ទីក្រុងហ្វ្រែងហ្វឺតៈ ទេសាភិបាលទាំងឡាយនៃធនាគារកណ្តាលអឺរ៉ុប (ECB) ជួបប្រជុំគ្នានៅថ្ងៃព្រហស្បតិ៍ក្រោមសម្ពាធ ដើម្បីបញ្ជាក់នូវផែនការបញ្ចេញកញ្ចប់ជំរុញសេដ្ឋកិច្ចរបស់ពួកគេ ពេលដែលសេដ្ឋកិច្ចតំបន់អឺរ៉ុបងើបឡើងវិញពីការរីករាលដាល ហើយអតិផរណាកើនឡើងខ្ពស់ជាង។
តួលេខកែសម្រួលឡើងវិញនៅសប្តាហ៍នេះបានបង្ហាញថា សេដ្ឋកិច្ចនៅក្នុងតំបន់ដែលមាន ១៩ ប្រទេសកើនឡើងប្រសើរជាងការព្យាករចំនួន ២,២ ភាគរយនៅក្នុងត្រីមាសទីពីរ បន្ទាប់ពីប្រទេសទាំងឡាយបានបន្ធូរបន្ថយការរឹតត្បិតដោយសារវីរុសរបស់ពួកគេ។
ពេលនេះ ធនាគារ ECB ប្រឈមនឹងទង្វើដ៏ពិបាកក្នុងការសម្រេចចិត្តថាតើពេលណា និងរបៀបដើម្បីកាត់បន្ថយការគាំទ្រចំពោះជំងឺរាតត្បាតដ៏ធំរបស់ខ្លួន ហើយទំនាក់ទំនងវាដោយមិនធ្វើឱ្យប៉ះពាល់ដល់ការងើបឡើងវិញ ឬទីផ្សារភ័យខ្លាច។
ក្នុងសហរដ្ឋអាមេរិក ដែលការងើបឡើងវិញត្រូវបានគេមើលឃើញមានរយៈពេលវែងបន្តទៀត ធនាគារកណ្តាលអាមេរិកបានចង្អុលបង្ហាញរួចរាល់ហើយថា ខ្លួនអាចចាប់ផ្តើមដកចេញនូវវិធានការជួយជំរុញត្រឹមចុងឆ្នាំនេះ។
កិច្ចប្រជុំនៅថ្ងៃព្រហស្បតិ៍នៃក្រុមប្រឹក្សាទេសាភិបាលធនាគារដែលមានសមាជិក ២៥ រូបនឹងជាកិច្ចប្រជុំលើកទី ២ ចាប់តាំងពីធនាគារកណ្តាលអឺរ៉ុបបានដៅអតិផរណារបស់ខ្លួនតិចតួច ដែលជាការផ្លាស់ប្តូរដំបូងចាប់តាំងពីឆ្នាំ ២០០៣។
ធនាគារកណ្តាលពេលនេះកំពុងបង្ហាញឲ្យឃើញអតិផរណាពីរភាគរយជំនួសឱ្យតួលេខដែលតិចជាងនេះ ហើយនឹងអត់ធ្មត់ចំពោះការដាក់គោលដៅហួសកំរិត ឬមិនត្រឹមត្រូវ។
អតិផរណានៅតំបន់អឺរ៉ុបកើនឡើងដល់ ៣ ភាគរយក្នុងខែសីហា ដែលជាកម្រិតខ្ពស់បំផុតក្នុង ១ ទសវត្សរ៍ ដែលរុញច្រានដោយការរីករាលដាលជំងឺ និងកង្វះខាតជាសកលនៃសម្ភារៈដូចជា ឧបករណ៍ពាក់កណ្តាលចម្លងអេឡិចត្រូនិក ប្លាស្ទិក និង ដែក។
ប្រធានធនាគារ ECB លោកស្រី Christine Lagarde កាលពីពេលដំបូងបានសន្យាពិនិត្យមើលអ្វីដែលធនាគារជឿថាជាការកើនឡើងអតិផរណាបណ្តោះអាសន្ន ហើយអ្នកធ្វើគោលនយោបាយរំពឹងថា តម្លៃប្រើប្រាស់នឹងកើនឡើងបន្ថែមទៀតក្នុងខែខាងមុខ មុនការធ្លាក់ចុះមកវិញ។
Isabel Schnabel ជាសមាជិកនៃក្រុមប្រឹក្សាភិបាលធនាគារ ECB បាននិយាយកាលពីខែមុនថា៖ «យើងកាន់តែព្រួយបារម្ភអំពីអត្រាអតិផរណាចុះទាបខ្លាំងក្នុងរយៈពេលមធ្យមជាងកាន់ឡើងខ្ពស់»។
ជាលទ្ធផល អ្នកសង្កេតទាំងឡាយមិនរំពឹងថានឹងមានការផ្លាស់ប្តូរអត្រាការប្រាក់ទាបជាប្រវត្តិសាស្ត្ររបស់ ECB ឬការកែប្រែបន្តិចបន្តួចចំពោះកម្មវិធីទិញមូលបត្របំណុលដ៏ធំរបស់ខ្លួននោះទេ បើទោះបីជាសមាជិក ECB ដែលមានភាពរឹងមាំជាងនេះបង្ហាញពីការត្រៀមខ្លួន ដើម្បីកាត់បន្ថយការជំរុញក៏ដោយ៕ RR