.jpg)
ស្លាកយីហោរក្រុមហ៊ុនបច្ចេកវិទ្យាយក្ស Google។ Yonhap
ទីក្រុងសេអ៊ូល: ក្រុមហ៊ុនបច្ចេកវិទ្យាយក្សរបស់អាមេរិក Google ដែលកំពុងរងការរិះគន់នៅកូរ៉េខាងត្បូងពីបទរំលោភបំពានអ្នកដទៃដោយអំណាចទីផ្សាររបស់ខ្លួន កាលពីថ្ងៃពុធ បានឆ្លើយតបទៅនឹងការរិះគន់ដោយលើកហេតុផលថាខ្លួនបានរួមចំណែក ១១,៩ ពាន់ពាន់លានវ៉ុន (១០,២៥ ពាន់លានដុល្លារ) នៅក្នុងផលប្រយោជន៍សេដ្ឋកិច្ចដល់ប្រជាជនកូរ៉េកាលពីឆ្នាំមុន។
ការរៀបចំព្រឹត្តិការណ៍សារព័ត៌មានតាមអនឡាញដែលមានឈ្មោះថា៖ “Google សម្រាប់កូរ៉េ” នាយកប្រតិបត្តិនៃក្រុមហ៊ុនយក្សអាមេរិកបានដកស្រង់ទិន្នន័យពីក្រុមហ៊ុនវិភាគទីផ្សារពិភពលោក ដើម្បីបង្ហាញពីភាពវិជ្ជមាននៃវត្តមានរបស់ខ្លួននៅក្នុងប្រទេសកូរ៉េ។
លោកស្រី Susan Wojcicki ប្រធានគេហទំព័រ YouTube ដែលបានលើកតាមរបាយការណ៍ចេញផ្សាយដោយ Oxford Economics បាននិយាយថា៖ “កាលពីឆ្នាំមុនប្រព័ន្ធអេកូច្នៃប្រឌិតរបស់ youtube បានរួមចំណែកប្រហែល ១,៦ ពាន់ពាន់លានវ៉ុន ដល់ផលិតផលក្នុងស្រុកសរុបរបស់កូរ៉េនិងបង្កើតការងារពេញម៉ោងចំនួន ៨៦ ៦៣០"។
សេវាកម្មផ្សេងទៀតរបស់ Google ក៏បានសង្កត់ធ្ងន់លើការរួមចំណែកផ្នែកសេដ្ឋកិច្ចរបស់ពួកគេចំពោះសេដ្ឋកិច្ចកូរ៉េផងដែរ។ ក្រុមហ៊ុនបាននិយាយថា រួមទាំង ១,៦ ពាន់ពាន់លានវ៉ុន របស់ Youtube ដែលអត្ថប្រយោជន៍សរុបមានចំនួន ១១,៩ ពាន់ពាន់លានវ៉ុន ក្នុង ១ ឆ្នាំ។
ក្រុមហ៊ុនបាននិយាយថា តាមប្រភេទអត្ថប្រយោជន៍ទឹកប្រាក់ ៥,១ ពាន់ពាន់លានវ៉ុន បានមកពីហាងកម្មវិធី App របស់ Google ៤,២ ពាន់ពាន់លានវ៉ុនតាមរយៈម៉ាស៊ីនស្វែងរករបស់Google និង ២,៥ ពាន់ពាន់លានវ៉ុនតាមរយៈឧបករណ៍ផលិតភាពការិយាល័យដោយឥតគិតថ្លៃរបស់ខ្លួន។
Google ក៏បានអះអាងថា ខ្លួនបានផ្តល់មកវិញនូវផលចំណេញប្រចាំឆ្នាំប្រមាណ ១០,៥ ពាន់ពាន់លានវ៉ុន ដល់សហគ្រាសកូរ៉េខាងត្បូងរួមទាំងប្រាក់ចំណេញប្រមាណ ៣,៥ ពាន់ពាន់លានវ៉ុនដល់អ្នកអភិវឌ្ឍន៍កម្មវិធីទូរស័ព្ទក្នុងស្រុកតាមរយៈហាងកម្មវិធីរបស់ខ្លួន។
ព្រឹត្តិការណ៍នេះបានរៀបចំឡើងតែមួយថ្ងៃប៉ុណ្ណោះ បន្ទាប់ពីគណៈកម្មការពាណិជ្ជកម្មដោយយុត្តិធម៌បានដាក់ពិន័យក្រុមហ៊ុន Google ចំនួន ២០៧,៤ ពាន់លានវ៉ុន ពីបទរំលោភអំណាចទីផ្សាររបស់ខ្លួនជាមួយប្រព័ន្ធប្រតិបត្តិការទូរស័ព្ទចល័ត Android បន្ទាប់ពីការស៊ើបអង្កេតអស់រយៈពេល ៥ ឆ្នាំ។
កាលពីចុងខែមុន ប្រទេសកូរ៉េខាងត្បូង បានក្លាយជាប្រទេសដំបូងគេនៅលើពិភពលោកដែលប្រឆាំងគោលនយោបាយទូទាត់ប្រាក់ក្នុងកម្មវិធីថ្មីរបស់ Google ដោយបានបង្កើតច្បាប់ដែលសំដៅក្រុមហ៊ុននោះ ជា“ច្បាប់ប្រឆាំង Google”។
Google បាននិយាយបន្ទាប់ពីរដ្ឋសភាអនុម័តសេចក្តីព្រាងច្បាប់នេះថា ខ្លួននឹងស្វែងរកវិធីដើម្បីអនុវត្តតាមច្បាប់ថ្មី។
ក្នុងអំឡុងពេលព្រឹត្តិការណ៍កាលពីថ្ងៃពុធ ប្រធានផ្នែក youtube បានបង្ហាញពីរបៀបដែលសេវាកម្មរបស់ខ្លួនបានជះឥទ្ធិពលដល់ជីវិតរបស់ជនជាតិកូរ៉េជាច្រើន។
បណ្តាញ youtubeជិត ៥ ៥០០ នៅប្រទេសកូរ៉េខាងត្បូងឥឡូវនេះមានអតិថិជនជាង ១០០ ០០០ នាក់ ខណៈបណ្តាញជាង ៥០០ នៅក្នុងប្រទេសមានអតិថិជនជាង ១ លាននាក់។
ចំពោះការសម្រេចចិត្តរបស់ FTC កាលពីថ្ងៃអង្គារ ក្រុមហ៊ុនបាននិយាយថា ខ្លួនមានគម្រោងប្តឹងឧទ្ធរណ៍ដោយអះអាងថា វា “មិនបានវាយតម្លៃយ៉ាងពេញលេញនូវអត្ថប្រយោជន៍ទាំងអស់ដែលយើងបានបង្កើតឡើង” ដល់អតិថិជនអ្នកអភិឌ្ឍន៍កម្មវិធីនិងអ្នកផលិតឧបករណ៍ឡើយ៕ Korea Herald-ANN/RR
