.jpg)
យន្តហោះក្រុមហ៊ុនអាកាសចរណ៍អាល្លឺម៉ង់ Lufthansa ចតនៅព្រលានយន្តហោះក្នុងទីក្រុង មុយនិកប្រទេសអាល្លឺម៉ង់។ AFP
ទីក្រុងប៊ែរឡាំងៈ ក្រុមហ៊ុនអាកាសចរណ៍ធំបំផុតរបស់តំបន់អឺរ៉ុប Lufthansa ដែលរងគ្រោះយ៉ាងខ្លាំង ដោយការរីករាលដាលវីរុសកូរ៉ូណាបានអះអាងកាលពីថ្ងៃអាទិត្យថា ខ្លួននឹងស្វែងរកបង្កើនសាច់ប្រាក់ជាង ២ ពាន់លានអឺរ៉ូទៀត។
ក្រុមហ៊ុនអាកាសចរណ៍របស់ប្រទេសអាល្លឺម៉ង់បាននិយាយថា ក្រុមប្រឹក្សាភិបាលបានយល់ស្របចំពោះការបោះផ្សាយភាគហ៊ុនចាប់ពីថ្ងៃពុធ ហើយតម្លៃសរុបត្រូវបានគេរំពឹងថាមានរហូតដល់ ២,១៤០ ពាន់លានអឺរ៉ូ (២,៥១ ពាន់លានដុល្លារ)។
ក្រុមហ៊ុន Lufthansa បាននិយាយថា ការផ្លាស់ប្តូរដែលមានបំណងធ្វើឲ្យប្រសើរឡើងនូវស្ថានភាពសន្ទនីយភាព និងជួយទូទាត់ជំនួយរដ្ឋ ដែលបានផ្តល់ឲ្យពេលការរីករាលដាលខ្លាំង ត្រូវបានបោះផ្សាយដោយធនាគារចំនួន ១៤។
សេចក្តីថ្លែងការណ៍បន្តថា៖ «សមាជិកទាំងអស់នៃក្រុមប្រឹក្សាភិបាលក្រុមហ៊ុន ក៏បានប្តេជ្ញាចូលរួមក្នុងការបង្កើនទ្រព្យសកម្ម និងអនុវត្តសិទ្ធិជាវទាំងអស់ដែលទទួលបានទាក់ទងនឹងភាគហ៊ុនរបស់ពួកគេឱ្យបានពេញលេញ»។
ក្រុមហ៊ុនអាកាសចរណ៍ដែលរួមបញ្ចូល ក្រុមហ៊ុនអាកាសចរណ៍ អូទ្រីស ស្វ៊ីស និង ប្រ៊ុចសែល ត្រូវបានសង្គ្រោះពីការក្ស័យធនកាលពីខែមិថុនាមុន ដោយការផ្តល់កញ្ចប់សង្គ្រោះពីរដ្ឋាភិបាលអាល្លឺម៉ង់។
ពេលដែលការរឹតត្បិតការធ្វើដំណើរបានបន្ធូរបន្ថយ ហើយការធ្វើដំណើរបានវិលត្រឡប់មកវិញ ក្រុមហ៊ុនអាកាសចរណ៍នេះបានបង្ហាញការខាតបង់សុទ្ធនៅត្រីមាសទី ២ ឆ្នាំនេះចំនួន ៧៥៦ លានអឺរ៉ូ ប្រៀបធៀបជាមួយការខាតបង់ ១,៥ ពាន់លានអឺរ៉ុបកាលពីឆ្នាំមុន ពេលដែលការធ្វើដំណើរនៅទូទាំងសកលលោកត្រូវបានបញ្ឈប់ដោយកូវីដ ១៩។
ទោះបីយ៉ាងណា ក្រុមហ៊ុននិយាយថា ខ្លួននៅតែរំពឹងថាមានប្រតិបត្តិការ ៤០ ភាគរយនៃសមត្ថភាពនៅមុនវិបត្តិកូវីដ ១៩ សម្រាប់ឆ្នាំនេះ៕ RR
