ភ្នំពេញៈ អេស៊ីលីដា ដែលជាធនាគារគ្រប់គ្រងដោយវិនិយោគិនក្នុងស្រុកឈានមុខមួយនៅកម្ពុជា បានបម្រុងទុកមូលនិធិ ៧៩ លានដុល្លារសម្រាប់ឆ្នាំ ២០២២ ខាងមុខដើម្បីគាំទ្រកំណើនសហគ្រាសធុនតូច និងមធ្យម (SME) ដែលកំពុងដើរតួនាទីយ៉ាងសកម្មក្នុងការជំរុញសកម្មភាពសេដ្ឋកិច្ចអំឡុងពេលការឆ្លងជំងឺកូវីដ ១៩ ក្នុងសហគមន៍។ នេះបើយោងតាមប្រធាននាយកប្រតិបត្តិធនាគារមួយនេះប្រាប់ភ្នំពេញប៉ុស្ដិ៍កាលពីថ្ងៃអង្គារ។
លោក អ៊ិន ចាន់នី ឱ្យដឹងថា ធនាគារអេស៊ីលីដាមានកំណើនដ៏រឹងមាំទាំងប្រាក់សន្សំ ប្រាក់បញ្ញើ និងផលបត្រកម្ចី។ គិតត្រឹមចុងខែសីហា ប្រាក់សន្សំ និងប្រាក់បញ្ញើ បានកើនឡើង ៥,១៣ ពាន់លានដុល្លារ កើន ១៥,៤៥ ភាគរយ និងផលបត្រកម្ចី ៤,៨ ពាន់លានដុល្លារ កើន ១០,៤៤ ភាគរយធៀបទៅនឹងចុងខែធ្នូ ឆ្នាំ ២០២០។
លោកថ្លែងថា៖ «កំណើនដ៏រឹងមាំទាំងនេះលើសពីភាពគ្រប់គ្រាន់ក្នុងការគាំទ្រកំណើនរយៈពេលខ្លីសម្រាប់សហគ្រាសធុនតូច និងមធ្យម។ ជាធម្មតាសហគ្រាសធុនតូច និងមធ្យម ត្រូវការកម្ចីរយៈពេលវែងពី ៣-៥ ឆ្នាំ។ ធនាគារអេស៊ីលីដា តែងរៀបចំផែនការជាមុន ដើម្បីឆ្លើយតបទៅនឹងតម្រូវការមូលនិធិរយៈពេលវែងសម្រាប់ឆ្នាំ ២០២២ និងឆ្នាំបន្ទាប់ៗទៀត។ ដើម្បីគាំទ្រដល់តម្រូវការរបស់ SMEs អេស៊ីលីដា កៀរគរមូលនិធិទាំងក្នុងស្រុក និងអន្តរជាតិ ដើម្បីគាំទ្រកំណើនរបស់ SMEs។ លោកបញ្ជាក់ថា៖ «ប្រាក់ ៧៩ លានដុល្លារគឺជាផែនការមូលនិធិសម្រាប់ឆ្នាំបន្តទៀតរបស់យើង»។
លោកពន្យល់ថា មូលនិធិនេះគឺជាផ្នែកមួយនៃកម្ចីរួមបញ្ចូលគ្នាចំពោះធនាគារអេស៊ីលីដា ហើយធនាគារអេស៊ីលីដា នឹងប្រើប្រាស់មូលនិធិនេះសម្រាប់ SMEs ក្នុងឆ្នាំ ២០២២ និងឆ្នាំបន្តបន្ទាប់ទៀត។ ការណ៍នេះគឺជាការត្រៀមខ្លួនរួចហើយសម្រាប់កំណើន បន្ទាប់ពីការរីករាលដាលកូវីដ ១៩។
លោកលើកឡើងថា ក្នុងរយៈពេលខ្លី ធនាគារអេស៊ីលីដា ប្រើប្រាស់មូលនិធិក្នុងស្រុក (ប្រាក់សន្សំ និងប្រាក់បញ្ញើសាធារណៈ) ដោយឡែកសម្រាប់ការផ្ដល់មូលនិធិរយៈពេលវែង ធនាគារអេស៊ីលីដា ប្រើប្រាស់ទាំងមូលនិធិអន្តរជាតិ និងក្នុងស្រុក។
លោក ចាន់នី បន្ថែមថា៖ «សម្រាប់ជំងឺកូវីដ ១៩ គេគួរតែចងចាំថា វាគឺជាផ្នែកមួយនៃជីវិតប្រចាំថ្ងៃរបស់យើងរួចទៅហើយ។ យើងមិនគួរឱ្យពួកគេបញ្ឈប់អាជីវកម្មពួកគេឡើយ។ យើងចាំបាច់ត្រូវធ្វើឱ្យមានការបន្តសកម្មភាព និងកំណើន ដើម្បីគាំទ្រអាជីវកម្មផ្សេងទៀត ដូច្នេះយើងម្នាក់ៗមិនត្រូវចុះចាញ់នោះទេ»។
កាលពីពាក់កណ្ដាលខែសីហា ឆ្នាំ ២០២១ នេះ ធនាគារសហគ្រាស ធុនតូច និងមធ្យម ដែលគ្រប់គ្រងដោយរដ្ឋ (SME Bank) បានដាក់ឱ្យដំណើរការជាផ្លូវការ «គម្រោងផ្ដល់ហិរញ្ញប្បទានរួមដំណាក់កាលទី ២» ដើម្បីគាំទ្រសកម្មភាពអាជីវកម្មរបស់សហគ្រាសធុនតូច និងមធ្យម (SME) និងកាត់បន្ថយការបារម្ភសេដ្ឋកិច្ច ដោយសារតែជំងឺកូវីដ ១៩។
ដំណាក់កាលទី ២ នេះត្រូវបានដាក់ឱ្យប្រើប្រាស់ បន្ទាប់ពីការសម្រេចបានលទ្ធផលវិជ្ជមាននៅដំណាក់កាលទី ១ ដោយមានគ្រឹះស្ថានហិរញ្ញវត្ថុ ចូលរួមផ្ដល់ហិរញ្ញប្បទានដល់ SME ដើម្បីរក្សាដំណើរការអាជីវកម្ម និងលើកកម្ពស់ការស្ទុះងើបឡើងសេដ្ឋកិច្ច។
មូលនិធិនេះ ស្ថិតក្រោមគម្រោងការផ្ដល់ហិរញ្ញប្បទានរួមចំនួន ១០០ លានដុល្លារ ដែលជាមូលនិធិបដិភាគស្មើគ្នារវាងធនាគារ SME Bank និងគ្រឹះស្ថានហិរញ្ញវត្ថុដែលចូលរួម។
បច្ចុប្បន្ននេះមានគ្រឹះស្ថានហិរញ្ញវត្ថុចូលរួមចំនួន ២៦ ក្នុងនោះធនាគារពាណិជ្ជ ២១ ធនាគារឯកទេស ១ និងគ្រឹះស្ថានមីក្រូហិរញ្ញវត្ថុ ៤ ក្នុងចំណោមនោះគ្រឹះស្ថានមីក្រូហិរញ្ញវត្ថុ ៣ ត្រូវបានអនុញ្ញាតឱ្យទទួលប្រាក់បញ្ញើ។
យោងតាមលោក ចាន់នី ធនាគារអេស៊ីលីដា បានចាប់ផ្ដើមប្រហែល ១៥ លានដុល្លារក្នុងដំណាក់កាលទី ១ និងរៀបចំផែនការដើម្បីបង្កើន ២ ដងក្នុងដំណាក់កាលទី ២ នេះ៕LA