ទីក្រុងញូវយ៉កៈ ក្រុមហ៊ុនផលិតឱសថចំនួន ៤ របស់សហរដ្ឋអាមេរិកបាននិយាយថា ពួកគេទទួលបានការគាំទ្រគ្រប់គ្រាន់ពីរដ្ឋនានារបស់អាមេរិក ដើម្បីឈានទៅរកដំណាក់កាលបន្ទាប់នៃការដោះស្រាយទឹកប្រាក់ចំនួន ២៦ ពាន់លានដុល្លារ លើការទាមទារផ្នែកច្បាប់រាប់ពាន់ទាក់ទងនឹងការរីករាលដាលថ្នាំ opioid ដែលជាថ្នាំបំបាត់ការឈឺចាប់។
វិបត្តិថ្នាំ opioid ដែលកើនឡើងកាន់តែធ្ងន់ធ្ងរ ដោយជំងឺរាតត្បាតវីរុសកូរ៉ូណា បានសម្លាប់មនុស្សជាងកន្លះលាននាក់នៅសហរដ្ឋអាមេរិក។
នៅក្នុងសេចក្តីថ្លែងការណ៍រួម ក្រុមហ៊ុនចែកចាយឱសថ AmerisourceBergen, Cardinal Health និង McKesson បាននិយាយថា ពួកគេបានទទួលភ្លើងខៀវពីរដ្ឋចំនួន ៤២ ក្នុងចំណោមរដ្ឋចំនួន ៤៩ ទីក្រុងវ៉ាស៊ីនតោនឌីស៊ី និង ដែនដីអធិបតេយ្យអាមេរិកចំនួន ៥ ទៀត។
ក្រុមហ៊ុនទាំងនោះបាននិយាយថាពួកគេបានកំណត់ថា គ្រប់រដ្ឋបានយល់ព្រមដោះស្រាយ ដើម្បីបន្តទៅដំណាក់កាលបន្ទាប់ទៀត។
ក្រុមហ៊ុនផលិតថ្នាំ Johnson & Johnson ដែលបានប្រកាសផងដែរ កាលពីខែកក្កដាថា ខ្លួននឹងចំណាយប្រាក់ចំនួន ៥ ពាន់លានដុល្លារ ដើម្បីដោះស្រាយបណ្តឹងក្នុងករណីដូចគ្នានេះ បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា ខ្លួនក៏ត្រៀមខ្លួនរួចជាស្រេច ដើម្បីឈានទៅដំណាក់កាលបន្ទាប់នៃដំណោះស្រាយ។
ក្រុមហ៊ុន Johnson & Johnson និយាយ៖ «ដំណោះស្រាយនេះមិនមែនជាការសារភាពនៃការទទួលខុសត្រូវ ឬការធ្វើខុសឡើយ ហើយក្រុមហ៊ុននឹងបន្តការពារប្រឆាំងនឹងវិវាទណាមួយដែលកិច្ចព្រមព្រៀងចុងក្រោយមិនត្រូវបានដោះស្រាយ»។ ក្រុមហ៊ុនបានប្រកាសកាលពីខែមិថុនាថាខ្លួនឈប់ផលិតថ្នាំបំបាត់ការឈឺចាប់ opioid។
ដំណោះស្រាយដែលបានស្នើនេះសង្ឃឹមថានឹងបញ្ចប់បណ្តឹងជិត ៤០០០ ដែលបានប្តឹងដោយរដ្ឋ និងរដ្ឋាភិបាលមូលដ្ឋានរបស់អាមេរិក។
ក្រោមលក្ខខណ្ឌនៃកិច្ចព្រមព្រៀងការទូទាត់ចំនួន ២៦ ពាន់លានដុល្លារដែលនឹងផ្តល់ហិរញ្ញប្បទានដល់កម្មវិធីស្តារនីតិសម្បទានៅទូទាំងប្រទេសគឺអាស្រ័យលើចំនួនរដ្ឋដែលអនុម័ត។
ឥឡូវនេះរដ្ឋនីមួយៗដែលចូលរួម មានរយៈពេលរហូតដល់ថ្ងៃទី ២ ខែមករា ដើម្បីសួររដ្ឋាភិបាលក្នុងតំបន់របស់ពួកគេ ថាតើពួកគេចង់ក្លាយជាផ្នែកមួយនៃដំណោះស្រាយដែរឬទេ។
ប្រសិនបើលក្ខខណ្ឌត្រូវបានបំពេញកិច្ចព្រមព្រៀងនឹងចូលជាធរមាន៖ «៦០ ថ្ងៃបន្ទាប់ពីអ្នកចែកចាយកំណត់ថាមានការចូលរួមគ្រប់គ្រាន់ដើម្បីដំណើរការ» យោងតាមសេចក្តីថ្លែងការណ៍។
ប្រសិនបើត្រូវបានបញ្ចប់ដំណោះស្រាយនឹងមានសារៈសំខាន់បំផុតនៅក្នុងការតស៊ូផ្នែកច្បាប់ដ៏ស្មុគស្មាញដោយរដ្ឋ និងសហគមន៍ដើម្បីឱ្យក្រុមហ៊ុនដែលមានអំណាចចេះទទួលខុសត្រូវ។
នៅក្នុងករណីដាច់ដោយឡែកមួយចៅក្រមអាមេរិកបានអនុម័តកាលពីថ្ងៃពុធនូវផែនការក្ស័យធនដែលស្នើឡើងដោយ Purdue ដោយចោទប្រកាន់ថាបានរួមចំណែកដល់វិបត្តិ opioid ដោយការផ្សព្វផ្សាយយ៉ាងសកម្មនូវថ្នាំរបស់ខ្លួនឈ្មោះ OxyContin ។
ក្រោមកិច្ចព្រមព្រៀង ម្ចាស់ក្រុមហ៊ុន Sackler នឹងបង់ប្រាក់សរុបចំនួន ៤,៥ ពាន់លានដុល្លារដល់អ្នកដែលរងផលប៉ះពាល់ជាថ្នូរនឹងការមិនមានទោស៕ RR