.jpg)
លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម និងលោក Sergey GLACIEV សមាជិកក្រុមប្រឹក្សាភិបាលរដ្ឋមន្ត្រីទទួលបន្ទុកសមាហរណកម្ម និងម៉ាក្រូសេដ្ឋកិច្ចនៃ គ.ស.អ.អ.។ រូបថត Commerce Ministry, Rai Novosti
ភ្នំពេញៈ ក្រសួងពាណិជ្ជកម្ម និងគណៈកម្មការសេដ្ឋកិច្ចអឺរ៉ុប-អាស៊ី (គ.ស.អ.អ) បានចាប់ផ្តើមប្រជុំពិភាក្សាគ្នាលើកទី៣ កាលពីថ្ងៃអង្គារ ដើម្បីជាការបើកផ្លូវឈានទៅរកការចរចាលើកិច្ចព្រមព្រៀងពាណិជ្ជកម្មសេរីទ្វេភាគី (FTA) រវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី (EAEU)។
សេចក្តីប្រកាសព័ត៌មានក្រសួងពាណិជ្ជកម្មឱ្យដឹងថា កិច្ចប្រជុំនេះត្រូវបានធ្វើចាប់ពីថ្ងៃទី ៧-៨ ខែ កញ្ញា ឆ្នាំ ២០២១ តាមរយៈប្រព័ន្ធវីដេអូ នៅទីស្តីការក្រសួងពាណិជ្ជកម្ម ក្រោមអធិបតីភាពលោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងាររួមសម្រាប់ភាគីកម្ពុជា ជាមួយសហប្រធានលោក Sergey GLACIEV សមាជិកក្រុមប្រឹក្សាភិបាលរដ្ឋមន្ត្រីទទួលបន្ទុកសមាហរណកម្ម និងម៉ាក្រូសេដ្ឋកិច្ចនៃ គ.ស.អ.អ. និងមានការចូលរួមពីមន្ត្រីជាន់ខ្ពស់ក្រសួងស្ថាប័នមួយចំនួនទៀត។
សេចក្តីប្រកាសព័ត៌មានបានបន្ថែមថា គោលបំណងនៃកិច្ចប្រជុំនេះ គឺដើម្បីពិនិត្យពិភាក្សា និងតាមដានវឌ្ឍនភាពនៃកិច្ចសហប្រតិបត្តិការកិច្ចព្រមព្រៀង និងអនុស្សរណៈនៃការយោគយល់ដែលភាគីទាំង ២ សម្រេចបានកន្លងមក ហើយក៏ដើម្បីស្វែងរកនូវកាលានុវត្តភាពជាសក្តានុពលសម្រាប់បន្តលើកកម្ពស់ និងពង្រឹងកិច្ចសហប្រតិបត្តិការថ្មីៗបន្ថែមទៀតរវាងភាគីទាំង ២។
កិច្ចប្រជុំនេះផ្តោតលើវិស័យសំខាន់ៗមួយចំនួនដូចជា កិច្ចសហប្រតិបត្តិការ ពាណិជ្ជកម្ម និងវិនិយោគ កិច្ចសហប្រតិបត្តិការលើវិស័យគយ វិស័យវិទ្យាសាស្ត្រ បច្ចេកវិទ្យា និងនវានុវត្តន៍ វិស័យទូរគមនាគមន៍ ការអភិវឌ្ឍឌីជីថល និងបច្ចេកវិទ្យាទំនាក់ទំនងព័ត៌មាន ព្រមទាំងវិស័យឧស្សាហកម្ម ថាមពល និងហេដ្ឋារចនាសម្ព័ន្ធ របាំងបច្ចេកទេសពាណិជ្ជកម្ម បទប្បញ្ញត្តិបច្ចេកទេស និងអនាម័យ និងភូតគាមអនាម័យ កម្មសិទ្ធិបញ្ញា កិច្ចការការពារអ្នកប្រើប្រាស់ និងការប្រកួតប្រជែង។
កិច្ចប្រជុំលើកទី៣ នេះធ្វើឡើងអនុលោមតាមក្របខ័ណ្ឌអនុស្សរណៈនៃការយោគយល់គ្នារវាងរដ្ឋាភិបាលកម្ពុជា និងគណៈកម្មការសេដ្ឋកិច្ចអឺរ៉ុប-អាស៊ី ដែលបានចុះហត្ថលេខាដោយលោកនាយករដ្ឋមន្ត្រី ហ៊ុន សែន និងលោក Tigran Sarasyan ប្រធានក្រុមប្រឹក្សាភិបាល គ.ស.អ.អ កាលពីថ្ងៃទី ១៧ ខែ ឧសភា ឆ្នាំ ២០១៦ នៅទីក្រុងម៉ូស្គូ សហព័ន្ធរុស្ស៊ី។
អនុស្សរណៈនេះធ្វើឡើងក៏ដើម្បីស្វែងរកឱកាសថ្មីសម្រាប់កិច្ចសហប្រតិបត្តិការពាណិជ្ជកម្ម និងសេដ្ឋកិច្ចរវាងរដ្ឋដែលជាសមាជិក និងប្រទេសកម្ពុជា ដោយពឹងផ្អែកលើគោលការណ៍សមភាព តម្លាភាព ជំនឿទុកចិត្ត និងការគោរពគ្នាទៅវិញ-ទៅមក។ នេះបើតាមខ្លឹមសារអនុស្សរណៈ។
អនុស្សរណៈខាងលើឱ្យដឹងទៀតថា គោលដៅនៃកិច្ចសហប្រតិបត្តិការនេះ ក៏ជាការរួមចំណែកដល់ការអភិវឌ្ឍកិច្ចសហប្រតិបត្តិការគ្រប់ជ្រុងជ្រោយរវាងរដ្ឋជាសមាជិក និងកម្ពុជា ដើម្បីប្រសិទ្ធភាពនៃពាណិជ្ជកម្មទ្វេភាគី និងការលុបបំបាត់របាំងពាណិជ្ជកម្មផងដែរ។
លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម ប្រាប់ភ្នំពេញប៉ុស្តិ៍ កាលពីខែកក្កដាថា ពាណិជ្ជកម្មដែលជាក្រសួងសាមីក្នុងការចរចាលើកិច្ចព្រមព្រៀងពាណិជ្ជកម្មសេរីកម្ពុជា-EAEU កំពុងធ្វើការយ៉ាងសកម្ម ដើម្បីជំរុញការចាប់ផ្តើមចរចាឱ្យបានឆាប់តាមដែលអាចធ្វើបាន។
លោកបញ្ជាក់ថា៖ «ក្រសួងពាណិជ្ជកម្មជឿជាក់មុតមាំថាកិច្ចចរចានេះអាចនឹងចាប់ផ្តើមបានក្នុងពេលឆាប់ៗខាងមុខ ដែលមានសហព័ន្ធរុស្ស៊ីជាអ្នកសម្របសម្រួល»។
EAEU ជាសហព័ន្ធសេដ្ឋកិច្ចតំណាងឱ្យប្រទេសចំនួន ៥ រួមមានរុស្ស៊ី, អាមេនី, បេឡារុស,កាហ្សាក់ស្ថាន និងកៀហ្ស៊ីស៊ីស្ថាន ដែលមានប្រជាជនសរុបជាង ១៨៤ លាននាក់ក្នុងឆ្នាំ ២០២០។ EAEU មានផលិតផលក្នុងស្រុក GDP សរុប ៤,៧៧ ពាន់ពាន់លានដុល្លារ។
ទិន្នន័យក្រសួងពាណិជ្ជកម្មបានបង្ហាញថា ទំហំពាណិជ្ជកម្មសរុបរវាងកម្ពុជា និង EAEU ឆ្នាំ ២០២០ មាន ៦៧,៣៧ លានដុល្លារ កើន ១៨,២២ ភាគរយធៀបឆ្នាំ ២០១៩៕ LA
