.jpg)
ផ្លែមៀនប៉ៃលិន ជាផលិតផលមានសក្តានុពលមួយសម្រាប់ការនាំចេញទៅកាន់ទីផ្សារប្រទេសចិន។ ហេង ជីវ័ន
ភ្នំពេញៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា រដ្ឋបាលគយចិន (GACC) បាននិងកំពុងពន្លឿនការចុះពិធីសារលើមុខដំណាំមួយចំនួនទៀត ដើម្បីជំរុញការនាំចេញកសិផលកម្ពុជាទៅកាន់ទីផ្សារចិនកាន់តែច្រើនថែមទៀត ដើម្បីឆ្លើយតបនឹងការប្តេជ្ញាចិត្តរបស់រដ្ឋាភិបាលនៃប្រទេសទាំង ២។
លោក សាខុន បានលើកឡើងដូចនេះក្នុងកិច្ចប្រជុំថ្នាក់រដ្ឋមន្ត្រីអាស៊ាន-ចិន លើកទី៧ ស្តីពីកិច្ចសហប្រតិបត្តិការលើផ្នែកអនាម័យ និងភូតគាមអនាម័យ (SPS) ជាមួយនឹងលោក Wang Lingjun អនុរដ្ឋមន្ត្រីអគ្គរដ្ឋបាលគយ (GACC) នៃសាធារណរដ្ឋប្រជាមានិតចិន កាលពីថ្ងៃទី ១៣ ខែ កញ្ញា ឆ្នាំ ២០២១។
ក្នុងកិច្ចប្រជុំនេះ លោក វេង សាខុន ដែលជាប្រធានប្តូរវេនរដ្ឋមន្ត្រីកសិកម្ម និងព្រៃឈើអាស៊ាន បានស្នើជាថ្មីទៅកាន់លោក Wang Lingjun ឱ្យជួយពង្រីក និងពន្លឿនលើការចុះពិធីសារលើមុខដំណាំផ្សេងៗទៀត ដើម្បីជំរុញការនាំចេញកសិកផលកម្ពុជាទៅកាន់ប្រទេសចិនឱ្យកាន់តែច្រើន។
លោកថ្លែងថា៖ «យើងនៅប្តេជ្ញាចិត្តបន្ត និងពង្រឹងកិច្ចសហប្រតិបត្តិការលើផ្នែកអនាម័យ និងភូតគាមអនាម័យ (SPS) រវាងអាស៊ាន-ចិន ដើម្បីសម្រួលដល់លំហូរស្បៀង និងផលិតផលកសិកម្មឆ្លងព្រំដែននៅក្នុងបរិបទនៃការរាតត្បាតជំងឺកូវីដ ១៩»។
មៀនប៉ៃលិន គឺជាមុខដំណាំបន្ទាប់ពីផ្លែស្វាយស្រស់ ដែលកម្ពុជាកំពុងធ្វើការចរចាបើកទីផ្សារទៅប្រទេសចិនតាមការស្នើសុំរបស់ក្រសួងកសិកម្ម កាលពីថ្ងៃទី ៥ ខែមិថុនា ឆ្នាំ ២០១៩។
អគ្គរដ្ឋបាលគយចិន កាលពីថ្ងៃទី ២៥ ខែសីហា បានអះអាងថា ការងារវិភាគហានិភ័យផ្លែមៀនកម្ពុជាសម្រាប់នាំចូលប្រទេសចិន ទទួលបានការវិវត្តមួយកម្រិតដោយភាគីចិនបានស្នើឱ្យភាគីកម្ពុជាធ្វើបច្ចុប្បន្នភាពបន្ថែមលើការស្រាវជ្រាវ និងការដាក់ចេញវិធានការសម្រាប់ទប់ស្កាត់ និងកម្ចាត់សមាសភាពសត្វចង្រៃទាំង ៨ មុខ»។ នេះបើតាមលោក វេង សាខុន។
លោកលើកឡើងថា៖ «ភាគីចិនបានសន្យានឹងបន្តធ្វើការវាយតម្លៃនៅពេលភាគីកម្ពុជាឆ្លើយតបមកវិញដោយភាគីចិនសង្ឃឹមថា ភាគីទាំង ២ បន្តពង្រឹងកិច្ចសហប្រតិបត្តិការរួមគ្នា ដើម្បីជំរុញការងារលក្ខខណ្ឌតម្រូវភូតគាមអនាម័យសម្រាប់ការនាំផ្លែមៀនកម្ពុជាទៅប្រទេសចិនឱ្យទទួលជោគជ័យ»។
លោក សួស ស៊ីយ៉ាត ប្រធានសហគមន៍អ្នកដាំមៀនប៉ៃលិន ប្រាប់ ភ្នំពេញ ប៉ុស្តិ៍ កាលពីខែមុនថា លក្ខខណ្ឌតម្រូវភូតគាមអនាម័យបានក្លាយជាឧបសគ្គចម្បងរារាំងដល់ការនាំចេញផ្លែមៀនប៉ៃលិនទៅកាន់ទីផ្សារអន្តរជាតិ ពិសេសទីផ្សារចិន។
លោកមានក្តីរំពឹងថា កម្ពុជា និងចិន នឹងសម្រេចបានការចរចាលើពិធីសារលក្ខខណ្ឌតម្រូវភូតគាមអនាម័យសម្រាប់ការនាំចេញមៀនប៉ៃលិនស្រស់ និងក្លាស្សេទៅប្រទេសចិននាដើមឆ្នាំក្រោយ។
លោកបាននិយាយថា៖ «ខ្ញុំគិតថាបញ្ហាទីផ្សារមៀនរបស់កម្ពុជានឹងអាចដោះស្រាយ ប្រសិនបើចិនអនុញ្ញាតឱ្យនាំចេញផ្លែមៀនត្រង់ទៅកាន់ទីផ្សាររបស់ខ្លួន»។
បច្ចុប្បន្នប្រទេសចិន បានអនុញ្ញាតឱ្យកម្ពុជានាំចេញត្រង់នូវផលិតផលកសិផលមួយចំនួនដូចជា អង្ករ ស្វាយកែវរមៀត ស្វាយចន្ទី ចេកអំបូង និងដំឡូងមីក្រៀម៕ LA
