ភ្នំពេញៈ កម្ពុជាទទួលបានចំណូលពីពន្ធគយ ១ ៥២០ ដុល្លារ ក្នុងរយៈពេល ៨ ខែដើមឆ្នាំ ២០២១ ស្មើ ៦៤,២ ភាគរយ នៃផែនការកំណត់ដោយច្បាប់ហិរញ្ញវត្ថុ ទោះបីជាមានការរីករាលដាលនៃជំងឺកូវីដ ១៩ ក្តី។
តួលេខនេះត្រូវបានលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាលើកឡើងក្នុងសន្និសីទសារព័ត៌មានកាលពីថ្ងៃទី ១០ ខែកញ្ញា ស្ដីពី «ការប្រមូលពន្ធនាំចូលលើយានយន្តជ្រកក្រោមស្លាកលេខផ្សេងៗ និងគ្មានពន្ធ និងអាករនាំចូល» តាមរយៈប្រព័ន្ធអនឡាញ។
នៅក្នុងកម្មវិធីនេះ លោកលើកឡើងទៀតថា អគ្គនាយកដ្ឋានគយ និងរដ្ឋាករកម្ពុជាបានដើរតួនាទីយ៉ាងសំខាន់ក្នុងការប្រមូលពន្ធអាករនាំចេញ-នាំចូលពីការធ្វើពាណិជ្ជកម្មអន្ដរជាតិ ដើម្បីចំណូលជាតិ។
លោកបានបន្ថែមថា ការនាំចូលរថយន្ត គ្រឿងចក្រ ម៉ូតូ និងយានយន្តមួយចំនួនទៀតគឺជាប្រភពទំនិញដែលបានរួមចំណែកដល់ការជំរុញកំណើនការប្រមូលពន្ធគយ ជាពិសេសការប្រមូលពន្ធលើការនាំចូលរថយន្តជ្រកក្រោមស្លាក ខ.ម និង ន.ប។
លោក លឹម ហេង អនុប្រធានសភាពាណិជ្ជកម្មកម្ពុជាបានសង្កេតឃើញថា ចំណូលពន្ធគយនៅតែមានកំណើនមានន័យថា ការនាំចេញនាំចូលរបស់កម្ពុជានៅតែដំណើរការល្អ បើទោះបីកំពុងតែជួបវិបត្តិកូវីដក៏ដោយ។
លោកបានបញ្ជាក់ថា៖ «ដំណើរការសេដ្ឋកិច្ចនៅក្នុងប្រទេសយើងគឺនៅតែល្អ។ តម្រូវការសម្ភារសាងសង់ ក៏ដូចជាប្រើប្រាស់ ឬក៏បម្រើឱ្យវិស័យផ្សេងៗនៅតែមាន ដែលនេះឆ្លុះបញ្ចាំងថា សេដ្ឋកិច្ចមានដំណើរការជាធម្មតា»។
លោកបន្តថា៖ «ដំណើរការសេដ្ឋកិច្ចនៅតែល្អប្រសើរទន្ទឹមពេលដែលយើងកំពុងតែចាក់វ៉ាក់សាំង។ ភ្នំពេញឥឡូវនេះជាប់សឹងតែថាលេខ ១ ក្នុងពិភពលោកហើយដែលបានចាក់វ៉ាក់សាំងគ្រប់ចំនួនប្រជាពលរដ្ឋដែលនៅក្នុងទីក្រុង ក៏ដូចជាឥឡូវឈានដល់ការចាក់ដូសទី ៣ ទៀត។ ទាំងអស់នេះគឺជាការទាក់ទាញវិនិយោគបន្ថែមទៀតដោយពួកគេមិនមានការរួញរា ព្រោះអីគេឃើញថាប្រទេសយើងនឹងកាត់បន្ថយនៃការឆ្លងបានច្រើន និងអាចទប់ស្កាត់កូវីដបានល្អ ដូច្នេះការវិនិយោគនឹងមកបណ្ដើរៗដូចជាក្រុមហ៊ុនចិនជាដើមដែលកំពុងមកបណ្ដើរៗ ហើយ ក៏នឹងមានក្រុមហ៊ុនពីបណ្ដាប្រទេសផ្សេងៗទៀតកំពុងសម្លឹងឃើញកម្ពុជាក្នុងការទទួលបានកិច្ចព្រមព្រៀងពាណិជ្ជកម្មសេរីជាមួយចិនផងដែរ»។
«ខ្ញុំគិតថា នេះជារឿងមួយល្អហើយព្រោះបើចំណូលពីពន្ធគយយើងកើនឡើង ចំណូលផ្ទៃក្នុងយើង (ពន្ធដារ) ក៏មិនធ្លាក់ចុះប៉ុន្មានដែរ។ យើងខ្លាចបំផុតចំណូលពន្ធគយធ្លាក់ចុះក៏វាពាក់ព័ន្ធដល់ចំណូលពន្ធដារដែរ។ ពន្ធដារទទួលការលក់ដូរទំនិញផ្សេងៗនឹងធ្លាក់ចុះបើគ្មានការនាំចូលកើនឡើង។ ម្យ៉ាងទៀតការនាំចេញកើនឡើងវាធ្វើឱ្យចំណូលពន្ធដារ ចំណូលពន្ធផ្ទៃក្នុងយើងនឹងមានលំនឹងផងដែរ។ ពិតមែនតែមានការធ្លាក់ចុះតិចតួចក្នុងអំឡុងវិបត្តិកូវីដ ១៩ ក៏ខ្ញុំនៅតែជឿថា បើការនាំចូលកើនឡើង វានឹងនាំឱ្យចរន្តសេដ្ឋកិច្ចផ្ទៃក្នុងរបស់យើងដំណើរការល្អទៅតាមនោះដែរ»។ នេះបើយោងតាមលោក លឹម ហេង។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជាឱ្យដឹងថា ក្នុងឆ្នាំ ២០២០ ការប្រមូលចំណូលសម្រេចបាន ២៤១៩,៦ លានដុល្លារ ធ្លាក់ចុះ ២៤,៨ ភាគរយធៀបឆ្នាំ ២០១៩៕ LA