.jpg)
កម្ពុជាគ្រោងនឹងបើកទទួលភ្ញៀវទេសចរអន្តរជាតិដំបូងនៅតំបន់អង្គរ។ ហេង ជីវ័ន
ភ្នំពេញៈ ស្តង់ដាប្រតិបត្តិអប្បបរមា (SOP) តាមគន្លងនៃប្រក្រតីភាពថ្មីសម្រាប់ប្រភេទអាជីវកម្មទេសចរណ៍ធំៗចំនួន ៤ ត្រូវបានក្រសួងទេសចរណ៍ប្រកាសដាក់ឱ្យអនុវត្ត ដើម្បីជួយឱ្យអាជីវកម្មទាំងនេះអាចធ្វើសកម្មភាពអាជីវកម្មរបស់ខ្លួនបានផង និងអាចសម្របខ្លួនក្នុងប្រក្រតីភាពថ្មីនៃអំឡុងវិបត្តិជំងឺកូវីដ ១៩ ផង ខណៈប្រទេសកម្ពុជាកំពុងមានផែនការបើកទទួលភ្ញៀវទេសចរចាក់វ៉ាក់សាំងឱ្យចូលមកកម្សាន្តចាប់ពីចុងឆ្នាំ ២០២១ តទៅ។
ប្រភេទអាជីវកម្មទេសចរណ៍ធំទាំង ៤ រួមមាន អាជីវកម្មសេវាកម្មស្នាក់នៅទេសចរណ៍, អាជីវកម្មភោជនីយដ្ឋាន-អាហារដ្ឋានទេសចរណ៍, រមណីយដ្ឋានទេសចរណ៍, និងសហគមន៍ទេសចរណ៍ និងអេកូទេសចរណ៍។
នៅក្នុងពិធីផ្សព្វផ្សាយបទដ្ឋានគតិយុត្ត និងការដាក់ឱ្យអនុវត្តស្ដង់ដា SOP តាមគន្លងប្រក្រតីភាពថ្មីតាមប្រព័ន្ធវីដេអូអនឡាញ Zoom កាលពីថ្ងៃទី ១ ខែ កញ្ញា ឆ្នាំ ២០២១ រដ្ឋមន្ត្រីក្រសួងទេសចរណ៍ លោក ថោង ខុន បានលើកឡើងថា ការធ្វើបច្ចុប្បន្នភាពវិធានសុវត្ថិភាពទេសចរណ៍ និងនីតិវិធីស្តង់ដាប្រតិបត្តិអប្បបរមា តាមគន្លងប្រក្រតីភាពថ្មីសម្រាប់អាជីវកម្មទេសចរណ៍ធំៗចំនួន ៤ នាពេលនេះ គឺស្របតាមវិធានការចាំបាច់របស់រដ្ឋាភិបាល និងក្រសួងសុខាភិបាល ដើម្បីទប់ស្កាត់ការឆ្លងរាលដាលជំងឺកូវីដ ១៩។ ម្យ៉ាងទៀតការធ្វើបច្ចុប្បន្នភាពលក្ខខណ្ឌនៃការអនុវត្តមួយចំនួននាពេលនេះ ក៏ដើម្បីឆ្លើយតបនឹងគន្លងប្រក្រតីភាពថ្មីតាមស្ថានភាពបច្ចុប្បន្នផងដែរ។
លោកបន្តថា វិធានសុវត្ថិភាពនេះត្រូវបានដាក់ឱ្យអនុវត្តជាកាតព្វកិច្ច និងជាលក្ខខណ្ឌបន្ថែមក្នុងការស្នើសុំថ្មី ឬបន្តអាជ្ញាប័ណ្ណទេសចរណ៍ផងដែរ។
លោកថ្លែងថា៖ «មូលដ្ឋានអាជីវកម្មទេសចរណ៍ណាអាចបំពេញបានតាមលក្ខណវិនិច្ឆ័យដូចបានកំណត់ក្នុងវិធានសុវត្ថិភាពទេសចរណ៍ នឹងទទួលបានលិខិតបញ្ជាក់ទទួលស្គាល់អាជីវកម្មដែលមានសុវត្ថិភាពប្រឆាំងនឹងជំងឺកូវីដ ១៩»។
នីតិវិធី SOP សម្រាប់អាជីវកម្មទេសចរណ៍ធំៗទាំង ៤ មានដូចជា ការគ្រប់គ្រងចរន្តភ្ញៀវទេសចរ, ការរៀបចំវិធានសុវត្ថិភាពទេសចរណ៍ក្នុងរមណីយដ្ឋានទេសចរណ៍, ការធានាសុវត្ថិភាព និងសុខភាពសាធារណៈភ្ញៀវទេសចរ, ការធានាសុវត្ថិភាព និងសុខភាពសាធារណៈបុគ្គលិកបម្រើការ, ការជំរុញផ្សព្វផ្សាយវិធានការក្នុងការទប់ស្កាត់ការរីករាលដាលជំងឺកូវីដ ១៩ និងការចូលរួមអនុវត្តគោលនយោបាយរបស់រាជរដ្ឋាភិបាលជាដើម។
បើតាមលោក ថោង ខុន នៅពេលប្រភេទអាជីវកម្មទេសចរណ៍ទាំង ៤ អនុវត្តវិធានសុវត្ថិភាពទេសចរណ៍ និងនីតិវិធីស្តង់ដាប្រតិបត្តិអប្បបរមាបានត្រឹមត្រូវ ពួកគេនឹងទទួលបានទំនុកចិត្តខ្ពស់ពីភ្ញៀវទេសចរ។ លោកបានបញ្ជាក់ថា៖ «យើងទាំងអស់គ្នាត្រូវតែចូលរួមប្រែក្លាយការគំរាមកំហែងពីជំងឺកូវីដ ១៩ ឱ្យទៅជាឱកាសសម្រាប់ការលើកកម្ពស់គុណភាពសេវាកម្មទេសចរណ៍ ដើម្បីជំរុញការទាក់ទាញទេសចរក្នុងស្រុក និងអន្តរជាតិឱ្យបានកាន់តែច្រើន»។
រដ្ឋាភិបាលកម្ពុជាតាមរយៈក្រសួងទេសចរណ៍ បានដាក់ចេញនូវវិធានការជាបន្តបន្ទាប់ចាប់តាំងពីការផ្ទុះឡើងនៃជំងឺកូវីដ ១៩ ដែលរួមមានការជួយទ្រទ្រង់ដល់អ្នកក្នុងវិស័យទេសចរណ៍ ក៏ដូចជាការដាក់ចេញនូវវិធានធានាសុវត្ថិភាពទេសចរណ៍ ដើម្បីបង្ហាញពីភាពធន់នឹងវិបត្តិ (Resilient) និងការបង្កើតប្រាក់ចំណូលជូនប្រជាពលរដ្ឋ ដែលទទួលផលប៉ះពាល់ធ្ងន់ធ្ងរពីការធា្លក់ចុះនៃចំនួនភ្ញៀវទេសចរ។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ថា លោកមានសុទិដ្ឋិនិយមចំពោះផែនការក្រសួងទេសចរណ៍ ដែលចង់បើកទទួលភ្ញៀវទេសចរអន្តរជាតិចាក់រ៉ាក់សាំងរួចរាល់ចាប់ពីចុងឆ្នាំ ២០២១ នេះតទៅ។
លោកបន្តថា ទន្ទឹមនេះវិស័យឯកជនក៏ត្រូវបង្ហាញការតាំងចិត្តដើម្បីស្វាគមន៍ភ្ញៀវប្រកបដោយគុណភាពទាំងសេវាកម្ម និងការអនុវត្តតាមវិធានក្រសួងទេសចរណ៍ និងក្រសួងសុខាភិបាលប្រយុទ្ធប្រឆាំងនឹងជំងឺកូវីដ ១៩។
លោកនិយាយថា៖ «ស្តង់ដាប្រតិបត្តិអប្បបរមានឹងមានសារៈសំខាន់ក្នុងការផ្តល់នូវទំនុកចិត្តរបស់ភ្ញៀវទេសចរ ខណៈបច្ចុប្បន្នស្ថានភាពការចាក់វ៉ាក់សាំងដល់ប្រជាជនខ្មែរដែលមានអាយុពី ១២ ឆ្នាំឡើងកំពុងសម្រេចបានលទ្ធផលល្អជាបន្តបន្ទាប់»។
បើតាមអ្នកនាំពាក្យក្រសួងទេសចរណ៍លោក តុប សុភ័ក នៅពេលនេះក្រសួងទេសចរណ៍កំពុងប្រឹងប្រែងជំរុញផែនការបើកទទួលភ្ញៀវទេសចរអន្តរជាតិចាក់វ៉ាក់សាំង ចូលមកកម្សាន្តនៅកម្ពុជាឡើងវិញ ដែលគម្រោងនេះអាចនឹងចាប់ផ្តើមនៅអំឡុងខែវិច្ឆិកា ឬខែធ្នូ ខាងមុខ។
លោកអះអាងថា៖ «ទោះយ៉ាងណាពេលវេលាជាក់លាក់ ឬក៏ការបើកទទួលភ្ញៀវទេសចរនៅក្នុងទម្រង់បែបណាៗ មិនទាន់អាចបញ្ជាក់លម្អិតទេ សូមរង់ចាំបន្តិចសិន»។
ទិន្នន័យក្រសួងទេសចរណ៍ឱ្យដឹងថា ក្នុងឆមាសទី១ ឆ្នាំ ២០២១ ជនបរទេសធ្វើដំណើរមកប្រទេសកម្ពុជាមានចំនួន ១០២ ៥៦០ នាក់ ធ្លាក់ចុះ ៩១,៣ ភាគរយបើធៀបនឹងរយៈពេលដូចគ្នាឆ្នាំ ២០២០៕ LA
