ភ្នំពេញៈ Telcotech ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនពហុផលិតផល Royal Group ដែលគ្រប់គ្រងដោយវិនិយោគិនក្នុងស្រុកបានចុះបញ្ជីសញ្ញាបណ្ណសាជីវកម្មរបស់ខ្លួនជាផ្លូវការនៅលើក្រុមហ៊ុនផ្សារមូលបត្រកម្ពុជា (CSX) ដោយប្រមូលមូលនិធិថ្មី ២០ លានដុល្លារ សម្រាប់ផែនការពង្រីកអាជីវកម្ម។
លោក គិត ម៉េង ប្រធានក្រុមហ៊ុន Royal Group បានឱ្យដឹងក្នុងអំឡុងពេលពិធីចុះបញ្ជីជាផ្លូវការតាមអនឡាញកាលពីថ្ងៃទី ៩ ខែ កញ្ញា ឆ្នាំ ២០២១ ថា ក្រុមហ៊ុននេះបានចុះកិច្ចព្រមព្រៀងជាមួយមូលនិធិការធានាឥណទាន និងមធ្យោបាយវិនិយោគ (CGIF) ជាភ្នាក់ងារធានាឥណទានមួយដែលបង្កើតឡើងដោយធនាគារអភិវឌ្ឍន៍អាស៊ី និងសមាជិកអាស៊ានបូក ៣ ដែលរួមមានប្រទេសជប៉ុន កូរ៉េខាងត្បូង និងចិន។ CGIF នឹងផ្ដល់ការធានាឥណទានដែលគ្របដណ្ដប់លើទឹកប្រាក់ចំនួន ៨០ ពាន់លានរៀល (២០ ដុល្លារអាមេរិក)។
លោកអះអាង៖ «ក្រុមហ៊ុន Ezecom រួមជាមួយក្រុមហ៊ុន Telcotech គឺជាក្រុមហ៊ុនខ្មែរ ១០០ ភាគរយ ដែលបានខិតខំប្រឹងប្រែងក្នុងការនាំយកកម្រិតខ្ពស់បំផុតនៃការវាយតម្លៃ និងការតភ្ជាប់ដើម្បីប្រជាជនកម្ពុជា។ ការចេញសញ្ញាបណ្ណសាជីវកម្មនេះនឹងអាចឱ្យយើងបន្តនាំមុខក្នុងការបង្កើតអនាគតឌីជីថលរបស់កម្ពុជាតាមរយៈការវិនិយោគលើបច្ចេកវិទ្យាចុងក្រោយបង្អស់ និងយុទ្ធសាស្ដ្រឌីជីថល»។
លោកបន្ត៖ «ក្នុងនាមប្រធានក្រុមហ៊ុន ខ្ញុំមានមោទនភាពយ៉ាងខ្លាំងដែលថានេះគឺជាសញ្ញាបណ្ណសាជីវកម្មដំបូងមិនធ្លាប់មានដែលត្រូវបានចេញដោយក្រុមហ៊ុនដែលគ្រប់គ្រងដោយវិនិយោគិនកម្ពុជាទាំងស្រុង និងការពិតដែលថា វាត្រូវបានធានាដោយ CGIF។ សំខាន់ជាងនេះទៅទៀត វាក៏ជាសញ្ញាបណ្ណសាជីវកម្មដំបូងដែលវិនិយោគដោយឯកជនមិនធ្លាប់មាន ដោយប្រើប្រាស់ប្រព័ន្ធស្ដង់ដានៃការដាក់ប្រាក់បញ្ញើមូលបត្រ និងការចុះបញ្ជីលើផ្សារហ៊ុន»។
លោកបញ្ជាក់ថា តាមរយៈការចេញសញ្ញាបណ្ណសាជីវកម្មនេះ វានឹងបានកសាងផែនទីបង្ហាញផ្លូវ គំរូ និងការអនុវត្តល្អបំផុតនៃការវិនិយោគដោយឯកជនសម្រាប់ទីផ្សារមូលធនកម្ពុជា។
លោកបន្តថា៖ «ក្រុមហ៊ុន Ezecom នឹងប្រើប្រាស់ប្រាក់សញ្ញាបណ្ណសាជីវកម្មនេះ ដើម្បីវិនិយោគបន្ថែមទៀតលើប្រព័ន្ធអេកូស៊ីស្ដែមឌីជីថលរបស់កម្ពុជា»។
លោក ហុង សុហួរ អគ្គនាយក CSX និយាយថា ការបោះផ្សាយ និងចុះបញ្ជីលក់សញ្ញាបណ្ណនេះនឹងធ្វើឱ្យក្រុមហ៊ុនទទួលបាននូវទុនរយៈពេលវែងដែលជាប្រភពទុនថ្មីមួយទៀតបន្ថែមពីលើប្រភពទុនផ្សេងៗ ដែលក្រុមហ៊ុនមានស្រាប់។
លោកបានថ្លែងថា៖ «ខ្ញុំក៏សង្ឃឹមនិងជឿជាក់ថា ជាមួយនឹងភាពជោគជ័យក្នុងការបោះផ្សាយ និងចុះបញ្ជីនូវសញ្ញាបណ្ណនេះក្រុមហ៊ុនអាច ពិចារណាធ្វើការបោះផ្សាយលក់មូលបត្រកម្មសិទ្ធិ ឬភាគហ៊ុន ជូនសាធារណជនជាពិសេសប្រជាជនខ្មែរ ដើម្បីមានឱកាសវិនិយោគជាមួយការរីកចម្រើនរបស់ក្រុមហ៊ុនក្នុងអនាគត»។
លោក ស៊ូ សុជាតិ អគ្គនាយកនៃនិយតករមូលបត្រកម្ពុជាបាននិយាយថា វត្តមានរបស់ក្រុមហ៊ុន Telcotech បង្ហាញពីការវិវឌ្ឍថ្មីមួយទៀតដែលទីផ្សារមូលបត្រកម្ពុជានឹងមានក្រុមហ៊ុនចុះបញ្ជី លក់មូលបត្របំណុលទី៧ នៅក្នុងទីផ្សារមូលបត្រកម្ពុជា និងត្រូវជាក្រុមហ៊ុនទី១៥ ដែលបានចុះបញ្ជី លក់មូលបត្រនៅផ្សារមូលបត្រកម្ពុជា។
លោកបញ្ជាក់ថា៖ «ការចុះបញ្ជីលក់មូលបត្រជាផ្លូវការរបស់ក្រុមហ៊ុន Telcotech នេះបានសបញ្ជាក់ឱ្យឃើញថា ទីផ្សារមូលបត្រកម្ពុជាកំពុងតែមានការរីកចម្រើនជាមួយនឹងកំណើននៃក្រុមហ៊ុនបោះផ្សាយមូលបត្រ»។
គិតត្រឹមឆ្នាំ ២០២១ នេះ សាច់ប្រាក់ដែលប្រមូលបានពីការបោះផ្សាយលក់មូលបត្របំណុលរបស់ក្រុមហ៊ុនទាំង ៦ កន្លងមកមានប្រមាណជា ១៤៣ លានដុល្លារ ដែលនឹងកើនរហូតដល់ប្រមាណ ១៦៣ លានដុល្លារ បន្ទាប់ពីមានកំណើនក្រុមហ៊ុន Telcotech ១ ទៀតនេះ៕ LA