.jpg)
លោកនាយករដ្ឋមន្ត្រី ហ៊ុន សែន ថ្លែងក្នុងសុន្ទរកថានៃវេទិកាអភិវឌ្ឍន៍ថាមពលកាបូនទាប ថៃយាន ឆ្នាំ ២០២១ កាលពីព្រឹកមិញ។ រូបថត SPM
ភ្នំពេញៈ កម្ពុជាកំពុងយកចិត្តទុកដាក់នូវគំនិតផ្តួចផ្តើមក្នុងការបង្កើតផែនការពាណិជ្ជកម្មទីផ្សារជួញដូរកាបូន ខណៈកម្ពុជាបាននិងកំពុងចូលរួមក្នុងទីផ្សារកាបូនស្ម័គ្រចិត្តជាច្រើនឆ្នាំមកហើយ។ នេះបើយោងតាមលោកនាយករដ្ឋមន្ត្រី ហ៊ុន សែន។
នៅក្នុងសុន្ទរកថានៃវេទិកាអភិវឌ្ឍន៍ថាមពលកាបូនទាប ថៃយាន ឆ្នាំ ២០២១ ដែលរៀបចំដោយប្រទេសចិន នាថ្ងៃទី ៣ ខែសីហា ក្រោមប្រធានបទ «ថាមពល អាកាសធាតុ បរិស្ថាន» លោក ហ៊ុន សែន បានលើកឡើងថា ក្នុងបរិការណ៍ដែលពិភពលោកទាំងមូលកំពុងប្រយុទ្ធនឹងជំងឺកូវីដ ១៩ ការរៀបចំវេទិកានេះគឺពិតជាមានសារៈសំខាន់ណាស់ក្នុងការក្រើនរំឭកឱ្យគ្រប់គ្នាមិនត្រូវបំភ្លេចចោលនូវបញ្ហាថាមពល អាកាសធាតុ និងបរិស្ថាន។
លោកបន្ថែមថា បញ្ហាថាមពល អាកាសធាតុ និងបរិស្ថាន ជាពិសេសការប្រែប្រួលអាកាសធាតុនៅតែជាបញ្ហាប្រឈមដ៏ចម្បង និងក្តៅគគុកសម្រាប់មនុស្សជាតិ ដែលវាបាននិងកំពុងបន្តការគំរាមកំហែងដល់សុខភាពមនុស្សជាតិ សន្តិសុខស្បៀង ហេដ្ឋារចនាសម្ព័ន្ធសង្គមសេដ្ឋកិច្ច និងប្រព័ន្ធអេកូឡូស៊ី។ ការណ៍នេះឆ្លុះបញ្ចាំងឱ្យឃើញពីភាពចាំបាច់នៃការធ្វើបដិវត្តថាមពលឱ្យបានលឿន និងប្រកបដោយយុត្តិធម៌ និងសមធម៌ ដើម្បីផ្លាស់ប្តូរពីការផលិត និងប្រើប្រាស់ថាមពលដែលបញ្ចេញកាបូនច្រើនទៅក្នុងបរិយាកាស។
លោកថ្លែងថា៖ «ទោះបីកម្ពុជាជាប្រទេសមានកម្រិតនៃការអភិវឌ្ឍទាប ក៏រាជរដ្ឋាភិបាលកម្ពុជាមានការប្តេជ្ញាចិត្តខ្ពស់ និងកំណត់យកបញ្ហាថាមពល អាកាសធាតុ និងបរិស្ថាន ជារបៀបវារៈគោលនយោបាយដ៏សំខាន់ និងសម្រាប់រយៈពេលវែង ក្រោមអភិក្រម [ជាបញ្ហារួម ប៉ុន្តែការអនុវត្តផ្សេងៗគ្នាទៅតាមការទទួលខុសត្រូវ និងសមត្ថភាពរៀងៗខ្លួន]»។
លោកបន្ថែមថា ជាមួយគ្នានេះកម្ពុជាក៏បានកត់សម្គាល់ដោយយកចិត្តទុកដាក់ផងដែរនូវគំនិតផ្តួចផ្តើមបង្កើតផែនការពាណិជ្ជកម្មទីផ្សារជួញដូរកាបូននៅក្នុងប្រទេសចិន។ លោកអះអាងថា៖ «កម្ពុជាក៏បានចាត់ទុកឥណទានកាបូនជាប្រភពធនធានហិរញ្ញប្បទាន ប្រកបដោយចីរភាពដ៏សំខាន់មួយសម្រាប់សកម្មភាពកាត់បន្ថយការបញ្ចេញឧស្ម័នផ្ទះកញ្ចក់ ហើយកម្ពុជាបើកចំហទទួលការចូលរួមនៅក្នុងភាពជាដៃគូជាមួយបណ្តាប្រទេស និងវិស័យឯកជននានា ដែលមានចំណាប់អារម្មណ៍»។
បើតាមលោកនាយករដ្ឋមន្ត្រី ហ៊ុន សែន បច្ចុប្បន្នកម្ពុជាបាននិងកំពុងខិតខំរៀបចំយុទ្ធសាស្ត្ររយៈពេលវែង ប្រកបដោយអព្យាក្រឹតភាពកាបូន ដោយរំពឹងថានឹងចប់សព្វគ្រប់នៅចុងឆ្នាំ ២០២១ នេះ។
ចាប់តាំងពីឆ្នាំ ២០១៦ ទល់ខែមិថុនា ឆ្នាំ ២០២១ កម្ពុជាបានទទួលថវិកាចំនួន ១១,៦ លានដុល្លារ ពីការលក់ឥណទានកាបូនឱ្យទៅក្រុមហ៊ុនអន្តរជាតិធំៗមានដូចជា Disney Kering Intuit និង Shell និងក្រុមហ៊ុន Gucci។ ទន្ទឹមនឹងនេះ កម្ពុជាក៏កំពុងសិក្សា និងអនុវត្តគម្រោងឥណទានកាបូនសាកល្បងក្នុងដែនជម្រកសត្វព្រៃព្រៃឡង់ក្នុងខេត្តស្ទឹងត្រែងបន្ថែមទៀតជាមួយក្រុមហ៊ុនជប៉ុន «Mitsui» ផងដែរ។ នេះបើតាមលោក នេត្រ ភក្ត្រា អ្នកនាំពាក្យក្រសួងបរិស្ថាន។
រដ្ឋមន្ត្រីក្រសួងរ៉ែ និងថាមពល លោក ស៊ុយ សែម នៅក្នុងវេទិកាបណ្តាញបច្ចេកវិទ្យានៃការប្រើប្រាស់ និងការស្តុកទុកកាបូននៅអាស៊ីលើកទី ១ (1st Asia CCUS Network Forum) កាលពីថ្ងៃទី ២២ ខែមិថុនា ឆ្នាំ ២០២១ បានឱ្យដឹងថា ការចាប់យកប្រើប្រាស់ និងស្តុកទុកកាបូននឹងជួយធ្វើឱ្យពិភពលោកមានបរិស្ថានមួយដែលល្អជាងមុន ហេតុនេះគ្រប់ប្រទេសលើពិភពលោក ត្រូវការចាំបាច់នូវការផ្លាស់ប្តូរពីប្រព័ន្ធថាមពលផ្អែកលើឥន្ធនៈហ្វូស៊ីលមកជាប្រព័ន្ធថាមពលស្អាតជាងមុន៕ LA
