.jpg)
ច្រកទ្វារព្រំដែនកម្ពុជា-វៀតណាម បាវិត កាលពីខែកក្កដា ឆ្នាំ ២០២០។ ហ៊ាន រង្សី
ភ្នំពេញៈ ទំហំពាណិជ្ជកម្មទ្វេភាគីកម្ពុជា និងវៀតណាមក្នុងរយៈពេល ៧ ខែដើមឆ្នាំ ២០២១ មានតម្លៃជាង ៦ ពាន់លានដុល្លារ កើនជាង ១០០ ភាគរយបើធៀបនឹងរយៈពេលដូចគ្នាឆ្នាំមុន បើទោះបីប្រទេសទាំង ២ កំពុងប្រយុទ្ធប្រឆាំងនឹងការរីករាលដាលនៃជំងឺកូវីដ ១៩ បំប្លែងថ្មីក៏ដោយ។
យោងតាមទិន្នន័យស្ថានទូតប្រទេសវៀតណាមប្រចាំកម្ពុជា ដែលបង្ហោះនៅលើទំព័រហ្វេសប៊ុកផ្លូវការរបស់ខ្លួនកាលពីថ្ងៃទី ១ ខែកញ្ញា បានឱ្យដឹងថា វៀតណាម និងកម្ពុជា គឺជាដៃគូដែលអាចទុកចិត្តបានក្នុងការលើកកម្ពស់កិច្ចសហប្រតិបត្តិការដោយឈរលើមូលដ្ឋានសមភាព ប្រសិទ្ធភាព និងផលប្រយោជន៍ទៅវិញទៅមក ដើម្បីការអភិវឌ្ឍប្រកបដោយចីរភាពសម្រាប់ប្រជាជនប្រទេសទាំង ២។
ស្ថានទូតវៀតណាមបានបន្តទៀតថា ក្នុងរយៈពេល ៧ ខែដើមឆ្នាំ ២០២១ ទំហំពាណិជ្ជកម្មរវាងប្រទេសទាំង ២ សម្រេចបាន ៦ ០៣៤ លានដុល្លារកើន ១០៦ ភាគរយ បើធៀបនឹងរយៈពេលដូចគ្នាឆ្នាំ ២០២០។ ក្នុងនោះទំនិញវៀតណាមនាំមកកម្ពុជាមានតម្លៃ ២ ៧៧៣ លានដុល្លារ កើនឡើង ១៨,៣ ភាគរយ ខណៈទំនិញកម្ពុជានាំទៅវៀតណាមវិញមានតម្លៃ ៣ ២៦១ លានដុល្លារ កើនឡើង ៤៥២ ភាគរយធៀបនឹងរយៈពេលដូចគ្នាកាលពីឆ្នាំមុន។
ស្ថានទូតវៀតណាមលើកឡើងថា៖ «សកម្មភាពវិនិយោគរបស់សហគ្រាសវៀតណាមនៅកម្ពុជាមិនត្រឹមតែជោគជ័យក្នុងអាជីវកម្មប៉ុណ្ណោះទេ ប៉ុន្តែពួកគេថែមទាំងរួមចំណែកដល់ ការអភិវឌ្ឍសេដ្ឋកិច្ច និងសង្គមកម្ពុជាដែលត្រូវបានថ្នាក់ដឹកនាំ និងប្រជាជនកម្ពុជាកោតសរសើរយ៉ាងខ្លាំង»។
អនុប្រធានសភាពាណិជ្ជកម្មកម្ពុជា លោក លឹម ហេង ប្រាប់ថា នេះជាសញ្ញាល្អដែលការនាំចេញរបស់កម្ពុជាទៅប្រទេសជិតខាងបានកើនឡើងគួរឱ្យកត់សម្គាល់។ លោកបន្តថា ប្រទេសវៀតណាម ភាគច្រើនទទួលទិញកសិផលពីប្រទេសកម្ពុជា មានដូចជាស្រូវ កៅស៊ូ ល្ង ពោត សណ្តែក និងស្វាយចន្ទី ជាដើម។ រីឯវៀតណាមនាំមកកម្ពុជាមាន ដែកថែប ប្រេង បន្លែ ផ្លែឈើ និងជីកសិកម្ម។
លោកនិយាយថា៖ «ខ្ញុំគិតថា ផលិតផលកសិកម្មកម្ពុជា បើអត់មានទីផ្សាររបស់ប្រទេសជិតខាង យើងនឹងកកកុញនៅក្នុងទីផ្សារក្នុងស្រុក»។
បើតាមស្ថានទូតវៀតណាម គិតមកដល់ពេលនេះ វៀតណាមមានគម្រោងវិនិយោគចំនួន ១៨៨ នៅកម្ពុជាដោយមានទុនវិនិយោគប្រមាណ ២,៨៥ ពាន់លានដុល្លារ ឈរនៅលេខ ២ ក្នុងចំណោមប្រទេស/តំបន់ចំនួន ៧៨ ដែលវៀតណាមបានវិនិយោគនៅបរទេស។
ដោយឡែកសម្រាប់កម្ពុជាវិញមានគម្រោងវិនិយោគចំនួន ២៨ នៅក្នុងប្រទេសវៀតណាម ដោយមានទុនវិនិយោគចុះបញ្ជីសរុប ៧០,៦២ លានដុល្លារ ជាប់ចំណាត់ថ្នាក់ទី ៥២ នៅក្នុងចំណោមប្រទេស និងដែនដី ១៤០ ដែលមានគម្រោងវិនិយោគនៅវៀតណាម៕ LA
