ភ្នំពេញៈ សប្បាយអស្ចារ្យ (Sabay Osja Co., Ltd.) បានក្លាយជាក្រុមហ៊ុនដំបូងគេដែលបានដាក់ពាក្យ និងទទួលបានអាជ្ញាប័ណ្ណតាមរយៈការស្នើសុំវិញ្ញាបនបត្រសេវាបច្ចេកវិទ្យាគមនាគមន៍ និងព័ត៌មានតាមប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន (Single Portal) ដំណាក់កាលទី២។ នេះបើតាមក្រសួងសេដ្ឋកិច្ច និងហិរញ្ញវត្ថុ។
ក្រុមហ៊ុន Sabay Osja បានដាក់ពាក្យស្នើសុំតាមប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាននាថ្ងៃទី ១ ខែ កញ្ញា ឆ្នាំ ២០២១ ហើយទទួលការឯកភាពលើការស្នើសុំវិញ្ញាបនបត្រនៅថ្ងៃទី ២ ខែ កញ្ញា ឆ្នាំ ២០២១។
លោក អៀ អ៊ុយ អគ្គនាយកក្រុមហ៊ុន Sabay Osja បានប្រាប់ ភ្នំពេញ ប៉ុស្តិ៍ថា ការស្នើសុំអាជ្ញាបណ្ណ ឬលិខិតអនុញ្ញាតត្រូវបានធ្វើឡើងតាមប្រព័ន្ធអនឡាញទាំងស្រុងតាមគេហទំព័រ www.registrationsevices.gov.kh។ ការចុះបញ្ជីអាជីវកម្មតាមប្រព័ន្ធនេះចំណេញទាំងពេលវេលា និងថវិកា។
លោកប្រាប់ថា៖ «ប្រព័ន្ធនេះបង្កលក្ខណៈងាយស្រួល ដោយយើងត្រូវបំពេញបែបបទដោយខ្លួនឯង ហើយដំណើរការបានលឿន។ ក្រុមហ៊ុនខ្ញុំបានបង្កើត User ថ្មី និងចុះបញ្ជីថ្មី ពិសេសការបង់កម្រៃសេវាខ្ញុំធ្វើតាមអនឡាញទាំងអស់។ ខ្ញុំបានដាក់ពាក្យក្នុងថ្ងៃទី ១ ខែកញ្ញា ២-៣ ថ្ងៃក្រោយមកយើងអាចទាញយកវិញ្ញាបនបត្រមកប្រើប្រាស់ជាផ្លូវការបានភ្លាមៗ ពិតជាងាយស្រួលមែនប្រព័ន្ធនេះ»។
កាលពីថ្ងៃទី ១ ខែ កញ្ញា ឆ្នាំ ២០២១ ក្រសួងសេដ្ឋកិច្ច និងហិរញ្ញវត្ថុ ដាក់ឱ្យដំណើរការជាផ្លូវការប្រព័ន្ធ Single Portal ក្នុងដំណាក់កាលទី២ ដោយបានបញ្ចូលក្រសួងស្ថាប័នចំនួន ៤ បន្ថែមដើម្បីពង្រីកវិសាលភាពការផ្តល់អាជ្ញាប័ណ្ណ។
ក្រសួង-ស្ថាប័នទាំង ៤ រួមមាន ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួងទេសចរណ៍ ក្រសួងប្រៃសណីយ៍ និងទូរគមនាគមន៍ និងនិយតករអាជីវកម្មអចលនវត្ថុ និងបញ្ចាំនៃអាជ្ញាធរសេវាកម្មហិរញ្ញវត្ថុមិនមែនធនាគារ។
ក្នុងកម្មវិធីប្រកាសដាក់ឱ្យដំណើរការផ្លូវការដំណាក់កាលទី២ នៃ Single Portal លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ប្រព័ន្ធ Single Portal ត្រូវបានធ្វើឡើងក្នុងបំណងកែប្រែបរិយាកាសធុរកិច្ច និងវិនិយោគក្នុងទិសដៅលើកកម្ពស់ភាពប្រកួតប្រជែងរបស់កម្ពុជា ជាពិសេសចូលរួមចំណែករក្សានិរន្តរភាពសេដ្ឋកិច្ចក្នុងបរិការណ៍នៃការរីករាលដាលជំងឺកូវីដ ១៩ តាមរយៈការធ្វើឌីជីថលូបនីយកម្មសេវាសាធារណៈ។
លោកថ្លែងថា៖ «ការដាក់ឱ្យដំណើរការ Single Portal នៅដំណាក់កាលទី២ នេះ បង្ហាញយ៉ាងច្បាស់ពីការកែទម្រង់របស់រដ្ឋាភិបាលក្នុងការលើកកម្ពស់បរិយាកាសធុរកិច្ច និងវិនិយោគនៅកម្ពុជាដែលសម្រេចបានលទ្ធផលល្អដូចការគ្រោងទុក»។
ក្នុងដំណាក់កាលទី១ រដ្ឋាភិបាលកម្ពុជាបានដាក់ឱ្យដំណើរការប្រព័ន្ធ Single Portal ក្នុងថ្ងៃទី ១៥ ខែ មិថុនា ឆ្នាំ ២០២០ ដោយមានក្រសួងស្ថាប័ន ៦ រួមមាន ក្រសួងសេដ្ឋកិច្ច និងហិរញ្ញវត្ថុ ក្រសួងការងារ និងបណ្ដុះបណ្ដាលវិជ្ជាជីវៈ ក្រសួងមហាផ្ទៃ ក្រសួងពាណិជ្ជកម្មអគ្គនាយកដ្ឋានពន្ធដារ និងក្រុមប្រឹក្សាអភិវឌ្ឍន៍កម្ពុជា។
បើតាមលោក អូន ព័ន្ធមុនីរ័ត្ន គិតត្រឹមថ្ងៃទី ២៤ ខែ សីហា ឆ្នាំ ២០២១ ក្រុមហ៊ុនបានចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានមានចំនួន ៧ ៧១៥ និងមានដើមទុនសរុបជិត ៣ ពាន់លានដុល្លារ៕ LA