ភ្នំពេញៈ រដ្ឋបាលខេត្តបាត់ដំបង បានប្រកាសបន្តជួយទិញផ្លែមៀន (តាង៉ែន) និងមៀនក្រអូប របស់ប្រជាកសិករ ចាប់ពីថ្ងៃទី ០៣ ដល់ថ្ងៃទី ១៣ ខែ កញ្ញា ឆ្នាំ ២០២១ ខណៈដែលផលិតផលនេះ កំពុងបន្តជួបប្រទះនឹងបញ្ហាទីផ្សារនាំចេញទៅក្រៅប្រទេស ដែលបណ្តាលមកពីវិបត្តិនៃការឆ្លងរាលដាលជំងឺកូវីដ ១៩។
សេចក្តីជូនដំណឹងរបស់រដ្ឋបាលខេត្តបាត់ដំបង នាព្រឹកថ្ងៃទី ០៣ ខែកញ្ញានេះ ឱ្យដឹងថា ដើម្បីជួយសម្រាលការលំបាករបស់បងប្អូនប្រជាកសិករម្ចាស់ចម្ការផ្លែមៀន (តាង៉ែន) និងមៀនក្រអូប ក្នុងអំឡុងពេលមានការរាំងស្ទះការនាំចេញទៅក្រៅប្រទេស (ប្រទេសថៃ) ក្នុងដំណាក់កាលការរីករាលដាលជំងឺកូវីដ ១៩ ក្រុមការងាររដ្ឋបាលខេត្តបាត់ដំបង ដែលមានមន្ទីរពាណិជ្ជកម្មខេត្ត និងមន្ទីរកសិកម្ម រុក្ខាប្រមាញ់ និងនេសាទខេត្ត បានសហការគ្នាជាមួយរដ្ឋបាលស្រុកពាក់ព័ន្ធ នឹងបន្តជួយទទួលទិញផ្លែមៀន (តាង៉ែន) និងមៀនក្រអូប ចាប់ពីថ្ងៃទី ០៣ ដល់ថ្ងៃទី ១៣ ខែ កញ្ញា ឆ្នាំ ២០២១។
លិខិតបន្តថា ចំពោះទីតាំងទទួលទិញ គឺស្ថិតក្នុងបរិវេណទីលានកីឡដ្ឋានបាល់ទាត់វាលបែកចាន ជាប់នឹងទីបញ្ជាការដ្ឋានយោធភូមិភាគទី៥ ស្ថិតនៅភូមិរំចេក ៤ សង្កាត់រតនៈ ក្រុងបាត់ដំបង ខេត្តបាត់ដំបង។
ទីផ្សារនាំចេញផ្លែមៀនប៉ៃលិន (តាង៉ែន) និងមៀនក្រអូបរបស់កម្ពុជា បានជួបនឹងបញ្ហាទីផ្សារចាប់តាំងពីអំឡុងពាក់កណ្តាលខែសីហា បន្ទាប់ពីប្រទេសចិន សម្រេចឈប់ឱ្យប្រទេសថៃ នាំចូលទៅប្រទេសខ្លួន ក្រោយមានការរកឃើញមានសមាសធាតុចង្រៃមួយចំនួននៅជាប់លើផ្លែមៀន។ ទោះយ៉ាងណា បន្ទាប់ពីនោះបន្តិច ប្រទេសចិន ក៏បានអនុញ្ញាតឱ្យក្រមហ៊ុនថៃមួយចំនួននាំចូលប្រទេសខ្លួនឡើងវិញ៕