.jpg)
ការនាំចេញផលិតផលវាយនភណ្ឌមានតម្លៃជាង $៦ ៨១៨ លាន ក្នុងរយៈពេល ៨ ខែដំបូងឆ្នាំ ២០២១។ ហុង មិនា
ភ្នំពេញៈ កម្ពុជាបាននាំចេញសម្លៀកបំពាក់ ផលិតផលធ្វើដំណើរ និងស្បែកជើងក្នុងតម្លៃសរុបជាង ៦ ៨១៨,៦២ លានដុល្លារក្នុងរយៈពេល ៨ ខែ ដំបូងឆ្នាំ ២០២១។ នេះបើតាមទិន្នន័យពីក្រសួងពាណិជ្ជកម្ម។
ទិន្នន័យបង្ហាញថា ក្នុងនោះការនាំចេញផលិតផលសម្លៀកបំពាក់មានតម្លៃ ៥ ០២១,៨៨ លានដុល្លារ កើនឡើង ១៦០ លានដុល្លារ ស្មើនឹង ៣,៣ ភាគរយបើធៀបនឹងរយៈពេលដូចគ្នាឆ្នាំ ២០២០, ផលិតផលធ្វើដំណើរ (កាបូប) មាន ៩០៣,១ លានដុល្លារ និងផលិតស្បែកជើង ៨៩៣,៦៣ លានដុល្លារ។
បើតាមក្រសួងពាណិជ្ជកម្មទីផ្សារសំខាន់ៗសម្រាប់ផលិតផលសម្លៀកបំពាក់មានដូចជា អាមេរិក សហភាពអឺរ៉ុប ជប៉ុន និងអង់គ្លេស ជាដើម។
លោកនាយករដ្ឋមន្ត្រី ហ៊ុន សែន បានថ្លែងក្នុងកម្មវិធីចាក់វ៉ាក់សាំងបង្ការវីរុសកូវីដ ១៩ ដល់កុមារ នាថ្ងៃទី ១៧ ខែកញ្ញា ថា ផលិតផលសម្លៀកបំពាក់កម្ពុជាទទួលបានការបញ្ជាទិញកើនឡើង ដោយសារវិបត្តិនៃជំងឺកូវីដ ១៩ បានធ្វើឱ្យប៉ះពាល់ចង្វាក់ផលិតកម្មកាត់ដេរនៅប្រទេសផលិតផលិតផលវាយនភណ្ឌសំខាន់មួយចំនួន ដូចជា បង់ក្លាដែស មីយ៉ាន់ម៉ា វៀតណាម និងប្រេស៊ីល ដែលបាននាំឱ្យមានការបង្វែរការបញ្ជាទិញពីកម្ពុជា។
លោកនាយករដ្ឋមន្ត្រីអះអាងថា៖ «វិស័យឧស្សាហកម្មរបស់យើងបានដំណើរការធម្មតា។ មានរោងចក្រចំនួន ៤ ធ្លាប់ដេរម៉ាស់ ឥឡូវគេបានបង្វែរទៅជាដេរខោអាវសម្រាប់នាំចេញវិញ ព្រោះការបញ្ជាទិញមានច្រើនដោយប្រទេសមួយចំនួនដូចជា ប្រេស៊ីល មីយ៉ាន់ម៉ា បង់ក្លាដែស មិនអាចផ្គត់ផ្គង់បានតាមតម្រូវការបញ្ជាទិញ ឥឡូវប៉ះពាល់ដល់ប្រទេសវៀតណាម គេបង្វែរការបញ្ជាទិញពីកម្ពុជា ស្រុកខ្មែរសុវត្ថិភាពជាងឥឡូវនេះ»។
លោកបន្ថែមទៀតថា ការដោះស្រាយបញ្ហាវ៉ាក់សាំង គឺមិនត្រឹមតែដោះស្រាយអាយុជីវិតរបស់ប្រជាជនប៉ុណ្ណោះទេ ប៉ុន្តែរឿងបើកសេដ្ឋកិច្ចសង្គមឡើងវិញក៏ជារឿងចាំបាច់ផងដែរ។ លោកបញ្ជាក់ថា៖ «យើងសុខចិត្តចំណាយរាប់រយលានដុល្លាររកទិញវ៉ាក់សាំងមកចាក់ ដើម្បីអាចទាញមកវិញរាប់ពាន់លានដុល្លារសម្រាប់សេដ្ឋកិច្ចរបស់កម្ពុជា»។
លោក ខេន លូ អគ្គលេខាធិការសមាគមរោងចក្រកាត់ដេរកម្ពុជា (GMAC) ប្រាប់ ភ្នំពេញ ប៉ុស្ដិ៍ កាលពីខែមិថុនាថា ទីផ្សារវាយនភណ្ឌ និងសម្លៀកបំពាក់ បានកើនឡើងរហ័ស ដោយសារតែកំណើនរបស់ប្រជាជន និងអ្នកមានទ្រព្យសម្បត្តិច្រើនកើនឡើងជាបន្តបន្ទាប់។
ទោះបីយ៉ាងណា ទីផ្សារលក់រាយបានផ្លាស់ប្តូរពី «ការផលិតក្នុងចំនួនច្រើន» ទៅជា«ក្រុមតូចៗដែលមានវដ្ដជីវិតរយៈពេលខ្លី និងការផលិតម៉ូដទាន់សម័យរហ័ស» និងស្ថិតក្រោមសម្ពាធរបស់អតិថិជនព្រមទាំងការកើនឡើងការទិញទំនិញតាមអនឡាញ ជាដើម។
លោកនិយាយថា៖ «នៅឆ្នាំនេះយើងសំណាងដោយទទួលបានការបញ្ជាទិញមួយចំនួនពីប្រទេសមីយ៉ាន់ម៉ា។ យើងនឹងមានកំណើនកាន់តែច្រើន បើមិនមានការផ្ទុះឡើងព្រឹត្តិការណ៍សហគមន៍ ២០ កុម្ភៈ»។
ទិន្នន័យក្រសួងពាណិជ្ជកម្ម បានឱ្យដឹងថា ការនាំចេញសរុបរបស់កម្ពុជានៅក្នុងឆ្នាំ ២០២០ សម្រេចបាន ១៧ ២១៥,៣៧ លានដុល្លារ កើន ១៦,៧២ ភាគរយធៀបនឹងឆ្នាំ ២០១៩ ដែលមានតម្លៃ ១៤ ៧៤៨,៧៤ លានដុល្លារ៕ LA
