.jpg)
ទិដ្ឋភាពកន្លែងធ្វើការងាររបស់ផ្នែកនិពន្ធរបស់ក្រុមហ៊ុនប្រព័ន្ធផ្សព្វផ្សាយ Clarin នៅទីក្រុងប៊ុយណូស៊ែ ប្រទេសអាហ្សង់ទីនកាលពីខែមករាឆ្នាំ ២០២១។ AFP
ទីក្រុងប៊ុយណូស៊ែៈ ក្រុមហ៊ុនបណ្តាសង្គមដ៏ធំរបស់អាមេរិក Facebook និងវិនិយោគទឹកប្រាក់ ១,៥ លានដុល្លារ ក្នុងប្រព័ន្ធផ្សព្វផ្សាយរបស់អាហ្សង់ទីន ដើម្បីបណ្តុះបណ្តាលអ្នកសារព័ត៌មាន និងលើកកម្ពស់ការអភិវឌ្ឍអនឡាញ ដែលជាលើកដំបូងក្នុងអាមេរិកឡាទីន។
កិច្ចព្រមព្រៀងដែលបានចុះហត្ថលេខាកាលពីសប្តាហ៍មុនជាមួយស្ថាប័នព័ត៌មាន ១៥០ អង្គភាពនឹងអនុញ្ញាតឲ្យអ្នកសារព័ត៌មាន ៣ ០០០ នាក់ចូលរួមបណ្តុះបណ្តាល ខណៈដែលជួយក្រុមហ៊ុនហ្វេសប៊ុកអភិវឌ្ឍកិច្ចព្រមព្រៀងពាណិជ្ជកម្មផងដែរ។
វាជាផ្នែកមួយនៃ «គម្រោងសារព័ត៌មានហ្វេសប៊ុក» ដែលទាក់ទិនកិច្ចសហប្រតិបត្តិការជាមួយក្រុមហ៊ុនផ្សព្វផ្សាយនៅទូទាំងពិភពលោក។
លោក Julieta Shamma ប្រធានដៃគូប្រព័ន្ធផ្សព្វផ្សាយយុទ្ធសាស្ត្ររបស់ក្រុមហ៊ុនហ្វេសប៊ុកក្នុងអាមេរិកឡាទីន បាននិយាយថា ការវិនិយោគក្នុងប្រទេសអាហ្សង់ទីនរយៈពេល ៣ ឆ្នាំមានបំណង «គាំទ្រក្រុមហ៊ុនប្រព័ន្ធផ្សព្វផ្សាយ ១៥០ ពីគ្រប់ទំហំ និងតំបន់ក្នុងប្រទេសនេះ»។
កិច្ចព្រមព្រៀងនោះជាប់ទាក់ទងការប្តេជ្ញាចិត្តផ្នែកពាណិជ្ជកម្មជាមួយក្រុមហ៊ុនប្រព័ន្ធផ្សព្វផ្សាយអាហ្សង់ទីនប្រហែល ៣០ រួមទាំង ក្រុមហ៊ុន Clarin, La Nacion, Pagina12 និង Infobae ដើម្បីទាក់ទាញតំណភ្ជាប់ (links) កាន់តែច្រើនទៅកាន់ទំរង់កម្មវិធីរបស់ហ្វេកប៊ុក។
លោក Shamma បាននិយាយថា៖ «យើងកំពុងសហប្រតិបត្តិការជាមួយក្រុមហ៊ុនប្រព័ន្ធផ្សព្វផ្សាយ ដើម្បីសាកល្បងទំរង់ប្លែកៗគ្នានៃការជួយប្រជាជនស្វែងរកព័ត៌មាននៅលើហ្វេសប៊ុក និងភ្ជាប់ទំនាក់ទំនងជាមួយពួកគេ»។
ក្រុមហ៊ុនហ្វេសប៊ុកនឹងផ្តល់វគ្កបណ្តុះបណ្តាលដោយផ្តោតលើប្រធានបទផ្សេងៗ ដូចជា ការអភិវឌ្ឍផលិតផល ការដកពិសោធន៍លើទំរង់ផ្សេងៗគ្នា និង ការប្រើប្រាស់ស្ថិតិ ព្រមទាំងប្រធានបទផ្សេងៗទៀត។
លោក Shamma និយាយថា៖ «យើងជឿថាបរិវត្តកម្មឌីជីថលនឹងបង្កើតឱកាសថ្មីសម្រាប់អេកូស៊ីស្តែមព័ត៌មាន ដោយផ្តល់ឲ្យនូវលទ្ធភាពផ្សេងៗ ដើម្បីពង្រីកអតិថិជនតាមរយៈទំរង់បណ្តាញសង្គម និងអន្តរទំនាកទំនង និងរកប្រាក់ពីមាតិកា»។
ក្រុមហ៊ុនហ្វេសប៊ុកបានវិនិយោគរួចរាល់នូវទឹកប្រាក់ ៦០០ លានដុល្លារនៅទូទាំងពិភពលោកចាប់តាំងពីឆ្នាំ ២០១៨ ដើម្បីគាំទ្រការអភិវឌ្ឍឌីជីថលក្នុងឧស្សាហកម្មព័ត៌មាន ។ ក្រុមហ៊ុនមានគម្រោងវិនិយោគទឹកប្រាក់ ១ ពាន់លានដុល្លារទៀតក្នុងរយៈពេល ៣ ឆ្នាំខាងមុខ៕ RR
