.jpg)
ហាងលក់កង់ ១ កន្លែងក្នុងរាជធានីភ្នំពេញ។ រូបថត ភ្នំពេញ ប៉ុស្តិ៍
ភ្នំពេញៈ ការនាំចេញកង់ពីប្រទេសកម្ពុជាទៅលក់នៅទីផ្សារអន្តរជាតិក្នុងរយៈពេល ៨ ខែ ដើមឆ្នាំ ២០២១ មានចំនួន ១,៨៦ លានគ្រឿង ដោយប្រមូលបានប្រាក់សរុបជាង ៤១៦ លានដុល្លារ កើនជាង ៨២ លានដុល្លារ ធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យក្រសួងពាណិជ្ជកម្ម។
ទិន្នន័យបង្ហាញថា ទោះបីវិបត្តិការឆ្លងរាលដាលជំងឺកូវីដ ១៩ នៅតែបន្តអូសបន្លាយដែលបង្កផលប៉ះពាល់ដល់ចង្វាក់ផលិតកម្មមួយចំនួន ក៏ការនាំចេញកង់របស់កម្ពុជាទៅទីផ្សារអន្តរជាតិមិនបានធ្លាក់ចុះឡើយ ដោយគិតពីខែមករា ដល់ខែសីហា ឆ្នាំ ២០២១ កម្ពុជា បាននាំចេញកង់ក្នុងទឹកប្រាក់សរុប ៤១៦,៨៥ លានដុល្លារ កើនឡើង ២៤,៥៥ ភាគរយស្មើនឹងចំនួន ៨២,១៧ លានដុល្លារធៀបនឹងរយៈពេល ៨ ខែឆ្នាំ ២០២០ ដែលមានទឹកប្រាក់ ៣៣៤,៦៧ លានដុល្លារ។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានប្រាប់ ភ្នំពេញ ប៉ុស្តិ៍ នៅថ្ងៃទី ៧ ខែកញ្ញាថា ទីផ្សារនាំចេញកង់កម្ពុជាបានរក្សាភាពវិជ្ជមានជាបន្តបន្ទាប់នារយៈពេលប៉ុន្មានឆ្នាំចុងក្រោយនេះ។ ភាពវិជ្ជមាននេះបានមកពីកត្តារួមផ្សំមួយចំនួនដូចជា ការបង្កើតបានទីផ្សារថ្មីៗជាបន្តបន្ទាប់ អ្នកបញ្ជាទិញមានទំនុកចិត្តលើការផលិត និងការផ្គត់ផ្គង់របស់កម្ពុជា ជាពិសេសការគ្រប់គ្រងស្ថានភាពនៃជំងឺកូវីដ ១៩ បានល្អ ដើម្បីធានានិរន្តរភាពរបស់ខ្សែចង្វាក់ផលិតកម្ម។
លោកអះអាងថា៖ «កំណើនទឹកប្រាក់នៃការនាំចេញកង់ក្នុងរយៈពេលនេះគឺជាចំណែកនៃកិច្ចខិតខំរបស់ក្រសួងពាណិជ្ជកម្ម និងស្ថាប័នពាក់ព័ន្ធក្នុងការអំពាវនាវដល់អ្នកបញ្ជាទិញឱ្យបន្តការបញ្ជាទិញ ព្រមជាមួយនឹងទំនុកចិត្តរបស់អ្នកបញ្ជាទិញកង់ពីកម្ពុជាផងដែរ»។
យោងតាមលោក ស៊ាង ថៃ គិតត្រឹមខែមីនា ឆ្នាំ ២០២១ នៅកម្ពុជាមានរោងចក្រដំឡើងកង់ធំៗចំនួន ៥ នៅខេត្តស្វាយរៀង គឺក្រុមហ៊ុន A and J (Cambodia) Co., Ltd, ក្រុមហ៊ុន Speedtech Industrial Co., Ltd, ក្រុមហ៊ុន Smart Tech (Cambodia)Co.,Ltd, ក្រុមហ៊ុន Xds Bicycle (Cambodia)Co., Ltd និងក្រុមហ៊ុន Evergrand Bicycle (Cambodia)Co., Ltd។
ប្រទេសទទួលទិញកង់របស់កម្ពុជាមានចំនួន ៥០ ក្នុងនោះទីផ្សារគោលដៅសំខាន់ៗមានដូចជា អាមេរិក, កាណាដា, អាល្លឺម៉ង់ និងអង់គ្លេស។ នេះបើតាមលោក ស៊ាង ថៃ។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) និយាយថា ក្នុងទម្រង់កំណើនការនាំចេញកង់ជាបន្តបន្ទាប់នេះ អាចកើតឡើងពីកត្តាក្នុងស្រុក និងក្រៅស្រុក ដែលកត្តាទាំងនោះរួមមាន ភាពសម្បូរបែបនៃកម្លាំងពលកម្មជំនាញ និងមានតម្លៃសមរម្យ, ច្បាប់វិនិយោគមានលក្ខណៈអំណោយផល និងទាក់ទាញ, មានទីផ្សារនៅប្រទេសជាច្រើន និងមានការបញ្ជាទិញច្រើន។
លោកប្រាប់ថា៖ «កំណើននេះបានបង្ហាញពីសុខុមាលភាពឧស្សាហកម្មផលិតកម្មនាំចេញកង់កម្ពុជា ហើយក៏ជាចំណុចមួយដែលយើងត្រូវចាប់អារម្មណ៍ផងដែរ ព្រោះជាឧស្សាហកម្មមិនមែនវាយនភណ្ឌ ដែលគេទទួលស្គាល់ថា មានភាពរឹងមាំ និងជាប់លាប់ជាងវិស័យកាត់ដេរ (ការវិនិយោគដែលមិនងាយផ្លាស់ប្តូរទីតាំង)»។
ជាមួយនឹងភាពសុទិដ្ឋិនិយម លោក វណ្ណៈ អះអាងថា ឧស្សាហកម្មផលិតកង់នៅកម្ពុជានឹងមានកំណើនថែមទៀត។ លោកបញ្ជាក់ថា៖ «នេះជាផ្នែកមួយនៃការធ្វើពិពិធកម្មលើផលិតផលនាំចេញរបស់កម្ពុជា ក្រៅពីផលិតកម្មមិនមែនកាត់ដេរ។ នេះជាចំណែកមួយនៃការនាំយកថវិកាពីអន្តរជាតិ មកចាក់បញ្ចូលក្នុងសេដ្ឋកិច្ចកម្ពុជា»។
កាលពីឆ្នាំ ២០២០ កម្ពុជាបាននាំចេញកង់ក្នុងតម្លៃសរុប ៥២៧,០៨ លានដុល្លារ កើនឡើង ២៧,៧៨ ភាគរយធៀបឆ្នាំ ២០១៩ ដែលធ្វើឱ្យកម្ពុជាជាប់ចំណាត់ថ្នាក់លេខ ១ នៅអាស៊ាន និងលេខ ៥ លើពិភពលោកជាប្រទេសនាំចេញច្រើនជាងគេ។ នេះបើតាមទិន្នន័យពីក្រសួងពាណិជ្ជកម្ម៕ LA
