.jpg)
ភ្ញៀវទេសចរដើរទស្សនាប្រាសាទអង្គរវត្ត មុនពេលមានវិបត្តិជំងឺកូវីដ ១៩។ ហេង ជីវ័ន
ភ្នំពេញៈ ស្របពេលពិធីបុណ្យភ្ជុំបិណ្ឌនឹងចូលមកដល់នាដើមខែតុលាខាងមុខ ក្រសួងទេសចរណ៍បានដាក់ចេញសារាចរណែនាំដល់អង្គភាពចំណុះរបស់ខ្លួនឱ្យខំពង្រឹងគុណភាពផលិតផលទេសចរណ៍ និងចូលរួមទប់ស្កាត់ការរីករាលដាលជំងឺកូវីដ ១៩ ឱ្យមានប្រសិទ្ធភាព ខណៈអ្នកនៅក្នុងវិស័យនេះអះអាងថា ទេសចរណ៍ក្នុងស្រុកចាប់ផ្តើមកម្រើកវិញបណ្តើរៗហើយ។
ពិធីបុណ្យភ្ជុំបិណ្ឌប្រពៃណីជាតិ ឆ្នាំ ២០២១ នេះ នឹងប្រព្រឹត្តទៅចាប់ពីថ្ងៃទី ៥-៧ ខែតុលា។
សារាចរណែនាំដែលចុះហត្ថលេខា ដោយលោក ថោង ខុន រដ្ឋមន្ត្រីក្រសួងទេសចរណ៍កាលពីថ្ងៃទី ១០ ខែកញ្ញា ឱ្យដឹងថា ដើម្បីពង្រឹងគុណភាពផលិតផលទេសចរណ៍ និងចូលរួមទប់ស្កាត់ការរីករាលដាលជំងឺកូវីដ ១៩ ដែលអាចកើតមានជាយថាហេតុនៅតាមរមណីយដ្ឋានទេសចរណ៍ និងគោលដៅទេសចរណ៍នានាក្នុងឱកាសបុណ្យភ្ជុំបិណ្ឌ ប្រពៃណីជាតិ នាពេលខាងមុខ ក្រសួងណែនាំឱ្យមន្ទីរទេសចរណ៍រាជធានី-ខេត្ត ត្រូវយកចិត្តទុកដាក់ឱ្យបានខ្ពស់លើការប្រយុទ្ធប្រឆាំងនឹងការឆ្លងរាលដាលជំងឺកូវីដ ១៩។
ខ្លឹមសារសំខាន់ៗក្នុងសេចក្តីណែនាំ មានដូចជា ការជំរុញការអនុវត្តឱ្យបានយ៉ាងខ្ជាប់ខ្ជួន និងម៉ឺងម៉ាត់នូវវិធានការទាំងឡាយដែលបានដាក់ចេញដោយរាជរដ្ឋាភិបាលក្នុងការទប់ស្កាត់ការរីករាលដាលកូវីដ ១៩ ពិសេសវិធានការ «៣ ការពារ ៣ កុំ», ការពង្រឹងការអនុវត្តវិធានសុវត្ថិភាពទេសចរណ៍ និងនីតិវិធីស្តង់ដាប្រតិបត្តិអប្បបរមាតាមគន្លងប្រក្រតីភាពថ្មី ដែលទើបដាក់ឱ្យអនុវត្ត, ការជំរុញឱ្យរមណីយដ្ឋាន និងគោលដៅទេសចរណ៍ទាំងអស់ត្រូវកត់ត្រាភ្ញៀវចូលកម្សាន្ត និងប្រើប្រាស់សេវានៅកន្លែងរបស់ខ្លួន និងការតម្រូវឱ្យគ្រប់មូលដ្ឋានទាំងអស់ត្រូវចុះឈ្មោះបង្កើត និងប្រើប្រាស់ QR Code ទប់ស្កាត់ការឆ្លងរាលដាលជំងឺកូវីដ ១៩ ព្រមទាំងតម្រូវឱ្យភ្ញៀវត្រូវតែស្គែនជាដាច់ខាត មុនចូលកន្លែងរបស់ខ្លួន។
បន្ថែមពីលើនេះ សារាចរក៏បានតម្រូវឱ្យកន្លែងកម្សាន្តនីមួយៗត្រូវពង្រឹងការគ្រប់គ្រងឱ្យបានល្អប្រសើរ ពិសេសត្រូវកំណត់សមត្ថភាពផ្ទុក, ការសហការរវាងអាជីវករ និងប្រតិបត្តិករទេសចរណ៍ ការថែរក្សាបរិស្ថានអនាម័យ និងរក្សាតម្លៃផលិតផល និងសេវាឱ្យបានសមរម្យ និងម្ចាស់ទូកដ និងកាណូតទេសចរណ៍ ដែលធ្វើអាជីវកម្មដឹកភ្ញៀវទេសចរ មិនឱ្យផ្ទុកលើសចំណុះ និងត្រូវមានបំពាក់នូវសម្ភារសង្គ្រោះនានាជាចាំបាច់ ជាដើម។
បន្ទាប់ពីស្ងប់ស្ងាត់មួយរយៈធំដោយសារព្រឹត្តិការណ៍ឆ្លងរាលដាលជំងឺកូវីដ ១៩ ក្នុងសហគមន៍ ២០ កុម្ភៈ នៅពេលនេះវិស័យទេសចរណ៍ក្នុងស្រុកចាប់ផ្តើមកម្រើកឡើងវិញហើយ។
ទិន្នន័យពីក្រសួងទេសចរណ៍ឱ្យដឹងថា ក្នុងសប្ដាហ៍ទី១ ខែកញ្ញា ឆ្នាំ ២០២១ (ថ្ងៃទី ៤-៥) នៅទូទាំងប្រទេសកម្ពុជាទទួលបានភ្ញៀវទេសចរប្រមាណជាង ៥១ ០៤២ នាក់។
លោក ហូ វណ្ឌី ប្រធានក្រុមហ៊ុនទេសចរណ៍ World Express Co., Ltd បានប្រាប់ ភ្នំពេញ ប៉ុស្តិ៍ថា ពេលនេះក្រសួងទេសចរណ៍ និងស្ថាប័នពាក់ព័ន្ធ ព្រមទាំងវិស័យឯកជនកំពុងធ្វើការរួមគ្នា ដើម្បីដាក់ចេញនូវវិធានការ និងគោលនយោបាយថ្មីៗ ដើម្បីធ្វើឱ្យវិស័យនេះចាប់ផ្តើមមានដំណើរការឡើងវិញ។
លោកបន្តថា ទោះបីវិធានខាងលើធ្វើឡើងសម្រាប់ពិធីបុណ្យភ្ជុំបិណ្ឌ ប៉ុន្តែវាក៏ជាផ្នែកមួយនៃការពង្រឹកវិធានការសុវត្ថិភាព និងទំនុកចិត្តសម្រាប់ផែនការការបើកទទួលភ្ញៀវទេសចរអន្តរជាតិមកកម្សាន្តនៅកម្ពុជាក្នុងពេលខាងមុខផងដែរ។
លោកថ្លែងថា៖ «ការគិតពីសុវត្ថិភាពសម្រាប់ភ្ញៀវទេសចរទាំងភ្ញៀវជាតិ និងអន្តរជាតិ គឺជាការចាំបាច់ដើម្បីធ្វើឱ្យវិស័យនេះមានសម្ទុះឡើងវិញប្រកបដោយនិរន្តរភាព»។
លោក ខៀវ ធី ប្រធានសមាគមមគ្គុទ្ទេសក៍ទេសចរណ៍អង្គរ និយាយថា ភាពមិនទាន់ច្បាស់លាស់នៃការឆ្លងរាលដាលកូវីដ ១៩ ធ្វើឱ្យលោកមិនមានសង្ឃឹមថា វិស័យទេសចរណ៍នៅខេត្តសៀមរាបអាចនឹងចាប់ផ្តើមដំណើរការឡើងវិញនៅមុនដំណាច់ឆ្នាំនេះទេ។ លោកបន្ថែមថា ម្យ៉ាងទៀតការដ្ឋានជួសជុលផ្លូវថ្នល់ជាច្រើននៅក្នុងក្រុងសៀមរាប ក៏មិនទាន់រួចរាល់ដែរ។
លោកលើកឡើងទៀតថា ការដាក់ចេញវិធានការជាបន្តបន្ទាប់រួមទាំងសារាចររបស់ក្រសួងទេសចរណ៍ កាលពីសប្តាហ៍មុន គឺជាការល្អ ប៉ុន្តែសម្រាប់ការដើរកម្សាន្តគឺនឹងមិនទាន់មានច្រើនទេ៕ LA
