ភ្នំពេញៈ ក្រសួងពាណិជ្ជកម្មប្រាប់ឱ្យសហគ្រាសឯកបុគ្គល នីតិបុគ្គល និងសាខាក្រុមហ៊ុនបរទេសទាំងអស់ដែលកំពុងធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកនៅកម្ពុជាឱ្យមកដាក់ពាក្យស្នើសុំលិខិតអនុញ្ញាត ឬអាជ្ញាប័ណ្ណពាណិជ្ជកម្មតាមប្រព័ន្ធអេឡិចត្រូនិកឱ្យបានមុនថ្ងៃទី ១ ខែ ធ្នូ ឆ្នាំ ២០២១។
សេចក្តីជូនដំណឹងក្រសួងកាលពីថ្ងៃទី ១៥ កញ្ញា សរសេរថា ទោះបីជាក្រសួងបានធ្វើការផ្សព្វផ្សាយ និងរៀបចំសិក្ខាសាលាផ្សព្វផ្សាយជាច្រើនលើករួចមកហើយ ប៉ុន្តែដល់ពេលនេះក្រសួងសង្កេតឃើញថា សហគ្រាស ក្រុមហ៊ុនដែលបាននិងកំពុងធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកមួយចំនួនធំពុំទាន់បានមកស្នើសុំលិខិតអនុញ្ញាត ឬអាជ្ញាប័ណ្ណពាណិជ្ជកម្មតាមប្រព័ន្ធអេឡិចត្រូនិកនៅឡើយទេ។
លិខិតបានបន្តថា៖ «ជាថ្មីម្តងទៀត ក្រសួងសូមស្នើឱ្យលោក-លោកស្រី សហគ្រាសឯកបុគ្គល នីតិបុគ្គល និងសាខាក្រុមហ៊ុនបរទេសទាំងអស់ដែលបានធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក សូមរួសរាន់មកដាក់ពាក្យស្នើសុំលិខិតអនុញ្ញាត ឬអាជ្ញាបណ្ណពាណិជ្ជកម្មតាមប្រព័ន្ធអេឡិចត្រូនិកឱ្យបានមុនថ្ងៃទី ១ ខែ ធ្នូ ឆ្នាំ ២០២១ ជាកំណត់»។
យោងតាមលិខិតខាងលើចាប់ពីថ្ងៃទី ១ ខែ ធ្នូ ឆ្នាំ ២០២១ តទៅ បើសហគ្រាសឯកបុគ្គល នីតិបុគ្គល និងសាខាក្រុមហ៊ុនបរទេស ដែលធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកដោយគ្មានលិខិតអនុញ្ញាត ឬអាជ្ញាប័ណ្ណនឹងត្រូវទទួលការផាកពិន័យជាប្រាក់ ឬបញ្ឈប់សកម្មភាពអាជីវកម្ម ឬប្រឈមនឹងវិធានការនានាដូចមានចែងក្នុងលិខិតបទដ្ឋានច្បាប់ជាធរមាន។
លិខិតក្រសួងឱ្យដឹងទៀតថា ចំពោះពាក្យស្នើសុំបែបបទ លក្ខខណ្ឌ និងឯកសារតម្រូវផ្សេងៗអាចទាញយកតាមរយៈគេហទំព័រ www.ecommercelicensing.moc.gov.kh ឬគេហទំព័រក្រសួងពាណិជ្ជកម្ម www.moc.gov.kh។
ច្បាប់ស្តីពីការធ្វើពាណិជ្ជកម្មតាមប្រព័ន្ធអេឡិចត្រូនិកត្រូវបានដាក់ឱ្យប្រើប្រាស់ជាផ្លូវការកាលពីថ្ងៃទី ២ ខែ វិច្ឆិកា ឆ្នាំ ២០១៩ ដោយមានបំណងគ្រប់គ្រងការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា និងអន្តរជាតិ និងការផ្តល់នូវទំនុកចិត្តដល់សាធារណជនក្នុងការប្រើប្រាស់ទំនាក់ទំនងតាមប្រព័ន្ធអេឡិចត្រូនិក។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីខែកក្កដាថា ការចុះបញ្ជីតាមច្បាប់កំណត់នឹងផ្តល់ប្រយោជន៍ច្រើនទាំងម្ចាស់អាជីវកម្ម (កិត្តិនាម) ទំនុកចិត្តអ្នកប្រើប្រាស់ និងរដ្ឋាភិបាល (ចំណូលពន្ធ)។
បើតាមលោក សុវិជាតិ ច្បាប់នេះក៏បានលើកលែងសម្រាប់ការចុះបញ្ជីប្រភេទសកម្មភាពមួយចំនួនដូចជា ការផ្សព្វផ្សាយពាណិជ្ជកម្មលើប្រព័ន្ធអេឡិចត្រូនិកអំពីទំនិញ ឬសេវាដែលមិនបង្កើតជាសំណើនៃកិច្ចសន្យាការកក់បម្រុងទុកនូវសេវាដែលមិនមានការកក់ប្រាក់ ការលក់ទំនិញ ឬសេវារបស់រូបវន្តបុគ្គល ដែលមានផលរបបក្រោមកម្រិតផលរបបជាអ្នកជាប់ពន្ធតូច ការលក់ទំនិញ ឬផ្ដល់សេវាលក្ខណៈគ្រួសារតាមរដូវកាល ការលក់ទំនិញជាស្នាដៃសិល្បៈ និងការផ្តល់សេវាបង្រៀនតាមប្រព័ន្ធអនឡាញលក្ខណៈឯកជន ឬសិក្ខាសាលា៕ LA