.jpg)
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងកិច្ចប្រជុំនាពេលកន្លងទៅ។ រូបថត ក្រសួងសេដ្ឋកិច្ច
ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ ចេញប្រកាសស្តីពីវិធាន និងនីតិវិធី នៃការអនុវត្តអាករលើតម្លៃបន្ថែមចំពោះប្រតិបតិ្តការពាណិជ្ជកម្មតាមប្រព័ន្ធអេឡិចត្រូនិកដើម្បីគ្រប់គ្រងការប្រមូលអាករលើតម្លៃបន្ថែមលើការផ្គត់ផ្គង់ទំនិញឌីជីថល ឬសេវាកម្មឌីជីថល ដែលកំពុងមានប្រតិបត្តិការតាមប្រព័ន្ធអេឡិចត្រូនិកនៅកម្ពុជា។ នេះបើតាមសេចក្តីប្រកាសក្រសួង ចុះថ្ងៃទី ៨ ខែ កញ្ញា ឆ្នាំ ២០២១។
ប្រកាសនេះធ្វើឡើងនៅក្នុងគោលបំណងដើម្បីកំណត់វិធាន និងនីតិវិធីអនុវត្ត និងគ្រប់គ្រងការប្រមូលអាករលើតម្លៃបន្ថែមលើការផ្គត់ផ្គង់ទំនិញឌីជីថល ឬសេវាកម្មឌីជីថល ដែលបានធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកដោយអ្នកជាប់ពន្ធអនិវាសនជនដែលមិនមានគ្រឹះស្ថានអចិន្ត្រៃយ៍នៅព្រះរាជាណាចក្រកម្ពុជាសម្រាប់ប្រើប្រាស់ក្នុងព្រះរាជាណាចក្រកម្ពុជា ស្របតាមអនុក្រឹត្យលេខ ៦៥ អន.ក្របកចុះថ្ងៃទី ៨ ខែ មេសា ឆ្នាំ ២០២១ ស្តីពីការអនុវត្តអាករលើតម្លៃបន្ថែមចំពោះពាណិជ្ជកម្មតាមប្រព័ន្ធអេឡិចត្រូនិក។
ប្រកាសនេះមានវិសាលភាពអនុវត្តចំពោះការផ្គត់ផ្គង់ទំនិញឌីជីថល ឬសេវាឌីជីថលតាមប្រព័ន្ធអេឡិចត្រូនិក ឬរាល់សកម្មភាពពាណិជ្ជកម្មតាមប្រព័ន្ធអេឡិចត្រូនិក ដែលធ្វើឡើងដោយអ្នកផ្គត់ផ្គង់អនិវាសនជននៅក្រៅព្រះរាជាណាចក្រកម្ពុជា មកព្រះរាជាណាចក្រកម្ពុជា និងចំពោះអ្នកជាប់ពន្ធនិវាសន-ជនដែលទទួលការផ្គត់ផ្គង់ទំនិញឌីជីថល ឬសេវាឌីជីថល ឬក៏រាល់សកម្មភាពពាណិជ្ជកម្មតាមប្រព័ន្ធអេឡិចត្រូនិក ពីអ្នកជាប់ពន្ធអនិវាសនជន។
តម្លៃជាប់អាករនៃការផ្គត់ផ្គង់ គឺជាថ្លៃទំនិញឌីជីថល ឬសេវាឌីជីថលដែលអ្នកលក់យកពីអ្នកទិញ។ ក្នុងករណីការទូទាត់ចំពោះការផ្គត់ផ្គង់ជាប់អាករសំណងអ្វីមួយក្រៅពីប្រាក់កាស ដើម្បីជាផលប្រយោជន៍ផ្ទាល់ ឬប្រយោលដល់អ្នកផ្គង់ផ្គង់សំណងនោះ ត្រូវគិតក្នុងតម្លៃជាប់អាករតាមតម្លៃទីផ្សារ។
ប្រសិនបើ ជាតម្លៃជាប់អាកររបស់ទំនិញឌីជីថល ឬសេវាកម្មឌីជីថលដែលបានផ្គត់ផ្គង់មិនតំណាងឱ្យតម្លៃពិត រដ្ឋបាលសារពើពន្ធអាចកំណត់ចេញនូវតម្លៃមួយ ហើយតម្លៃនោះត្រូវចាត់ទុកជាតម្លៃត្រឹមត្រូវរហូតដល់មានភ័ស្តុតាងបញ្ជាក់ដែលរដ្ឋបាលសារពើពន្ធយល់ព្រម។
ប្រកាសនេះធ្វើឡើងស្របតាមច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ដែលបានចូលជាធរមានកាលពីខែវិច្ឆិកា ឆ្នាំ ២០១៩។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច ធ្លាប់បានលើកឡើងនៅក្នុងឯកសារក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជាកាលពីថ្មីៗនេះថា ក្នុងរយៈពេល ១៥ ឆ្នាំ ពីឆ្នាំ ២០២១ ដល់ឆ្នាំ ២០៣៥ រដ្ឋាភិបាលត្រូវសម្រេចឱ្យបាននូវសេដ្ឋកិច្ច និងសង្គមឌីជីថលដោយអនុលោមតាមគោលការណ៍ចំនួន ៣ គឺការកសាងមូលដ្ឋានគ្រឹះឌីជីថល ការចាប់យកឌីជីថល និងការធ្វើបរិវត្តកម្មឌីជីថល៕ LA
