ភ្នំពេញៈ ប្រធានសមាគមទីភ្នាក់ងារទេសចរណ៍កម្ពុជាបានអះអាងថា ល្បឿននៃយុទ្ធនាការចាក់វ៉ាក់សាំងប្រឆាំងកូវីដ ១៩ របស់រដ្ឋាភិបាលនឹងផ្តល់លទ្ធភាពខ្ពស់សម្រាប់កម្ពុជាក្នុងការបើកទ្វារទទួលស្វាគមន៍ភ្ញៀវអន្តរជាតិ ដែលចាក់វ៉ាក់សាំងគ្រប់ចំនួនដូស ស្របពេលដែលកម្ពុជាត្រៀមរៀបចំព្រឹត្តិការណ៍វេទិកាទេសចរណ៍អាស៊ាននៅដើមឆ្នាំ ២០២២។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានឱ្យដឹងថា រាជរដ្ឋាភិបាលបាននិងកំពុងជំរុញការចាក់វ៉ាក់សាំងបង្ការជំងឺកូវីដ ១៩ ជូនប្រជាជននៅទូទាំងប្រទេសក្នុងល្បឿនលឿន ដែលធ្វើឱ្យកម្ពុជាឈរនៅលំដាប់ថ្នាក់លេខ ២ បន្ទាប់ពីប្រទេសសិង្ហបុរី នៃយុទ្ធនាការចាក់វ៉ាក់សាំងនៅក្នុងចំណោមប្រទេសជាសមាជិកអាស៊ាន។
លោកស្រីបានប្រាប់ ភ្នំពេញ ប៉ុស្តិ៍ថា៖ «សម្រាប់ខ្ញុំ ការសិក្សាពីលទ្ធភាពទទួលភ្ញៀវទេសចរដែលចាក់វ៉ាក់សាំងកូវីដ ១៩ គ្រប់ដូស យើងគួរតែបើកដំណើរការវិស័យទេសចរណ៍ឡើងវិញ ស្របពេលដែលក្រសួងទេសចរណ៍ធ្លាប់បានប្រកាសទទួលរៀបចំវេទិកាទេសចរណ៍អាស៊ាន (ATF) ដែលនឹងប្រព្រឹត្តទៅនៅដើមខែមករា ឆ្នាំ ២០២២។ ដូច្នេះហេតុអ្វីយើងមិនបើកដំណើរការទទួលភ្ញៀវទេសចរអន្តរជាតិឱ្យបានមុនព្រឹត្តិការណ៍នេះ? ការធ្វើបែបនេះ គឺដើម្បីឱ្យមានសកម្មភាពផុលផុស និងឱ្យគេដឹងឮពីព្រឹត្តិការណ៍នេះ ក្នុងន័យទាក់ទាញភ្ញៀវទេសចរបរទេសឱ្យមកទស្សនាកម្ពុជា»។
លោកស្រីបានកត់សម្គាល់ថា ម្យ៉ាងទៀតនីតិវិធីរបស់ក្រសួងទេសចរណ៍ក្នុងការទទួលទេសចរក៏មានការប្រុងប្រយ័ត្នរួចទៅហើយ គឺទទួលតែភ្ញៀវដែលចាក់វ៉ាក់សាំងរួច ហើយការទទួលភ្ញៀវទេសចរនោះគឺធ្វើឡើងតាមរយៈទីភ្នាក់ងារទេសចរណ៍តែប៉ុណ្ណោះ (ទិញកញ្ចប់សេវាកម្មទេសចរណ៍) ដែលនេះ គឺជាការគ្រប់គ្រងបានល្អ ដើម្បីធានាសុវត្ថិភាព។
លោកស្រីបញ្ជាក់ថា៖ «យើងខ្ញុំជាវិស័យឯកជនក៏មានការប្តេជ្ញាចិត្តខ្ពស់ក្នុងការជួយគ្រប់គ្រងភ្ញៀវទេសចរឱ្យអស់ពីលទ្ធភាពរហូតដល់ពួកគេចាកចេញពីប្រទេសកម្ពុជាវិញ។ យើងជឿជាក់ថា ការបើកទទួលភ្ញៀវទេសចរឡើងវិញនេះនឹងជួយស្តារវិស័យទេសចរណ៍កម្ពុជាឡើងវិញបានឆាប់ ហើយយើងក៏មិនអាចពន្យារពេលទៀតដែរ ព្រោះអាជីវកម្មទាំងអស់បានជាប់គាំងជិត ២ ឆ្នាំហើយ»។
លោកស្រីបន្តថា កម្ពុជាគួរតែប្រកាសបើកវិស័យទេសចរណ៍ឱ្យបានមុនគេ ដើម្បីភ្ញៀវទេសចរនៅតំបន់អឺរ៉ុបត្រៀមខ្លួនជាមុនក្នុងការរៀបចំផែនការដំណើរកម្សាន្តរបស់ពួកគេ។
លោកស្រីយល់ថា៖ «នេះគឺជាឱកាសរបស់កម្ពុជាក្នុងការធ្វើឱ្យខ្លួនក្លាយទៅជាគោលដៅទេសចរណ៍ចម្បង ដោយមិនពឹងផ្អែកលើប្រទេសជិតខាង ពិសេសប្រទេសថៃដែលកម្ពុជាកន្លងមកគ្រាន់តែជាទិសដៅទេសចរណ៍បន្ថែមប៉ុណ្ណោះ»។
លោក តុប សុភ័ក្រ អ្នកនាំពាក្យក្រសួងទេសចរណ៍បានប្រាប់ ភ្នំពេញ ប៉ុស្តិ៍ នៅថ្ងៃទី ១ ខែកញ្ញា ថា៖ «ក្រសួងទេសចរណ៍កំពុងខិតខំប្រឹងប្រែងធ្វើការលើរឿងនេះ ដែលគម្រោងនេះអាចនឹងចាប់ផ្តើមនៅចុងឆ្នាំ គឺក្នុងអំឡុងខែវិច្ឆិកា ឬខែធ្នូ ខាងមុខ។ ទោះយ៉ាងណាពេលវេលាជាក់លាក់ ឬក៏ការបើកទទួលទេសចរជាទម្រង់បែបណា គឺមិនទាន់អាចបញ្ជាក់បានលម្អិតនោះទេ សូមរង់ចាំបន្តិចសិន»។
ជាមួយគ្នានេះដែរ លោកស្រី ស៊ីវលីន លើកឡើងថា ប្រសិនបើបន្តពន្យារពេលទៀត កម្ពុជានឹងរៀបចំខ្លួនមិនទាន់ ពីព្រោះប្រតិបត្តិករទេសចរណ៍ និងអាជីវករត្រូវការពេលវេលាក្នុងការប្រមូលបុគ្គលិកជំនាញមកវិញ បន្ទាប់ពីបោះបង់ដោយសារតែវិបត្តិកូវីដ ១៩។
លោកស្រីអះអាងថា៖ «បើយើងរង់ចាំ ប្រទេសផ្សេងៗគេក៏រួចរាល់ដែរ។ យើងនឹងជួបការលំបាកក្នុងការឈរជាជួរ ដើម្បីបំពងសំឡេង ដែលសំឡេងយើងតិចមែនទែន ហើយការចំណាយរបស់យើងក៏មិនមានលទ្ធភាពដូចប្រទេសផ្សេងៗដែលគេមានការរីកចម្រើនរួចមកហើយ ដូចនេះបើយើងមិនចាប់យកឱកាសនេះ យើងនឹងគ្មានឱកាសទៀតឡើយ។ យើងគួរតែធ្វើឡើងនៅក្នុងចន្លោះពីខែតុលាទៅវិច្ឆិកា ព្រោះជាពេលវេលាដ៏ល្អដែលយើងតែងតែទទួលបានភ្ញៀវទេសចរច្រើនចាប់ពីខែតុលា ឡើងទៅ»។
ក្នុងឆមាសទី១ ឆ្នាំ ២០២១ កម្ពុជាទទួលបានភ្ញៀវទេសចរអន្តរជាតិចំនួន ១០២ ៥៦០ នាក់ ថយចុះ ៩១,៣ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យក្រសួងទេសចរណ៍៕ LA