ភ្នំពេញៈ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុបានតម្រូវឱ្យសហគ្រាសផលិតស្រាបៀរ និងភេសជ្ជៈគ្មានជាតិសុរាក្នុងស្រុកទាំងអស់ត្រូវមានកាតព្វកិច្ចដំឡើងឧបករណ៍វាស់ចំណុះស្រាបៀរ និងភេសជ្ជៈគ្មានជាតិសុរាដែលកាតព្វកិច្ចត្រូវបានដាក់ចេញ ដើម្បីពង្រឹងការគ្រប់គ្រងប្រមូលចំណូលពន្ធអាករគ្រប់ប្រភេទជាពិសេសចំណូលអាករពិសេសលើស្រាបៀរ និងភេសជ្ជៈគ្មានជាតិសុរា។
សេចក្តីណែនាំរបស់អគ្គនាយកដ្ឋានពន្ធដារ បានឱ្យដឹងថា កាតព្វកិច្ចនេះត្រូវបានធ្វើឡើង ដើម្បីឱ្យការអនុវត្តកាតព្វកិច្ចដំឡើង និងប្រើប្រាស់ឧបករណ៍វាស់ចំណុះ ប្រកបដោយលក្ខណៈស្តង់ដាបច្ចេកទេសត្រឹមត្រូវ និងប្រើប្រាស់ទាន់ពេលវេលាកំណត់ ផងដែរ។
សេចក្តីណែនាំនេះ បានបន្តថា អគ្គនាយកដ្ឋានពន្ធដាសូមធ្វើការណែនាំដល់ម្ចាស់សហគ្រាសផលិតស្រាបៀរ និងភេសជ្ជៈគ្មានជាតិសុរាក្នុងស្រុក ទាំងអស់ចំនួន ៤ ចំណុច រួមមាន សហគ្រាសផលិតត្រូវដំឡើងឧបករណ៍វាស់ចំណុះនៅក្នុងទីតាំងរោងចក្រផលិតរបស់ខ្លួននូវនាឡិកាវាស់ចំណុះ (Flowmeter) នាឡិកាវិភាគសារធាតុរាវ (Conductivity Meter) នៅគ្រប់ខ្សែច្រវាក់ផលិតកម្មវេចខ្ចប់ និងប្រអប់ត្រួតពិនិត្យទិន្នន័យ (Field Control Box) មួយនៅក្នុងរោងចក្រ ព្រមទាំងអាចភ្ជាប់ទៅនឹងប្រព័ន្ធអេឡិចត្រូនិកដោយផ្ទាល់ជាមួយនឹងហេដ្ឋារចនាសម្ព័ន្ធបណ្តាញ (Network) របស់អគ្គនាយកដ្ឋានពន្ធដា។
សហគ្រាសផលិតត្រូវអនុវត្តតាមពេលវេលាដែលបានកំណត់ គឺចាប់ពីថ្ងៃទី ២០ ខែ កញ្ញា ឆ្នាំ ២០២១ ត្រូវធ្វើការបញ្ជាទិញឧបករណ៍វាស់ចំណុះទៅកាន់អ្នកផ្គត់ផ្គង់ ហើយចាប់ពីថ្ងៃទី ២៥ ខែ វិច្ឆិកា ឆ្នាំ ២០២១ ត្រូវធ្វើការដំឡើងឧបករណ៍វាស់ចំណុះ ដោយក្រុមអ្នកបច្ចេកទេសរបស់សហគ្រាសផ្គត់ផ្គង់ និងក្រោមការត្រួតពិនិត្យរបស់អគ្គនាយកដ្ឋានពន្ធដារ ព្រមទាំងចាប់ពីថ្ងៃទី ០១ ខែ ធ្នូ ឆ្នាំ ២០២១ នឹងចាប់ផ្តើមអនុវត្តប្រើប្រាស់ឧបករណ៍វាស់ចំណុះ។
សហគ្រាសផលិតត្រូវធ្វើការបញ្ជាទិញដោយផ្ទាល់នូវឧបករណ៍វាស់ចំណុះ (ទាំង Hardware និង Software) ពីសហគ្រាសផ្គត់ផ្គង់ដែលទទួលស្គាល់ពីអគ្គនាយកដ្ឋានពន្ធដារ ឬអាចធ្វើការបញ្ជាទិញដោយផ្ទាល់នូវឧបករណ៍វាស់ចំណុះ (ទាំង Hardware និង Software) ពីក្រុមហ៊ុន Montelektro មានអាសយដ្ឋានការិយាល័យកណ្តាលនៅប្រទេសក្រូអាត សហភាពអឺរ៉ុប ដែលមានគេហទំព័រ www.montelektro.hr និងE-mail; info@montelektro.hr។
ក្នុងករណីដែលសហគ្រាសផលិតជួបការលំបាកក្នុងការបញ្ជាទិញម្ចាស់សហគ្រាសអាចស្នើសុំមកអគ្គនាយកដ្ឋានពន្ធដារដើម្បីធ្វើការសម្របសម្រួលដែលអគ្គនាយកដ្ឋានពន្ធដារនឹងជួយសម្របសម្រួលក្នុងដំណើរការទាំងមូលនៃការរៀបចំអនុវត្តការដំឡើងឧបករណ៍វាស់ចំណុះនៅតាមសហគ្រាសផលិតក្នុងស្រុក។
ចាប់ពីថ្ងៃទី ២៥ ខែ វិច្ឆិកា ឆ្នាំ ២០២១ តទៅ អគ្គនាយកដ្ឋានពន្ធដារនឹងធ្វើការត្រួតពិនិត្យ និងតាមដានការអនុវត្តការដំឡើងឧបករណ៍វាស់ចំណុះនៅតាមបណ្តារោងចក្រផលិតស្រាបៀរ និងភេសជ្ជៈគ្មានជាតិសុរា ព្រមទាំងចាត់វិធានការតាមផ្លូវច្បាប់ដែលមានជាធរមានចំពោះសហគ្រាសដែលមិនបានអនុវត្តតាមសេចក្តីណែនាំនេះ។
អគ្គនាយកដ្ឋានពន្ធដារសង្ឃឹមជឿជាក់យ៉ាងមុតមាំថា ម្ចាស់សហគ្រាសផលិតស្រាបៀរ និងភេសជ្ជៈគ្មានជាតិសុរាក្នុងស្រុកទាំងអស់ នឹងចូលរួមអនុវត្តតាមខ្លឹមសារនៃសេចក្តីណែនាំនេះដោយការទទួលខុសត្រូវ និងប្រសិទ្ធភាពខ្ពស់៕