.jpg)
អគារស្នាក់ការគណៈកម្មការមូលបត្រ (SEC) អាមេរិកនៅទីក្រុងវ៉ាស៊ីតោន។ AFP
ទីក្រុងញូវយ៉កៈ អ្នកឃ្លាំមើលទីផ្សារអាមេរិកនៅថ្ងៃពុធបានប្តឹងក្រុមហ៊ុនផ្តល់ប្រាក់កម្ចីរូបិយប័ណ្ណអេឡិចត្រូនិកតាមអនឡាញ និងនាយកប្រតិបត្តិកំពូលរបស់ក្រុមហ៊ុននោះ ជុំវិញការចោទប្រកាន់ពីបទបន្លំបង្កើនប្រាក់វិនិយោគចំនួន ២ ពាន់លានដុល្លារ។
សេចក្តីថ្លែងការណ៍របស់ SEC បាននិយាយថា គណៈកម្មការមូលបត្រ (SEC) បានចោទប្រកាន់ក្រុមហ៊ុន BitConnect ស្ថាបនិកក្រុមហ៊ុនលោក Satish Kumbhani អ្នកផ្សព្វផ្សាយជាន់ខ្ពស់នៅទីផ្សារអាមេរិក Glenn Arcaro និងក្រុមហ៊ុនរបស់គាត់ដោយផ្តល់ជូននូវការក្លែងបន្លំ និងគ្មានការចុះបញ្ជី និងការលក់មូលបត្រក្នុងទម្រង់នៃការវិនិយោគនៅក្នុងកម្មវិធីផ្តល់ប្រាក់កម្ចី។
ពាក្យបណ្តឹងនេះនិយាយថា ភាគីចុងចោទបានអះអាងថា ការជួញដូរសូហ្វវែរដែលមានកម្មសិទ្ធិរបស់ក្រុមហ៊ុននឹងបង្កើតប្រាក់ចំណេញខ្ពស់ហួសពីការរំពឹងទុករបស់វិនិយោគិន។
ប៉ុន្តែគណៈកម្មការមូលបត្របានចោទប្រកាន់ថាតាមពិតមូលនិធិរបស់វិនិយោគិនត្រូវបានគេបញ្ចូនចេញហើយផ្ទេរទៅក្នុងកាបូបប្រាក់ឌីជីថលដែលគ្រប់គ្រងដោយចុងចោទ។
ដើម្បីទាក់ទាញវិនិយោគិន SEC បានចោទប្រកាន់ ក្រុមហ៊ុន BitConnect និង Kumbhani ដែលជាជនជាតិឥណ្ឌា បានបង្កើតបណ្តាញអ្នកផ្សព្វផ្សាយដែលត្រូវបានទូទាត់តាមកម្រៃជើងសារដែលជាផ្នែកមួយដែលពួកគេលាក់បាំងពីវិនិយោគិន។
លោក Arcaro ដែលជាអ្នកផ្សព្វផ្សាយឈានមុខគេនៃកម្មវិធីផ្តល់ប្រាក់កម្ចីនៅសហរដ្ឋអាមេរិកត្រូវបានគេចោទប្រកាន់ថា បានបង្កើតក្រុមហ៊ុន « Future Money » ដើម្បីទាក់ទាញអ្នកវិនិយោគ។
លោកស្រី Lara Shalov Mehraban នាយករងប្រចាំតំបន់នៃការិយាល័យរបស់ SEC ប្រចាំទីក្រុងញូវយ៉កបាននិយាយនៅក្នុងសេចក្តីថ្លែងការណ៍ថា៖ «យើងចោទប្រកាន់ថាចុងចោទទាំងនេះបានលួចប្រាក់រាប់ពាន់លានដុល្លារពីវិនិយោគិនលក់រាយនៅជុំវិញពិភពលោកដោយទាញយកផលប្រយោជន៍ពីទ្រព្យសម្បត្តិឌីជីថល»។
អ្នកដែលត្រូវចោទត្រូវបានចោទប្រកាន់ពីបទរំលោភបំពានច្បាប់ប្រឆាំងការលួចបន្លំ និងច្បាប់ស្តីពីការចុះបញ្ជីសហព័ន្ធហើយអាចប្រឈមមុខនឹង «ការបន្ធូរបន្ថយទោសដោយគ្មានការរើសអើង បូកការប្រាក់ និងពិន័យតាមរដ្ឋប្បវេណី»។
SEC បានដាក់ពាក្យបណ្តឹងពាក់ព័ន្ធរដ្ឋប្បវេណីកាលពីខែឧសភាប្រឆាំងនឹងអ្នកផ្សព្វផ្សាយ ក្រុមហ៊ុន BitConnect ប្រាំនាក់ផ្សេងទៀត ហើយបានដោះស្រាយជាមួយចុងចោទពីរនាក់។
យោងតាមក្រសួងយុត្តិធម៌អាមេរិក លោក Arcaro នៅថ្ងៃពុធបានសារភាពកំហុសចំពោះការចោទប្រកាន់ពីបទព្រហ្មទណ្ឌក្នុងបណ្តឹងស្របគ្នា៕ RR
