.jpg)
ទិដ្ឋភាពភ្ញៀវទេសចរទៅកម្សាន្តនៅឆ្នេរសមុទ្រ ខេត្តកែប។ ហុង មិនា
ភ្នំពេញៈ កំពង់ផែសេះស ក្នុងខេត្តកែប ដែលមានតម្លៃជិត ២ លានដុល្លារ ត្រូវបានរដ្ឋាភិបាលអនុញ្ញាតឱ្យចាប់ផ្តើមធ្វើការសាងសង់នាពាក់កណ្តាលខែកញ្ញានេះ ក្នុងគោលបំណងដើម្បីបម្រើដល់វិស័យដឹកជញ្ជូន និងវិស័យទេសចរណ៍តំបន់ឆ្នេរ។
សេចក្តីប្រកាសព័ត៌មានរបស់រដ្ឋបាលខេត្តកែបកាលពីថ្ងៃទី ១ កញ្ញា ឱ្យដឹងថា រដ្ឋបាលខេត្តកែបនឹងដាក់ឱ្យដំណើរការការអនុវត្តគម្រោងវិនិយោគសាងសង់ចំណតជលយាន (កំពង់ផែសេះស) ចាប់ពីថ្ងៃទី ១៥ ខែ កញ្ញា ឆ្នាំ ២០២១ តទៅ។
សេចក្តីប្រកាសព័ត៌មានបន្តថា ការអនុវត្តគម្រោងវិនិយោគនេះក្នុងគោលបំណង ដើម្បីចូលរួមអភិវឌ្ឍសេដ្ឋកិច្ចជាតិ បង្កើតឱកាសការងារ លើកកម្ពស់កម្រិតជីវភាពរស់នៅប្រចាំថ្ងៃ និងកាត់បន្ថយភាពក្រីក្ររបស់ប្រជាពលរដ្ឋនៅក្នុងខេត្តកែប។
លោក វ៉ោ សុខា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកែប បានប្រាប់ ភ្នំពេញ ប៉ុស្តិ៍ថា ទីតាំងសាងសង់កំពង់ផែសេះស ស្ថិតក្នុងសង្កាត់អូរក្រសារ ក្រុងកែប ខេត្តកែប នៅលើផ្ទៃដី ៨ ហិកតា។
លោកបន្តថា គម្រោងនេះស្ថិតក្នុងគម្រោងសាងសង់ ប្រតិបត្តិការ និងផ្ទេរ (BOT) រយៈពេល ១៥ ឆ្នាំវិនិយោគដោយវិស័យឯកជន។ លោកប្រាប់ថា៖ «កំពង់ផែនេះនឹងជួយសម្រួលដល់ការដឹកជញ្ជូនទំនិញ និងកសិផលរវាងខេត្តកែប និងកំពត ពិសេសដឹកវត្ថុធាតុដើមបម្រើឱ្យរោងចក្រនានានៅក្នុងខេត្តកំពត»។
បើតាមលិខិតរបស់ក្រសួងសេដ្ឋកិច្ច និងហិរញ្ញវត្ថុចុះថ្ងៃទី ១៥ ខែ កុម្ភៈ ឆ្នាំ ២០២១ គម្រោងនេះត្រូវចំណាយទុនវិនិយោគចំនួន ១ ៩៥០ ៥៦០ ដុល្លារ ហើយអនុញ្ញាតឱ្យរំលស់ទុនមកវិញតាមរយៈការធ្វើអាជីវកម្មភាស៊ីចំណតជលយាន (កំពង់ផែសេះស) ក្នុងរយៈពេល ១៥ ឆ្នាំចប់ និងបន្ត ១៥ ឆ្នាំទៀតគិតចាប់ពីចំណតជលយានបានសាងសង់រួច និងសម្ពោធដាក់ឱ្យប្រើប្រាស់ជាផ្លូវការនៅឆ្នាំ ២០២៣។
ក្រសួងនេះបានឱ្យដឹងទៀតថា ត្រូវបង់ចំណូលថវិកាឱ្យខេត្តក្នុង ១ ឆ្នាំចំនួន ១១ លានរៀល និងត្រូវបង្កើន ៥ ភាគរយរៀងរាល់ ៥ ឆ្នាំម្តង ព្រមទាំងបង់ពន្ធតាមការកំណត់នៃច្បាប់ជាធរមាន។ នៅពេលចប់អាណតិ្តកិច្ចសន្យា អ្នកវិនិយោគត្រូវប្រគល់ទីតាំងចំណតជលយាន និងសំណង់ទាំងអស់ជូនរដ្ឋគ្រប់គ្រងទុកជាសម្បត្តិរដ្ឋដោយគ្មានលក្ខខណ្ឌអ្វីឡើយ។
ប្រធានមន្ទីរទេសចរណ៍ខេត្តកែប លោក សោម ចិន្តា បានស្វាគមន៍ចំពោះគម្រោងនេះ ហើយបានចាត់ទុកថា ជាការខិតខំរបស់អាជ្ញាធរក្នុងការអភិវឌ្ឍខេត្តកែប ដើម្បីបម្រើឱ្យវិស័យទេសចរណ៍។ លោកបានលើកឡើងថា កំពងផែសេះសនឹងរួមចំណែកកាន់តែខ្លាំងលើសកម្មភាពទេសចរណ៍របស់ខេត្តកែប ដែលជាខេត្តសក្តានុពលឆ្នេរសមុទ្ររបស់កម្ពុជា ដោយមានកោះចំនួន ១២ និងថ្មប៉ប្រះទឹក ១ សម្រាប់បម្រើឱ្យវិស័យទេសចរណ៍។
លោកបន្ថែមថា៖ «ចំណតនេះមិនមែនសម្រាប់តែជាកំពង់ផែទំនិញនោះទេ ប៉ុន្តែវាក៏សម្រាប់ជាកំពង់ផែបម្រើឱ្យវិស័យទេសចរណ៍ ដើម្បីសម្រួលដល់សកម្មភាពដឹកជញ្ជូនទំនិញ និងកសិផលចេញចូលខេត្តកែប ហើយក៏សម្រួលដល់ការចូលចតរបស់សហគមន៍នេសាទផងដែរ»។
រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល ធ្លាប់បានលើកឡើងថា កំពង់ផែមានតួនាទីសំខាន់ណាស់ក្នុងការជំរុញសកម្មភាពពាណិជ្ជកម្មគ្រប់ប្រភេទនៅក្នុងដំណើរការអភិវឌ្ឍន៍សេដ្ឋកិច្ចជាតិ តំបន់ និងអន្តរជាតិ។
កម្ពុជាមានកំពង់ផែសរុប ១០៥ កន្លែងក្នុងនោះកំពង់ផែទន្លេ ៧៨ និងកំពង់ផែសមុទ្រ ២៧ កន្លែង។ នេះបើតាមលោក ស៊ុន ចាន់ថុល៕ LA
