.jpg)
លោក ងិន ឆាយ អគ្គនាយកនៃអគ្គនាយកដ្ឋានកសិកម្ម ក្នុងជំនួបជាមួយភាគីកូរ៉េ កាលពីថ្ងៃទី ៨ កញ្ញា។ រូបថត GDA
ភ្នំពេញៈ រដ្ឋាភិបាលកូរ៉េខាងត្បូងបានផ្តល់ថវិកា ៣,៣ លានដុល្លារ ដល់ក្រសួងកសិកម្ម រុក្ខាប្រមាញ់ និងនេសាទ សម្រាប់អនុវត្តគម្រោង «ការបង្ហាញ និងការតភ្ជាប់ខ្សែចង្វាក់តម្លៃនៃការផលិតបន្លែ មានតម្លៃខ្ពស់នៅតំបន់ភ្នំប្រទេសកម្ពុជា»។
ក្នុងជំនួបពិភាក្សាជាមួយនឹងលោក Park Kiwook ប្រធានក្រុមជំនាញការមកពីសាធារណរដ្ឋកូរ៉េ កាលពីថ្ងៃទី ៨ ខែកញ្ញា លោក ងិន ឆាយ អគ្គនាយកនៃអគ្គនាយកដ្ឋានកសិកម្មបានឱ្យដឹងថា គម្រោងនេះនឹងអនុវត្តក្នុងរយៈពេល ៤៨ ខែ (២០២១-២០២៤) ដែលមានការគាំទ្រថវិកាពីរដ្ឋាភិបាលកូរ៉េចំនួន ៣ ៣០០ ០០០ ដុល្លារ។
យោងតាម លោក ងិន ឆាយ គម្រោងនេះបង្កើតឡើងនៅក្នុងគោលបំណងជំរុញផលិតកម្មដំណាំបន្លែដែលមានតម្លៃសេដ្ឋកិច្ចខ្ពស់ និងបង្កើនជីវភាពរស់នៅរបស់កសិករតាមរយៈការអភិវឌ្ឍប្រព័ន្ធផលិតកម្មគ្រាប់ពូជដំឡូងបារាំង។ គម្រោងនេះក៏នឹងបង្ហាញពីផលិតកម្មគ្រាប់ពូជដំណាំបន្លែដែលមានតម្លៃសេដ្ឋកិច្ចខ្ពស់ចំនួន ៤ មុខដែល រួមមាន ស្ពៃក្តោប ស្ពៃបូកគោ ផ្កាខាត់ណា និងដំឡូងបារាំង នៅក្នុងខេត្តមណ្ឌលគិរី។
លោកប្រាប់ថា៖ «គម្រោងនេះពិតជាមានសារៈសំខាន់ក្នុងការរួមចំណែកអភិវឌ្ឍន៍ និងពង្រឹងអនុវិស័យដំណាំបន្លែ ជាពិសេសប្រភេទដំណាំបន្លែមានតម្លៃសេដ្ឋកិច្ចខ្ពស់ ដើម្បីផ្គត់ផ្គង់តម្រូវការទីផ្សារឱ្យបានគ្រប់នៅរដូវកាលក្រខ្សត់ តាមរយៈការកំណត់ប្រតិទិនដាំដុះ ១ ឆ្នាំពេញឱ្យបានច្បាស់លាស់»។
លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរី បានប្រាប់ ភ្នំពេញ ប៉ុស្តិ៍ថា គម្រោងនេះមិនទាន់ចាប់ផ្តើមអនុវត្តទេ ដោយសារការរីករាលដាលជំងឺកូវីដ ១៩ ហើយលោករំពឹងថានឹងអនុវត្តក្នុងពេលឆាប់ៗ។
ដំឡូងបារាំង គឺជាដំណាំរដូវកាល ដែលកសិករចាប់ផ្តើមដាំក្នុងខែវិច្ឆិកា ប៉ុន្តែពួកគេតែងតែប្រឈមនឹងបញ្ហាពូជ។ តាមរយៈគម្រោងនេះ ភាគីកូរ៉េនឹងធ្វើការសិក្សាស្រាវជ្រាវពូជដំឡូងបារាំង ដោយសហការជាមួយអគ្គនាយកដ្ឋានកសិកម្ម។
លោកនិយាយថា៖ «ចំពោះដំណាំផ្សេងៗទៀតដូចជា ស្ពៃក្តោប ស្ពៃបូកគោ ផ្កាខាត់ណា ប្រជាកសិករអាចដាំដុះបានល្អដោយមន្ទីរកសិកម្ម និងក្រសួងបានណែនាំឱ្យកសិករដាំដុះនៅក្នុងផ្ទះសំណាញ់»។
លោកឱ្យដឹងទៀតថា នៅក្នុងខេត្តមណ្ឌលគិរីមានផ្ទៃដាំដុះដំណាំបន្លែប្រមាណ ៣ ម៉ឺនហិកតាក្នុងនោះការដាំដំឡូងបារាំង គឺធ្វើនៅលើផ្ទៃដីតូចៗប៉ុណ្ណោះ។ លោកបន្តថា៖ «គម្រោងនេះនឹងជួយផ្តល់បច្ចេកទេសបន្ថែមទៅដល់ប្រជាកសិករ ពិសេសការផលិតពូជដំឡូងបារាំង»។
លោក Park Kiwook បានលើកឡើងថា ក្រុមការងាររបស់លោកនឹងរៀបចំខ្សែចង្វាក់ផលិតកម្មដំណាំបន្លែដែលពេញលេញព្រមជាមួយការបញ្ចូលបច្ចេកវិទ្យាទំនើបទៅក្នុងគ្រប់ដំណាក់កាលនៃខ្សែចង្វាក់ផលិតកម្ម ដើម្បីបង្កើតបានគំរូផលិតកម្មដំណាំបន្លែក្នុងលក្ខខណ្ឌសមស្របសម្រាប់ខេត្តមណ្ឌលគិរី។
បើតាមក្រសួងកសិកម្មនៅក្នុងឆ្នាំ ២០១៩ ផ្ទៃដីផលិតកម្មដំណាំបន្លែសរុបទូទាំងប្រទេសមានចំនួន ៥៧ ២០៨ ហិកតា ដែលអាចប្រមូលផលបានចំនួន ៦៨១ ០៩៩ តោន។
ចំណែកការប្រមូលផលបន្លែក្នុងឆ្នាំ ២០២០ បាន ៧១៦ ១១៣ តោន ដែលរួមចំណែក ៦៨ ភាគរយនៃតម្រូវការទីផ្សារសរុប។ ដើម្បីបំពេញតម្រូវការទីផ្សារកម្ពុជាចាំបាច់ត្រូវនាំចូលបន្លែ ៣២៩ ៦១២ តោន ដែលភាគច្រើនបន្លែដែលកម្ពុជាមិនអាចផលិតបាន៕ LA
