.jpg)
ប្រព័ន្ធ e-Registration ធ្វើឱ្យចំណេញពេល និងថវិកា។ រូបថត ក្រសួងប្រៃសណីយ៍
ភ្នំពេញៈ ក្រសួងប្រៃសណីយ៍ និងទូរគមនាគមន៍បានដាក់ឱ្យប្រើប្រាស់ប្រព័ន្ធស្នើសុំបំពេញប្រតិបត្តិការអាជីវកម្មក្នុងវិស័យប្រៃសណីយ៍ និងវិស័យបច្ចេកវិទ្យាគមនាគមន៍ និងព័ត៌មានតាមប្រព័ន្ធអេឡិចត្រូនិក (e-Registration) សម្រាប់ថ្នាក់ជាតិ។
សេចក្តីជូនដំណឹងរបស់ក្រសួងបានឱ្យដឹងថា ការដាក់ឱ្យប្រើប្រាស់ប្រព័ន្ធ e-Registration គឺស្របទៅតាមចក្ខុវិស័យរបស់រដ្ឋាភិបាលក្នុងការកសាងសេដ្ឋកិច្ច និងសង្គមឌីជីថលរស់រវើក។ ការកសាងរដ្ឋាភិបាលឌីជីថល គឺជាកិច្ចការអាទិភាពដែលត្រូវចាប់ផ្តើមធ្វើបរិវត្តកម្មឌីជីថល ដោយផ្តោតលើការពង្រឹងសេវាសាធារណៈ តាមរយៈការប្រើប្រាស់បច្ចេកវិទ្យាឌីជីថលជាស្នូល សំដៅជំរុញការវិនិយោគ និងការអភិវឌ្ឍសេដ្ឋកិច្ច និងសង្គម។
សេចក្តីជូនដំណឹងបន្តថា ប្រព័ន្ធនេះនឹងផ្តល់ភាពងាយស្រួល និងឆាប់រហ័សដល់ប្រតិបត្តិករ ឬម្ចាស់អាជីវកម្មក្នុងការសុំលិខិតអនុញ្ញាត វិញ្ញាបនបត្រ ឬអាជ្ញាប័ណ្ណសម្រាប់បំពេញប្រតិបត្តិការអាជីវកម្មក្នុងវិស័យប្រៃសណីយ៍ និងវិស័យបច្ចេកវិទ្យាគមនាគមន៍ និងព័ត៌មាន។
លោកស្រី សុខ ចាន់ដា ប្រធាននាយកប្រតិបត្តិក្រុមហ៊ុន Angkor Data Communication Group Co Ltd (Mekong Net) ដែលជាក្រុមហ៊ុនផ្តល់សេវាអ៊ីនធឺណិត (ISPs) បានឱ្យដឹងថាការដាក់ឱ្យប្រើប្រាស់ e-Registration នឹងសម្រួលដល់ការសុំចុះបញ្ជីវិញ្ញាបនបត្រ ឬអាជ្ញាប័ណ្ណសម្រាប់បំពេញប្រតិបត្តិការអាជីវកម្មក្នុងវិស័យនេះកាន់ងាយស្រួល និងឆាប់រហ័ស។
លោកស្រីថ្លែងថា៖ «ខ្ញុំគិតថា វានឹងផ្តល់ភាពងាយស្រួលវិញ ដោយអ្វីៗយើងធ្វើតាមអនឡាញមិនបាច់ទៅរង់ចាំការចុះបញ្ជីនៅកន្លែងផ្ទាល់»។
លោក សួរ វីរៈ អគ្គនាយកក្រុមហ៊ុន វីរៈប៊ុនថាំ អេចប្រេស ជាក្រុមហ៊ុនផ្តល់សេវាកម្មដឹកអ្នកដំណើរ និងបញ្ញើឆាប់រហ័សប្រាប់ភ្នំពេញប៉ុស្តិ៍ថា ប្រព័ន្ធនេះនឹងជួយកាត់បន្ថយថ្លៃដើម និងចំណេញពេលវេលាបាន ១ កម្រិតដល់ម្ចាស់អាជីវកម្មក្នុងវិស័យនេះ។
លោកប្រាប់ថា៖ «ពិតណាស់ នៅពេលដែលបច្ចេកវិទ្យាជឿនលឿនវាធ្វើឱ្យយើងចំណេញពេលវេលា និងការចំណាយរបស់យើង។ ការដាក់ឱ្យប្រើប្រាស់ប្រព័ន្ធស្នើសុំបំពេញប្រតិបត្តិការអាជីវកម្មតាមប្រព័ន្ធអនឡាញ គឺជាសញ្ញាល្អសម្រាប់ដំណើរការអាជីវកម្មគ្រប់រូបបែប ព្រោះពីមុនមកយើងពិបាកដើម្បីទៅរកការចុះបញ្ជី យើងខាតពេលវេលា ហើយការចំណាយក៏ច្រើនដែរ អ៊ីចឹងក្រសួងដាក់ឱ្យប្រើប្រព័ន្ធនេះវាងាយស្រួលសម្រាប់យើង»។
ប្រតិបត្តិករ ឬម្ចាស់អាជីវកម្មអាចធ្វើការដាក់ពាក្យស្នើសុំតាមរយៈគេហទំព័រ service.mptc.gov.kh និងស្កេន QR Code ដើម្បីទាញយកសៀវភៅណែនាំពីការប្រើប្រាស់ប្រព័ន្ធ e-Registration នេះ។
ក្រសួងប្រៃសណីយ៍ និងទូរគមនាគមន៍លើកទឹកចិត្តឱ្យប្រតិបត្តិករ ឬម្ចាស់អាជីវកម្មទាំងអស់ចាប់ផ្តើមប្រើប្រាស់ប្រព័ន្ធ e-Registration ដើម្បីជាជំនួយដល់ការស្នើសុំបំពេញប្រតិបត្តិការអាជីវកម្មរបស់ខ្លួន ហើយក្រសួងរីករាយនឹងទទួលមតិយោបល់ត្រឡប់ពីប្រតិបត្តិករ ឬម្ចាស់អាជីវកម្ម ដើម្បីធានាដល់ប្រសិទ្ធភាពនៃការប្រើប្រាស់ប្រព័ន្ធនេះ៕ LA
