.jpg)
ក្រុមអ្នកបច្ចេកទេសកំពុងតភ្ជាប់បណ្តាញចែកចាយអគ្គិសនី។ ហេង ជីវ័ន
ភ្នំពេញៈ អាជ្ញាធរអគ្គិសនីកម្ពុជានឹងធ្វើការពិគ្រោះយោបល់ជាសាធារណៈលើគម្រោងកំណត់បញ្ជីថ្លៃលក់អគ្គិសនី ឆ្នាំ ២០២២ ពីប្រភពបណ្តាញជាតិសម្រាប់លក់ឱ្យអ្នកកាន់អាជ្ញាប័ណ្ណដែលទិញអគ្គិសនីពីអគ្គិសនីកម្ពុជា និងពីអ្នកកាន់អាជ្ញាប័ណ្ណបញ្ជូនរងឯកជន ដើម្បីជួយសម្របសម្រួលដល់អ្នកទទួលបានសេវាអគ្គិសនីមួយកាន់តែប្រសើរ តាមរយៈអត្រាថ្លៃលក់មួយសមរម្យសម្រាប់លំនៅឋាន និងសហគ្រាស។ នេះបើតាមសេចក្តីជូនដំណឹងរបស់អាជ្ញាធរអគ្គិសនីកម្ពុជាកាលពីថ្ងៃទី ១០ ខែកញ្ញា។
សេចក្តីជូនដំណឹងបន្តថា ការកំណត់បញ្ជីថ្លៃលក់អគ្គិសនីនឹងអនុវត្តចំពោះថាមពលប្រើប្រាស់ចាប់ពីដើមខែមករា ឆ្នាំ ២០២២ ត្រូវនឹងវិក្កយបត្រចេញចាប់ពីថ្ងៃទី ២០ ខែ មករា ឆ្នាំ ២០២២ តទៅ តាមលក្ខខណ្ឌនៃការទិញ រួមមាន ការទិញអគ្គិសនីពីទ្វារចរន្ត MV នៃអនុស្ថានីយក្នុងអត្រាថ្លៃលក់ ០,១១៣៨ ដុល្លារ/KWh ហើយទិញអគ្គិសនីពីខ្សែបញ្ជូនរងតាមនាឡិកាស្ទង់ MV អត្រាថ្លៃលក់ចំនួន ០,១២៩០ ដុល្លារ/KWh។
ព្រមទាំងការទិញអគ្គិសនីពីខ្សែបញ្ជូនរង ក្រោមត្រង់ស្វូវិនិយោគដោយអ្នកទិញតាមនាឡិកាស្ទង់ LV អត្រាថ្លៃលក់ចំនួន ០,១៣៤១៦ ដុល្លារ/KWh និងទិញអគ្គិសនីពីខ្សែបញ្ជូនរង ក្រោមត្រង់ស្វូវិនិយោគដោយអ្នកលក់តាមនាឡិកាស្ទង់ LV ក្នុងអត្រាថ្លៃលក់ចំនួន ០,១៤២១៦ ដុល្លារ។
តំណាងក្រុមហ៊ុន ណារ៉េត លីមីធិត អភិវឌ្ឍន៍អគ្គិសនីខេត្តពោធិ៍សាត់ បានប្រាប់ ភ្នំពេញ ប៉ុស្តិ៍ថា ជារៀងរាល់ឆ្នាំ ក្រុមហ៊ុនតែងចូលរួមពិគ្រោះយោបល់លើគម្រោងកំណត់បញ្ជីថ្លៃលក់អគ្គិសនីជាមួយអាជ្ញាធរអគ្គិសនីកម្ពុជា។ លោកស្រីប្រាប់ថា៖ «ខ្ញុំមិនមានជំទាស់នឹងការកំណត់តម្លៃលក់អគ្គិសនីរបស់អាជ្ញាធរអគ្គិសនីកម្ពុជាទេ គាត់កំណត់ប៉ុន្មានយើងធ្វើតាម»។
សេចក្តីជូនដំណឹងបានបន្តថា អនុវត្តតាមនីតិវិធីកំណត់របស់ច្បាប់ស្តីពីអគ្គិសនីកម្ពុជា អាជ្ញាធរអគ្គិសនីកម្ពុជាសូមដាក់ «ឯកសារបញ្ជីថ្លៃលក់អគ្គិសនី» នេះពិគ្រោះយោបល់ជាសាធារណៈជាមួយនឹងក្រសួងស្ថាប័នរដ្ឋាភិបាល និងអ្នកកាន់អាជ្ញាប័ណ្ណដែលទិញអគ្គិសនីអាជ្ញាធរអគ្គិសនីកម្ពុជាចាប់ពីថ្ងៃជូនដំណឹងនេះ រហូតដល់ថ្ងៃទី ១០ ខែ តុលា ឆ្នាំ ២០២១។
ក្រោយថ្ងៃទី ១០ ខែតុលា «ឯកសារបញ្ជីថ្លៃលក់អគ្គិសនី» ថ្មីនឹងត្រូវចាត់ទុកថា ឆ្លងកាត់ការពិគ្រោះយោបល់រួច ហើយអាជ្ញាធរអគ្គិសនីកម្ពុជាអាចធ្វើការពិនិត្យ និងអនុម័តបញ្ជីថ្លៃលក់អគ្គិសនីថ្មីនេះទៅតាមការកំណត់របស់ច្បាប់។
អាជ្ញាធរអគ្គិសនីកម្ពុជាមានភារកិច្ចចេញអាជ្ញាប័ណ្ណធ្វើសេវាកម្ម អនុម័ត និងដាក់ឱ្យអនុវត្តស្តង់ដាប្រតិបត្តិសម្រាប់អ្នកកាន់អាជ្ញាប័ណ្ណ ដើម្បីធានានូវគុណភាពនៃការផ្គត់ផ្គង់ និងសេវាកម្មឱ្យអ្នកប្រើប្រាស់ និងកំណត់អត្រាថ្លៃលក់ និងបន្ទុកសេវាអគ្គិសនី ដើម្បីឱ្យយុត្តិធម៌សម្រាប់អ្នកប្រើ និងអ្នកកាន់អាជ្ញាប័ណ្ណ។
អាជ្ញាធរអគ្គិសនីកម្ពុជាបានផ្តល់អាជ្ញាប័ណ្ណចែកចាយសរុបចំនួន ៤៦៣ នៅទូទាំងប្រទេស កាលពីឆ្នាំ ២០២០។ នៅចុងឆ្នាំ ២០២០ ភូមិមានអគ្គិសនីប្រើប្រាស់មាន ១៣ ៧៩៨ ភូមិ ស្មើ ៩៧,៣៩ ភាគរយ និងភូមិពុំទាន់មានអគ្គិសនីប្រើប្រាស់មានចំនួន ៣៧០ ភូមិស្មើនឹង ២,៦១ ភាគរយ៕ LA
វីដេអូ៖
