ភ្នំពេញៈ ខណៈ​ពិធី​កាន់បិណ្ឌ​នឹងត្រូវ​ចាប់ផ្តើម​ពីថ្ងៃ​ស្អែក គេ​រំពឹងថា ​តម្រូវការ​សាច់​នឹង​កើនឡើង​បន្តិច ប៉ុន្តែ​តម្លៃ​នឹងមិន​ហក់​ឡើង​ទេ​។ នេះ​បើតាម​អាជីវករ​មួយចំនួន​នៅ​រាជធានី​ភ្នំពេញ​។

ក្នុង​ឆ្នាំ​ ២០២១ នេះ​ពិធីបុណ្យ​កាន់បិណ្ឌ​នឹង​ប្រព្រឹត្តទៅ​ចាប់ពី​ថ្ងៃទី​ ២២ ខែកញ្ញា ដល់​ថ្ងៃទី​ ៦ ខែតុលា​។

កំពុង​រៀបចំ​បន្លែ និង​ត្រី​ដាក់​ថង់​ឱ្យ​អតិថិជន លោកស្រី ហាក់ ឡៃហៀក ដែលជា​អ្នកលក់​បន្លែ​ត្រី​សាច់​នៅ​ផ្សារ​ឈូកមាស ក្នុង​ខណ្ឌ​សែនសុខ រាជធានី​ភ្នំពេញ​បាន​ឱ្យដឹងថា ទំនិញ​នៅ​ផ្សារ​នេះ​មួយចំនួន​បានចាប់ផ្តើម​ឡើងថ្លៃ​ជា​បណ្តើរៗ​ហើយ ព្រោះ​រដូវ​កាន់បិណ្ឌ​កាន់តែ​ជិត​ចូល​មកដល់​។

លោកស្រី​បន្ថែមថា ក្នុង​ឱកាស​នេះ​តម្រូវការ​ត្រី​សាច់ បន្លែ នឹង​កើនឡើង​ខ្លាំង​សម្រាប់​ចម្អិន​យកទៅ​វត្ត​ប្រគេន​ព្រះសង្ឃ​។ គិត​ត្រឹម​ថ្ងៃ​ចន្ទ ត្រី​ឆ្លាំង និង​កញ្ចុះ មានតម្លៃ ៥០ ០០០ ​រៀល ​ក្នុង​ ១ ​គីឡូក្រាម ដោយ​ឡើងថ្លៃ​ចន្លោះ​ពី ៥ ០០០ ទៅ ១០ ០០០ រៀល ​ក្នុង​ ១ ​គីឡូក្រាម​។ ចំណែក​សាច់មាន់ និង​សាច់ជ្រូក​នៅ​រក្សា​តម្លៃ​ដើម​។

លោកស្រី​និយាយថា​៖ «​ខ្ញុំ​លក់​ឡើងថ្លៃ ព្រោះតែ​ត្រី​ទិញ​ចូលមក​ថ្លៃ ហើយ​ការដឹកជញ្ជូន​ក៏​ឡើងថ្លៃ​ដែរ​»​។

ទោះបីយ៉ាងណា លោក សុខ ធា ម្ចាស់​ហាង​លក់​អីវ៉ាន់​ចាប់ហួយ​នៅក្បែរ​ផ្សារ​ដីហុយ ក្នុង​ខណ្ឌ​សែនសុខ រាជធានី​ភ្នំពេញ​បាន​ឱ្យដឹងថា ទំនិញ​ក្នុង​ហាង​លោក​ទាំងអស់​បាន​រក្សា​តម្លៃ​លក់រាយ​ដដែល​ដូចជា មី​មានតម្លៃ ១៩ ០០០ ​រៀល ​ក្នុង​ ១ ​កេស និង​ទឹកបរិសុទ្ធ​ ១២ ០០០ ក្នុង​ ១ ​កេស​។

លោក​និយាយថា​៖ «​ខ្ញុំ​ឃើញថា អ្នកទិញ​ភាគច្រើន​និយាយ​ដូចគ្នា​ថា រាល់​កម្មវិធី​បុណ្យ​ម្តងៗ​តែង​ឡើងថ្លៃ​រហូត ខ្ញុំ​គិតថា ប្រសិនបើ​យើង​ទិញ​ចូល​ថ្លៃ យើង​នឹង​លក់​ថ្លៃ​តាម​នោះដែរ បើ​មិន​ដូចនេះ​ទេ​យើង​នឹង​ខាតដើម​ហើយ តែ​កុំ​ដំឡើងថ្លៃ​ហួសហេតុ​ពេក​»​។

លោក​បន្តថា កាលពី​រដូវ​កាន់បិណ្ឌ​ឆ្នាំមុន ទំនិញ​ដែល​លក់ដាច់​ជាងគេ រួមមាន មី ត្រីខ ទឹកបរិសុទ្ធ ភេសជ្ជៈ ធូប​ទៀន និង​ទំនិញ​មួយចំនួនទៀត​។ លោក​ប្រាប់ថា​៖ «​ប៉ុន្មាន​ថ្ងៃ​មកនេះ ហាង​ខ្ញុំ​មិន​លក់ដាច់​ខ្លាំង​ដូច​រាល់​ឆ្នាំ​ទេ ប៉ុន្តែ​ប្រហែល​សប្តាហ៍​ក្រោយ​ទៅ​ទើប​លក់ដាច់ ព្រោះ​គេ​ត្រូវធ្វើ​ចង្ហាន់​ទៅ​វត្ត​កាន់បិណ្ឌ​»​។

លោក ស្រ៊ុន ពៅ ប្រធាន​សមាគម​អ្នក​ចិញ្ចឹមសត្វ​កម្ពុជា ប្រាប់​ ភ្នំពេញ ប៉ុស្តិ៍​ថា តម្រូវការ​សាច់សត្វ​ក្នុង​ពិធី​កាន់បិណ្ឌ​នឹងមាន​តម្រូវការ​កើនឡើង​បន្តិច​ជាង​ថ្ងៃ​ធម្មតា ប៉ុន្តែ​តម្លៃ​នឹងមិន​ហក់​ឡើង​នោះទេ​។

លោក​ប្រាប់ថា​៖ «​បើតាម​មើលទៅ នា​រដូវកាល​ភ្ជុំបិណ្ឌ ខ្ញុំ​ធានាថា តម្លៃ​សាច់​បោះ​ដុំ​អត់​ឡើង​ទេ​។ ដោយឡែក បើ​ឡើងថ្លៃ​ គឺ​អ្នកលក់​មួយចំនួន​នៅតាម​ផ្សារ​ប៉ុណ្ណោះ​។ សាច់សត្វ​នឹងមិន​ខ្វះខាត​ទេ ខ្ញុំ​ធានា ១០០ ​ភាគរយ​សម្រាប់​អ្នកមាន​តម្រូវការ​។ ចំពោះ​សាច់មាន់​ចិញ្ចឹម​ជា​លក្ខណៈ​កសិដ្ឋាន គឺ​មិន​ឡើងថ្លៃ​នោះទេ ប៉ុន្តែ​បើ​មាន់​រស់​ចិញ្ចឹម​លក្ខណៈ​គ្រួសារ ឬ​នៅតាម​ស្រែចម្ការ នឹង​ឡើងថ្លៃ​ជា​រឿង​ធម្មតា ព្រោះ​វា​មាន​ចំនួន​តិច​»​។

បើតាម​លោក ស្រ៊ុន ពៅ សព្វថ្ងៃ ជ្រូក​រស់នៅ​រក្សា​តម្លៃ​ដដែល គឺ​តម្លៃ​ចន្លោះ​ពី ១២ ០០០ ​រៀល ទៅ ១៣ ០០០ រៀល​ ក្នុង​ ១ ​គីឡូក្រាម​៕ LA

វីដេអូ៖