ភ្នំពេញៈ និយតករគណនេយ្យ និងសវនកម្ម (ន.គ.ស.) នៃក្រសួងសេដ្ឋកិច្ច និងហិរញ្ញវត្ថុ បានអំពាវនាវដល់ម្ចាស់សហគ្រាសចូលរួមអនុវត្តកាតព្វកិច្ចគណនេយ្យ និងសវនកម្មឱ្យបានម៉ឺងម៉ាត់តាមច្បាប់ស្តីពីគណនេយ្យ និងសវនកម្ម។
ការអំពាវនាវនេះបានធ្វើឡើងក្នុងកិច្ចប្រជុំស្តីពីការពិភាក្សាលើកិច្ចសហប្រតិបត្តិការរវាងនិយតករគណនេយ្យ និងសវនកម្មជាមួយសមាគមពាណិជ្ជករដឹកជញ្ជូនទំនិញ ដើម្បីជំរុញការអនុវត្តកាតព្វកិច្ចគណនេយ្យ និងសវនកម្ម កាលពីថ្ងៃទី ១៣ ខែកញ្ញា ឆ្នាំ ២០២១ តាមរយៈប្រព័ន្ធអនឡាញ។
លោក ប៊ូ ថារិន អគ្គនាយកនិយតករគណនេយ្យ និងសវនកម្មបាននិយាយថា ការអនុវត្តស្របតាមច្បាប់ និងបទប្បញ្ញត្តិជាធរមានពាក់ព័ន្ធនឹងវិស័យគណនេយ្យ និងសវនកម្ម គឺកិច្ចការសំខាន់សម្រាប់វិស័យឯកជន ដើម្បីចូលរួមជំរុញការអនុវត្តកាតព្វកិច្ចគណនេយ្យ និងសវនកម្មនៅកម្ពុជា។
លោកបន្តថា៖ «សហគ្រាស ត្រូវអនុវត្តកាតព្វកិច្ចជាសារវន្តចំនួន ៣ គឺកាតព្វកិច្ចកាន់បញ្ជីគណនេយ្យ កាតព្វកិច្ចរៀបចំរបាយការណ៍ហិរញ្ញវត្ថុស្របតាមស្តង់ដាជាធរមាន និងកាតព្វកិច្ចដាក់របាយការណ៍ហិរញ្ញវត្ថុឱ្យរងសវនកម្មឯករាជ្យ»។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញដែលចូលរួមកិច្ចប្រជុំនេះបានឱ្យដឹងថា សមាគមលោកបានប្តេជ្ញាចូលរួមសហការក្នុងការផ្សព្វផ្សាយទៅកាន់សមាជិក និងសហគ្រាសផ្សេងៗទៀត ដើម្បីរៀបចំរបាយការណ៍គណនេយ្យត្រឹមត្រូវតាមស្តង់ដា។
លោកប្រាប់ភ្នំពេញប៉ុស្តិ៍កាលពីថ្ងៃអង្គារថា និយតករគណនេយ្យ និងសវនកម្ម បានកំណត់ឱ្យសមាជិកសមាគមក៏ដូចជាម្ចាស់អាជីវកម្មផ្សេងៗរៀបចំធ្វើសវនកម្មឱ្យស្របតាមច្បាប់ស្តីពីគណនេយ្យ និងសវនកម្ម។
លោកបានបន្ថែមថា៖ «ដូច្នេះសមាគមមានតួនាទីភារកិច្ចធ្វើការផ្សព្វផ្សាយព័ត៌មានពាក់ព័ន្ធនឹងនិយតករគណនេយ្យ និងសវនកម្ម ដើម្បីឱ្យមានភាពទូលំទូលាយទៅកាន់សហគ្រាសតាមរយៈការរៀបចំវគ្គបណ្តុះបណ្តាលបន្ថែមទៀតដល់សហគ្រាស និងអាជីវកម្មផ្សេងៗទៀតបានយល់កាន់តែស៊ីជម្រៅ»។
តាមរយៈកិច្ចប្រជុំនេះ អង្គប្រជុំបានឯកភាពជាគោលការណ៍លើការរៀបចំយន្តការនៃកិច្ចសហការសម្រាប់ជំរុញការអនុវត្តកាតព្វកិច្ចដែលតម្រូវដោយច្បាប់ស្តីពីគណនេយ្យ និងសវនកម្ម និងបទប្បញ្ញត្តិពាក់ព័ន្ធតាមរយៈការផ្សព្វផ្សាយ និងបណ្តុះបណ្តាលសមាជិកសមាគម។
និយតករគណនេយ្យ និងសវនកម្មបានបំពេញមុខងារជាសេនាធិការឱ្យអាជ្ញាធរសេវាហិរញ្ញវត្ថុមិនមែនធនាគារ ក្នុងការគ្រប់គ្រង និងអភិវឌ្ឍវិស័យ និងវិជ្ជាជីវៈគណនេយ្យ និងសវនកម្មនៅកម្ពុជា តាមរយៈការដាក់ចេញបទប្បញ្ញត្តិ វិធាន និងស្តង់ដា ព្រមទាំងជំរុញការអនុវត្ដច្បាប់ និងស្តង់ដាគណនេយ្យ និងសវនកម្មកម្ពុជា៕ LA