ភ្នំពេញៈ កម្ពុជាប្តេជ្ញាចូលរួមពង្រឹងសមត្ថភាពឌីជីថលូបនីយកម្មពន្ធនៃរដ្ឋបាលសារពើពន្ធក្រោមគំនិតផ្តួចផ្តើមខ្សែក្រវាត់ និងផ្លូវ (BRI)។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ កាលពីថ្ងៃទី ១២ ខែកញ្ញា។
ការប្តេជ្ញាចិត្តនេះត្រូវបានធ្វើឡើងក្នុងឱកាសកម្ពុជាចូលរួមវេទិកាកិច្ចសហប្រតិបត្តិការរដ្ឋបាលសារពើពន្ធនៃគំនិតផ្តួចផ្តើមខ្សែក្រវាត់ និងផ្លូវ លើកទី ២ ស្តីពីឌីជីថលលូបនីយកម្មនៃរដ្ឋបាលសារពើពន្ធ (BRITACOF) ក្រោមប្រធានបទ «ឌីជីថលូបនីយកម្មនៃរដ្ឋបាលសារពើពន្ធ (Digitalization of Tax Administration) កាលពីថ្ងៃទី ៩ ខែកញ្ញា។
ប្រធាននាយកដ្ឋាននីតិកម្មគោលនយោបាយសារពើពន្ធ និងសហប្រតិបត្តិការពន្ធដារអន្តរជាតិនៃអគ្គនាយកដ្ឋានពន្ធដារ លោក សេង ជាសិទ្ធ ដែលចូលរួមវេទិកានេះបានលើកឡើងថា វេទិកានេះបានផ្តោតសំខាន់ទៅលើការពង្រឹងសមត្ថភាពការធ្វើឌីជីថលូបនីយកម្មពន្ធនៅក្នុងយុគសម័យព័ត៌មានវិទ្យា ការពង្រឹងបន្ថែមនូវវេទិកាកិច្ចសហប្រតិបត្តិការពហុភាគី និងការលើកទឹកចិត្តដល់យុត្តាធិការនៃគំនិតផ្តួចផ្តើមខ្សែក្រវាត់ និងផ្លូវ តាមរយៈការធ្វើឌីជីថលូបនីយកម្មនៃរដ្ឋបាលសារពើពន្ធ។ នេះបើតាមសេចក្តីប្រកាសព័ត៌មាន។
លោកថ្លែងថា៖ «វេទិកានេះបានជជែកពិភាក្សាលើខ្លឹមសារសំខាន់ៗ ៤ រួមមាន រដ្ឋបាលសារពើពន្ធ ឌីជីថលូបនីយកម្មសេវាកម្មពន្ធ ឌីជីថលូបនីយកម្មបច្ចេកវិទ្យាថ្មីសម្រាប់ពន្ធដារ និងពាក់ព័ន្ធនឹងអភិបាលកិច្ចទិន្នន័យ»។
លោក Wang Jun ស្នងការនៃរដ្ឋបាលសារពើពន្ធចិន និងជាប្រធានក្រុមប្រឹក្សា BRITACOM បានថ្លែងថា វេទិកានេះបានរួមចំណែកយ៉ាងសំខាន់ដល់កិច្ចសហប្រតិបត្តិការជាសកលក្នុងការប្រយុទ្ធប្រឆាំងនឹងការរីករាលដាលកូវីដ ១៩ ដើម្បីជួយស្តារសេដ្ឋកិច្ចពិភពលោកឱ្យប្រសើរឡើងវិញ។
សេចក្តីប្រកាសព័ត៌មានបន្តថា ជាលទ្ធផលភារកិច្ចនៃការអនុវត្តផែនការសកម្មភាព Wu-zhen Action Plan (2019-2021) ត្រូវបានបញ្ចប់ទាន់ពេលវេលា និងប្រកបដោយគុណភាពល្អ។ ជាមួយគ្នានេះ អង្គវេទិកាទាំងមូលបានអនុម័តនូវផែនការសកម្មភាព Nul-Sultan Action Plan (2022-2024) និងបានជ្រើសរើសប្រទេសអាល់ហ្សេរី (Algeria) ជាម្ចាស់ផ្ទះសម្រាប់វេទិកាលើកទី ៣ នាពេលខាងមុខនេះ។
អគ្គនាយកដ្ឋានពន្ធដារ ប្រមូលពន្ធអាករបាន ១ ៥១៥,៩ លានដុល្លារនៅក្នុងឆមាសទី ១ ឆ្នាំ ២០២១ ធ្លាក់ចុះ ១០,៦០ ភាគរយធៀបទៅនឹងរយៈពេលដូចគ្នាឆ្នាំ ២០២០។ ការប្រមូលចំណូលពន្ធអាករក្នុងឆមាសទី ១ ស្មើនឹង ៦៧,៥៨ ភាគរយនៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១។ នេះបើតាមសេចក្តីប្រកាសព័ត៌មានរបស់ GDT៕ LA