.jpg)
ពិធីចុះហត្ថលេខាលើកិច្ចសន្យាថាមពលរបស់លោក Ihsan Ismail រដ្ឋមន្ត្រីប្រេងអ៊ីរ៉ាក់ និង លោក Patrick Pouyanne ប្រធានក្រុមហ៊ុន TotalEnergies នៅក្នុងពិធីមួយនៅទីក្រុងបាកដាដ។ AFP
ទីក្រុងបាកដាដៈ រដ្ឋមន្ត្រីក្រសួងប្រេងរបស់ប្រទេសអ៊ីរ៉ាក់បាននិយាយកាលពីថ្ងៃអាទិត្យថា ក្រុមហ៊ុនយក្សថាមពលបារាំង TotalEnergies បានចុះហត្ថលេខាលើកិច្ចសន្យាដែលមានតម្លៃទឹកប្រាក់ចំនួន ២៧ ពាន់លានដុល្លារ ដើម្បីវិនិយោគក្នុងការផលិតប្រេងឧស្ម័ន និងថាមពលពន្លឺព្រះអាទិត្យនៅក្នុងប្រទេសអ៊ីរ៉ាក់។
ការប្រកាសនៃកិច្ចព្រមព្រៀងដែលត្រូវបានគេសន្មតថាជាផ្នែកមួយដើម្បីកាត់បន្ថយការពឹងផ្អែករបស់ប្រទេសអ៊ីរ៉ាក់លើឥន្ធនៈហ្វូស៊ីលបានកើតឡើង នៅពេលដែលរដ្ឋមន្ត្រី Ihsan Ismail បានចុះហត្ថលេខាលើកិច្ចសន្យានេះនៅក្នុងពិធីមួយនៅទីក្រុងបាកដាដជាមួយប្រធានក្រុមហ៊ុន TotalEnergies លោក Patrick Pouyanne ។
ក្រុមហ៊ុន TotalEnergies មិនបានបញ្ជាក់ដោយផ្ទាល់អំពីតម្លៃនៃកិច្ចសន្យានោះទេ។
លោក Ismail បាននិយាយថា៖ «នេះគឺជាការវិនិយោគធំបំផុតនៅក្នុងប្រទេសអ៊ីរ៉ាក់ដោយក្រុមហ៊ុនប្រទេសលោកខាងលិច។ ការអនុវត្តគំរោងទាំងនេះគឺជាការប្រឈមដែលយើងជួបប្រទះនាពេលនេះ»។
អ៊ីរ៉ាក់មានធនធាន ប្រេង និងឧស្ម័នបម្រុងយ៉ាងច្រើន។
ប៉ុន្តែទោះបីជាក្លាយជាអ្នកផលិតលេខ ២ នៅក្នុងអង្គការនៃប្រទេសនាំចេញប្រេងក៏ដោយ ក៏អ៊ីរ៉ាក់កំពុងជួបវិបត្តិថាមពលធ្ងន់ធ្ងរ និងការដាច់ចរន្តអគ្គិសនីរ៉ាំរ៉ៃដែលជំរុញឱ្យមានការមិនពេញចិត្តក្នុងសង្គម។
មន្ត្រីបង្ហាញអំពីភាពខ្វះខាតនៃការវិនិយោគ និងស្ថានភាពទ្រុឌទ្រោមនៃបណ្តាញថាមពលរបស់ខ្លួន ដោយលើកឡើងពីការធ្លាក់ចុះនៃតម្លៃប្រេងដែលតំណាងឱ្យជាង ៩០ ភាគរយនៃប្រាក់ចំណូលរបស់រដ្ឋ។
ប្រទេសនេះពឹងផ្អែកយ៉ាងខ្លាំងទៅលើប្រទេសអ៊ីរ៉ង់ដែលនៅជិតខាងដែលផ្គត់ផ្គង់ដល់ខ្លួនជាមួយនឹងតម្រូវការឧស្ម័ន និងអគ្គិសនីមួយភាគបី។
ទោះយ៉ាងណាបច្ចុប្បន្នទីក្រុងបាកដាដជំពាក់ក្រុងតេអេរ៉ង់ចំនួន ៦ ពាន់លានដុល្លារ សម្រាប់ថាមពលដែលបានផ្គត់ផ្គង់រួចហើយ។
អតីតក្រុមហ៊ុនតូតាល់របស់ប្រទេសបារាំងដែលបានប្តូរឈ្មោះខ្លួនទៅជា TotalEnergies ដើម្បីបង្ហាញពីការធ្វើពិពិធកម្មទៅជាប្រភពថាមពលស្អាតគឺជាក្រុមហ៊ុនមួយក្នុងចំណោមក្រុមហ៊ុនថាមពលកំពូលទាំង ៥ របស់ពិភពលោក។
ខណៈពេលដែលនៅតែផ្តោតលើប្រេង និងឧស្ម័នក្រុមហ៊ុនបានបង្ហាញថានៅឆ្នាំនេះខ្លួននឹងបូជា ២០ ភាគរយនៃការវិនិយោគរីកចម្រើនរបស់ខ្លួនចំពោះអគ្គិសនី និងថាមពលកកើតឡើងវិញ៕ RR
