ភ្នំពេញៈ ក្រសួងប្រៃសណីយ៍ និងទូរគមនាគមន៍ ក្រោមកិច្ចសហការជាមួយ UNDP និងក្រុមហ៊ុន The Idea នឹងរៀបចំ «មហាពិព័រណ៍ទិញទំនិញតាមអនឡាញ» រយៈពេល ៣ថ្ងៃនៅចុងសប្តាហ៍នេះ ដើម្បីលើកកម្ពស់ការធ្វើអាជីវកម្មតាមអនឡាញ និងឌីជីថលនៅកម្ពុជា។
សេចក្តីប្រកាសព័ត៌មានឱ្យដឹងថា មហាពិព័រណ៍ទិញទំនិញតាមអនឡាញ ដែលចាប់ផ្តើមពីថ្ងៃទី ១៧-១៩ ខែកញ្ញា គឺជាពិព័រណ៍អនឡាញដំបូងគេមិនធ្លាប់មាននៅកម្ពុជាសម្រាប់ការទិញលក់ទំនិញ ដើម្បីលើកទឹកចិត្តម្ចាស់អាជីវកម្ម និងអ្នកចូលចិត្តដើរទិញទំនិញទាំងអស់ឱ្យងាកមកទិញទំនិញតាមអនឡាញ។
ក្រសួងឱ្យដឹងថា៖ «មហាពិព័រណ៍មួយនេះធ្វើឡើងក្នុងគោលបំណងឆ្លើយតបនឹងផលប៉ះពាល់នៃកូវីដ ១៩ លើសេដ្ឋកិច្ច ជាពិសេសលើអាជីវកម្មខ្នាតតូចនៅកម្ពុជា និងចូលរួមផ្លាស់ប្ដូរឥរិយាបថ ដោយការងាកមកទិញទំនិញនៅតាមអនឡាញ ព្រមទាំងគាំទ្រដល់អាជីវកម្មក្នុងស្រុក ដើម្បីចូលរួមពង្រឹងវត្តមានអាជីវកម្មរបស់ពួកគាត់តាមវិស័យឌីជីថល»។
មហាពិព័រណ៍នេះ នឹងបើកទូលាយសម្រាប់អ្នកចូលរួមគ្រប់ទិសទី។
កន្លងមកដោយមានការគាំទ្រថវិកាពីរដ្ឋាភិបាលអូស្ត្រាលី ក្រសួងប្រៃសណីយ៍ និងទូរគមនាគមន៍ និង UNDP បានប្រកាសពីការចាប់ផ្តើមដំណើរការសម្ព័ន្ធមួយ ដែលមានឈ្មោះថា កាន់តែខ្លាំងជាមួយឌីជីថល។
សម្ព័ន្ធនេះ មានគោលដៅភ្ជិតគម្លាតចំណេះដឹង និងជំនាញរបស់សហគ្រាសខ្នាតមីក្រូ តូច និងមធ្យម (MSMEs) ដែលកំពុងមានវត្តមានតាមប្រព័ន្ធអនឡាញបានខ្លះហើយ ប៉ុន្តែមិនទាន់មានលទ្ធភាពកែសម្រួលប្រតិបត្តិការតាមប្រព័ន្ធអនឡាញរបស់ខ្លួន ដើម្បីអាចឆ្លើយតបនឹងបញ្ហាប្រឈមដែលបង្កឡើង ដោយសារការរាតត្បាតជាសកលនៃជំងឺកូវីដ ១៩ នៅឡើយទេ។
សម្ព័ន្ធនេះប្រើប្រាស់អភិក្រមចំនួន ២ ដើម្បីបង្កើនសកម្មភាពពាណិជ្ជកម្មតាមប្រព័ន្ធឌីជីថល ជាមួយនឹងអតិថិជន និង MSMEs តាមរយៈការប្រើប្រាស់យុទ្ធនាការបង្កើនការយល់ដឹង ដោយប្រើប្រព័ន្ធផ្សព្វផ្សាយចម្រុះ និងកម្មវិធីបណ្តុះបណ្តាលជាក់លាក់ដល់ក្រុមគោលដៅនីមួយៗ។
យុទ្ធនាការបង្កើនការយល់ដឹងតាមប្រព័ន្ធផ្សព្វផ្សាយចម្រុះនេះ មានបំណងផ្សព្វផ្សាយព័ត៌មានដល់អតិថិជន ៣ ១០០ ០០០ នាក់ និង MSMEs ចំនួន ១០០ ០០០ សហគ្រាស ដើម្បីលើកទឹកចិត្តឱ្យមានការបង្កើនការទិញ លក់តាមរយៈថ្នាលពាណិជ្ជកម្មតាមប្រព័ន្ធអេឡិចត្រូនិក និងទីផ្សារឌីជីថលដទៃទៀត។
កម្មវិធីនេះនឹងបន្តផ្តល់ការបំពាក់បំប៉នដល់ MSMEs ចំនួន ១ ០០០ សហគ្រាសនូវជំនាញចាំបាច់ ដើម្បីឱ្យពួកគេអាចផ្លាស់ប្តូររបៀបធ្វើអាជីវកម្មដោយផ្ទាល់ (តាមបែបប្រពៃណី) ទៅជាអាជីវកម្មអនឡាញ ដែលអាចឱ្យពួកគេលក់ទំនិញ និងសេវាកម្មប្រកបដោយជោគជ័យតាមប្រព័ន្ធអនឡាញ៕ LA