.jpg)
កិច្ចប្រជុំពេញអង្គរដ្ឋសភាជាតិ កាលពីថ្ងៃទី ៩ ខែកញ្ញា ឆ្នាំ ២០២១។ រូបថត រដ្ឋសភាជាតិ
ភ្នំពេញៈ សេចក្តីព្រាងច្បាប់ស្តីពី «វិនិយោគនៃព្រះរាជាណាចក្រកម្ពុជា» ត្រូវបានរដ្ឋសភាជាតិអនុម័តទាំងស្រុងហើយក្នុងកិច្ចប្រជុំពេញអង្គនៅថ្ងៃទី ៩ ខែកញ្ញា ឆ្នាំ ២០២១ ដែលច្បាប់នេះមានតួនាទីយ៉ាងសំខាន់ក្នុងការទាក់ទាញការវិនិយោគទាំងក្នុង និងក្រៅប្រទេសមកវិនិយោគនៅកម្ពុជា។
អ្នកនាំពាក្យនៃរាជរដ្ឋាភិបាលកម្ពុជាលោក ផៃ ស៊ីផាន ធ្លាប់បានលើកឡើងថា សេចក្តីព្រាងច្បាប់វិនិយោគថ្មីនេះត្រូវបានផ្តួចផ្តើម និងចង្អុលបង្ហាញដោយឯកសារគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០១៥-២០២៥។
លោកបន្តថា សេចក្តីព្រាងច្បាប់នេះ រៀបចំឡើងក្នុងគោលបំណងបង្កើតនូវក្របខ័ណ្ឌគតិយុត្តដែលបើកចំហមានតម្លាភាព សម្រាប់ការវិនិយោគ ដើម្បីទាក់ទាញ និងលើកកម្ពស់ការវិនិយោគដោយបុគ្គលសញ្ជាតិខ្មែរ ឬបរទេស ប្រកបដោយគុណភាព ប្រសិទ្ធភាព និងប្រសិទ្ធផលសំដៅអភិវឌ្ឍសង្គម សេដ្ឋកិច្ចនៅកម្ពុជា។
លោកបានឱ្យដឹងថា៖ «ខ្លឹមសារសំខាន់ៗក្នុងសេចក្តីព្រាងច្បាប់នេះមានដូចជា ការបង្កើតរបបលើកទឹកចិត្តវិនិយោគ, ការធ្វើទំនើបកម្ម, ការបង្កើនផលិតភាពនៃឧស្សាហកម្មក្នុងស្រុក, ការពង្រឹងការតភ្ជាប់ទៅក្នុងខ្សែចង្វាក់ផ្គត់ផ្គង់ក្នុងតំបន់ និងសកលលោក, ការផ្ទេរបច្ចេកវិទ្យា, ការបង្កើនភាពប្រកួតប្រជែងរបស់កម្ពុជា, ការធ្វើពិពិធកម្មសេដ្ឋកិច្ច និងការផ្តល់ការការពារសិទ្ធិ និងផលប្រយោជន៍ស្របច្បាប់ដល់វិនិយោគិននៅកម្ពុជា»។
បើតាមទីស្តីការគណៈរដ្ឋមន្ត្រី សេចក្តីព្រាងច្បាប់ស្តីពីវិនិយោគនៃព្រះរាជាណាចក្រកម្ពុជា ដែលបានតាក់តែងថ្មីនេះ គឺដើម្បីជំនួសច្បាប់ស្តីពីវិនិយោគនៃព្រះរាជាណាចក្រកម្ពុជា ដែលចូលជាធរមានតាំងពីឆ្នាំ ១៩៩៤ និងឆ្នាំ ២០០៣ ដែលមាន ១២ ជំពូក និង ៤២ មាត្រា។
លោកស្រី កែវ មុំ ប្រធានក្រុមប្រឹក្សាភិបាលក្រុមហ៊ុន លីលីហ៊្វូដ អ៊ិនដាសទ្រី ខូអិលធីឌី បានប្រាប់ភ្នំពេញប៉ុស្តិ៍កាលពីខែកក្កដា ច្បាប់ថ្មីនឹងជួយអូសទាញអ្នកវិនិយោគជាច្រើនមកវិនិយោគនៅកម្ពុជា ពិសេសលើផ្នែកឧស្សាហកម្មសហគ្រាសធុនតូច និងមធ្យម។
លោកស្រីប្រាប់ថា៖ «ខ្ញុំសង្ឃឹមថានឹងផ្តល់ឱកាសកាន់តែច្រើនដល់សហគ្រាសធុនតូច និងមធ្យមផលិតកែច្នៃវត្ថុធាតុដើម ឬផលិតផលពាក់កណ្តាលសម្រេចដើម្បីផ្គត់ផ្គង់ឱ្យឧស្សាហកម្មធំៗដែលនឹងចូលមកបណ្តាក់ទុននៅកម្ពុជា ព្រមទាំងបង្កើតឱកាសការងារកាន់តែច្រើន និងជួយសេដ្ឋកិច្ចជាតិ»។
បើយោងតាមក្រុមប្រឹក្សាអភិវឌ្ឍន៍កម្ពុជា (CDC) គិតត្រឹមឆមាសទី១ ឆ្នាំ ២០២១ កម្ពុជាបានអនុម័តគម្រោងវិនិយោគថ្មី និងគម្រោងពង្រីកផលិតកម្មចំនួន ៨៧ ជាមួយនឹងទុនវិនិយោគជាង ២ ៩៦៩,៦២ លានដុល្លារ។
របាយការណ៍ក្រសួងពាណិជ្ជកម្មឱ្យដឹងថា ក្នុងឆ្នាំ ២០២០ កម្ពុជាបាននាំចេញទំនិញទៅទីផ្សារអន្តរជាតិក្នុងតម្លៃ ១៧ ២១៥,៣៧ លានដុល្លារ កើនឡើង ១៦,៧២ ភាគរយធៀបទៅនឹងឆ្នាំ ២០១៩ ដែលមានចំនួន ១៤ ៧៤៨,៧៤ លានដុល្លារ៕ LA
