណិជ្ជកម្មបានរាយការណ៍ជូន និងសុំការអនុញ្ញាតពីលោកអគ្គរាជទូត ទៅធ្វើការនេះ ដោយបានជួបជាមួយអ្នកលក់ផ្ទាល់តែម្តង។
លោកថ្លែងថា៖ «យើងបានឱ្យតំណាងពាណិជ្ជកម្មរបស់យើងសុំការអនុញ្ញាតពីទូតរបស់យើងប្រចាំនៅអាមេរិកចុះទៅធ្វើការ និងបានរកឃើញនូវផលិតផលនោះប្រាកដមែន។ ទូតយើងក៏បានចេញលិខិតឱ្យអ្នកលក់បញ្ឈប់ជាបន្ទាន់»។
លោកបន្តថា៖ «ខាងក្រុមហ៊ុនទទួលយកសំណើរបស់យើងឈប់ដាក់លក់ និងបានប្រមូលមកវិញនូវទំនិញដែលមានស្លាកសញ្ញាកម្ពុជារបស់យើងដែលគេដាក់រូបអង្គរវត្ត ទង់ជាតិខ្មែរ និងអក្សរខ្មែរ។ កន្លងមកយើងបានសហការគ្នាធ្វើការងារនេះច្រើនដងមកហើយ ឥឡូវយើងក៏កំពុងតាមរកអ្នកផលិតផងដែរ»។
«គុយទាវភ្នំពេញ» ត្រូវបានក្រសួងពាណិជ្ជកម្មកម្ពុជាផ្តល់ឱ្យនូវ «ម៉ាកសមូហភាព» កាលពីឆ្នាំ ២០១៩។ «គុយទាវភ្នំពេញ» គឺជាយីហោគ្រប់គ្រងដោយក្រុមហ៊ុន អាល់មិនគ្រុប (Almon Group)៕ LA
វីដេអូ៖