.jpg)
លោក លឹម ហេង (ឆ្វេង) អនុប្រធានសភាពាណិជ្ជកម្ម ក្នុងកិច្ចប្រជុំនាពេលកន្លងមក។ រូបថត Lim Heng's Facebook
ភ្នំពេញៈ កម្ពុជាបានបញ្ជូនក្រុមហ៊ុនចំនួន ១៨ ទៅចូលរួមពិព័រណ៍ចិន-អាស៊ាន លើកទី១៨ នៅមជ្ឈមណ្ឌលតាំងពិព័រណ៍ និងសន្និសីទអន្តរជាតិទីក្រុងណាននីង ប្រទេសចិន។ នេះបើតាមក្រសួងពាណិជ្ជកម្ម។
ពិព័រណ៍ចិន-អាស៊ានលើកទី១៨ រៀបចំឡើងដោយមានការចូលរួមដោយផ្ទាល់ និងតាមអនឡាញដែលមានរយៈពេល ៤ ថ្ងៃ ចាប់ពីថ្ងៃទី ១០-១៣ ខែ កញ្ញា ឆ្នាំ ២០២១ នៅទីក្រុងណាននីងនៃតំបន់ស្វយ័តក្វាងស៊ី ប្រទេសចិន។
ក្រសួងពាណិជ្ជកម្មឱ្យដឹងថា ក្នុងចំណោមក្រុមហ៊ុនទាំង ១៨ គឺមានក្រុមហ៊ុនចូលរួមផ្ទាល់ចំនួន ៧ និងក្រុមហ៊ុនចូលរួមតាមអនឡាញ ១១ ដោយមានស្តង់សរុបចំនួន ៥៣។
ក្រសួងពាណិជ្ជកម្មបានសង់ផ្ទះរួមមានទំហំ ៨១ ម៉ែត្រការ៉េតាមរចនាប័ទ្មខ្មែរដើម្បីដាក់តាំងផលិតផល និងរូបភាពស្តីអំពីសេដ្ឋកិច្ច ពាណិជ្ជកម្ម វិនិយោគ និងទេសចរណ៍សម្រាប់ផ្សព្វផ្សាយក្នុងព្រឹត្តិការណ៍នេះផងដែរ។ ផលិតផលដាក់តាំងក្នុងពិព័រណ៍នេះរួមមាន ផលិតផលកសិកម្មដូចជា អង្ករ ដំណាប់ស្វាយ ម្រេច គ្រាប់ស្វាយចន្ទី អាហារក្រៀម ភេសជ្ជៈព្រមទាំងគម្រោងទាក់ទាញវិនិយោគមួយចំនួនទៀត។
អនុប្រធានសភាពាណិជ្ជកម្ម លោក លឹម ហេង កត់សម្គាល់ថា កម្ពុជាក៏ដូចជាប្រទេសក្នុងសមាគមអាស៊ានដទៃទៀតនឹងទទួលបានឱកាសបង្ហាញផលិតផលខ្លួនក្នុងព្រឹត្តិការណ៍ពិព័រណ៍នេះ ព្រោះប្រទេសចិនជាទីផ្សារធំជាងគេនៅក្នុងតំបន់អាស៊ីអាគ្នេយ៍។
លោកនិយាយថា៖ «ខ្ញុំគិតថាផលប្រយោជន៍មិនមែនសម្រាប់តែក្រុមហ៊ុនកម្ពុជាដែលចូលរួមទេ ប៉ុន្តែវាជាផលប្រយោជន៍របស់កម្ពុជាទាំងមូល ដែលបាននាំយកផលិតផលជាតិទៅចូលរួមតាំងបង្ហាញ ដើម្បីទាក់ទាញវិនិយោគិនបរទេស ក៏ដូចជា ភ្ញៀវទេសចរចិនមកកម្ពុជា។ ខ្ញុំជឿជាក់ថា ក្រោយវិបត្តិកូវីដ ១៩ ភ្ញៀវទេសចរចិននឹងមកលេងកម្ពុជាកាន់តែច្រើន»។
នាយករដ្ឋមន្ត្រីកម្ពុជា លោក ហ៊ុន សែន បានថ្លែងសុន្ទរកថាបើកពិធីនេះតាមរយៈវីដេអូថតទុក ហើយដែលបានចាក់ផ្សាយក្នុងពិធីសម្ពោធពិព័រណ៍នេះថា គឺជាសក្ខីកម្មនៃភាពជោគជ័យនៃទំនាក់ទំនងដៃគូសន្ទនារវាងចិន-អាស៊ាន ដែលបាននាំមកនូវការអភិវឌ្ឍលើគ្រប់វិស័យ និងវិបុលភាពសម្រាប់ប្រជាជនចិន និងអាស៊ាន។
លោកលើកឡើងថា អាស៊ាន-ចិនត្រូវបន្តកិច្ចសហការលើគ្រប់វិស័យ ជាពិសេសវិស័យហិរញ្ញវត្ថុ និងពាណិជ្ជកម្មក្នុងគោលបំណង ដើម្បីពន្លឿនការស្តារសង្គមសេដ្ឋកិច្ចឡើងវិញ ក្រោយវិបត្តិកូវីដ ១៩ តាមរយៈការបើកឱ្យទូលាយជាងមុននូវទីផ្សារ និងលំហូរពាណិជ្ជកម្មសេរី លំហូរវិនិយោគ ដើម្បីអនុញ្ញាតឱ្យក្នុងតំបន់ មានលទ្ធភាពជំរុញការនាំចេញផលិតផល និងសេវា ដែលមានសក្តានុពល និងទទួលបានធនធានហិរញ្ញវត្ថុបន្ថែមទៀត។
លោកថ្លែងថា៖ «ជាទិសដៅពេលអនាគត ចិន និងអាស៊ានត្រូវពួតដៃគ្នាប្រយុទ្ធប្រឆាំងនឹងយកឈ្នះលើជំងឺកូវីដ ១៩ ដើម្បីធានានិរន្តរភាពនៃសកម្មភាពសង្គម សេដ្ឋកិច្ច និងការរស់រានមានជីវិតរបស់ប្រជាជន។ ការប្រយុទ្ធប្រឆាំងនឹងជំងឺកូវីដ ១៩ ជាសកល ទាមទារនូវសាមគ្គីភាព ការជឿទុកចិត្ត ការគិតគូរ និងអនុវត្តរួមគ្នាប្រកបដោយភាពហ្មត់ចត់ ក្រោមយន្តការពហុភាគីនិយម និងគោរពច្បាប់អន្តរជាតិ និងអធិបតេយ្យរបស់ប្រទេសនីមួយៗ»។
ទិន្នន័យក្រសួងពាណិជ្ជកម្មឱ្យដឹងថា ក្នុងឆ្នាំ ២០២០ ទំហំពាណិជ្ជកម្មទ្វេភាគីកម្ពុជា-ចិនមានតម្លៃសរុប ៨ ១១៨,០៧ លានដុល្លារ ធ្លាក់ចុះ ៥,២ ភាគរយធៀបនឹងឆ្នាំ ២០១៩ ដែលមាន ៨ ៥៦៣,៣១ ដុល្លារ។
បើតាម លោក ប៉ាន់ សូរស័ក្តិ រដ្ឋមន្ត្រីក្រសួងពាណិជ្ជកម្ម ក្នុងរយៈពេល ៣០ ឆ្នាំកន្លងមកនេះទំនាក់ទំនងពាណិជ្ជកម្ម និងកិច្ចសហប្រតិបត្តិការសេដ្ឋកិច្ចរវាងអាស៊ាន-ចិនបានបន្តរីកចម្រើនជាលំដាប់ ដោយទំហំពាណិជ្ជកម្មសរុបរវាងអាស៊ាន និងចិនសម្រេចបាន ៥០៧,៩ ពាន់លានដុល្លារ កាលពីឆ្នាំ ២០១៩ និងរំហូរការវិនិយោគផ្ទាល់បរទេស (FDI) ពីប្រទេសចិន មកតំបន់អាស៊ានមាន ៨,៩៧ ពាន់លានដុល្លារ៕ LA
